2 Samuel 11 - Kashibo-Kakataibo Biblia

David Betsabé kakë xanu abë ꞌia ñuikë bana

¹ Anúan ꞌapukamax ꞌakanani kuanux aín suntárukamabë anu ꞌikë anuax ꞌuri kuantankëx timë́ti nëtë ꞌikëbëtan ka Davidnën comandante Joab Israel suntárukama buántanun kixun xuakëxa, xukëx kuanxun ka amonita suntárukama atubë ꞌakanankin ꞌakëxa, ꞌatankëxun ka Rabá kakë ëma a bikankëxa. ꞌAínbi ka David atubë kuanima Jerusalénnubi bërúakëxa.

^2-4 Achúshi nëtën ka aín xubunu tanti baiti David xupinbukëbë chikíax tëkitsi manámia ꞌakë anu kuankëxa, kuantankëx anu nikinbi ka achúshi xanu upíira upí ꞌain pëi machabaiëxanx bërí sënë́anx nashia isakëxa. Istánkëxun ka Davidnën aín uni uinu ꞌikë xanu karaisa ax ꞌikë kixun ñukátanun kixun xuakëxa, xukëx kuanxun ñukábëtsini ukin ka a xukë uni an kakëxa: Ax kaisa Betsabé, Eliam kakë uni aín bëchikë ꞌikën, ꞌimainun kaisa hitita uni Urías aín xanu ꞌikën. Usokin ñuixunkëxun ka Davidnën a isa bëxuntanun kixun aín uni xuakëxa, xukëxua bëan ka Davidtan a imë́ aín xubunuax abë ꞌiakëxa, abë ꞌikiani ka a xanu ꞌain xubunu kuankëxa.

⁵ Usai abë ꞌiax tukin ka xanuxunbi David kana túa kixun an ꞌunánun kamiakëxa.

⁶ Usa ꞌain ka Davidnën Joab suntárunën kushi a hitita uni Urías axa anu unun kanun kixun kamiakëxa, kamikëxun ka Joabnën uisokin kara kamiaxa usabi okin ꞌakëxa.

⁷ Usokin kamikëx uax ka Urías uinu kara David ꞌia anu kuankëxa, kuankë ka Davidtan uisa kara Joab ꞌimainun aín suntáru axa ꞌakanani kuankë akama ꞌikë kixun ñukákëxa.

⁸ Ñukátankëxun ka tanti aín xubunu kuanuxa aín taë pain chukatankëx aín xubunu tanti kuanun kixun kakëxa. Kakëx ka Urías, anu ꞌapu ꞌikë xubu chaiira anuax chikíkiani kuankëxa, kuania ka Davidnën piti upí na pinun ꞌinaishikin buámiakëxa.

⁹ Usai anuax kuanxbi ka Urías aín xubunu kuanima, ꞌapun xubu chaiira aín xëkuë an bërúankë suntárukamabë imë́ anu ꞌi bërúakëxa.

¹⁰ Usai anu pë́karakë ꞌain ka Urías ka aín xubunu kuankëma ꞌikë kixun David ñuixunkankëxa, ñuixunkëxun ka Davidnën anua kuantëkënun kixun Urías kamiakëxa, kamikëxa kuankë ka ñukákëxa: —¿Uisa kupín kaina min xubunu nibaixaxbi tanti kuankëma ꞌain?

¹¹ Kixuan ñukákëxun ka Uríasnën kakëxa: —Bunántisa okin ꞌakë anu Diosan banakama kuënëoxun nan akama ꞌimainun Israel suntárukamaxa Judánën rëbúnkikamabë anu atux ꞌiti mapanatira uisokinbi kara ꞌatankëx anu ꞌikania; usaribiti ka Joab ꞌën ꞌapu a ꞌimainun min suntárukamabëbi ëmanbi ꞌuxkania; ¿Usaia atux ꞌimainun karana ꞌëxëshi upitax ꞌën xubunu kuantankëxun upíokin pianan xëanan kai ꞌianan ꞌën xanun nami ꞌanan usaibu ꞌiti ꞌain? ¡ꞌËn kana asérabi ꞌapu ikë mi kain ꞌën kana usa ñu ꞌatima ꞌain!

¹² Kakëxunbi ka Davidtan kakëxa: —Ënu kamina bërí bërúti ꞌain, imë́ishi kana kuantanun mi xuti ꞌain usakian kakëx ka, Urías anu pain ꞌi Jerusalénnu pëkarakëbë kuanux bërúakëxa.

¹³ Bërúkë ꞌain ka Davidnën abëtan pianan xëakin paëónkëxa. Usokin abëtan xëanëti ka Urías an ꞌapun xubu bërúankë suntárukamanu ꞌuxtëkëni kuankëxa, ꞌaínbi ka aín xubunu kuanima anubi bërútëkëankëxa.

¹⁴ A pë́karakë ꞌain ka Davidtan achúshi kirika Joab kuënëoxun Urías kuania buámiakëxa.

¹⁵ A kirikanu ka ësokin kuënëoxuankëxa: “Urías kamina axira paian ꞌakanani rëkuë́nkiani anpan kuanti suntárukama akëñun xuti ꞌain, usokin ꞌaxun kamina abë ꞌakanankian ꞌakanun ënti ꞌain.”

¹⁶ Usokin kuënëoxunkë kirika a istankëxun ka an kakësabiokin Joabnën anua ꞌakánanti nëtë ꞌikëbëtan axa atumi nishkë amonita unikamabë ꞌakananuxun atun ëma suntárukama bëaramikin, Urías uinu kara suntáru ꞌakánanti ꞌunáinrabu ꞌikë anu atubë kuanun xuakëxa,

¹⁷ usokin ꞌan ka atubë ꞌakananux a ëmanu ꞌikë unikamax Joabnën suntárukamabë ꞌakanankëxa, ꞌakanankin ka Davidnën suntárunën kushikamakëñunbi Urías aribi ꞌakankëxa.

¹⁸ Usai ꞌakanantankëx sënë́an ka, Joabnën David uisai kara ꞌakanankënu ꞌikanxa kixun kamabi ñuixuntanu uni xuakëxa,

¹⁹ xukin ka ësokian katánun kixun a xukë uni kakëxa: “Nun ꞌapu kamina uisai karanuna ꞌakanani ꞌia akamabi upíokin ñuixunti ꞌain,

²⁰ ñuixunkëx nishkin sapi ka mi ñukati ꞌikën: ¿Uisa kupín kaina atun ëma ꞌai a ꞌuramaira obiani kuankan? Mitsun kaina ꞌunaniman atun ka uisa ñubi kara nikin uni anun ëma bëararakë anu nikianxun ꞌaia kixun,

²¹ usokinribi ꞌakin ka Tebés kakë ëma anuxun achúshi xanun Abimélec Jerubaalnën bakë bëchikë a anun ñu rënkë maxax nipakin anun rëkankëxa ¿Uisa kupín kara ꞌaisamaira anun atun ëma bëararakë a ꞌurama okin chichabiani kuankan? Kixuan kakëxun kamina min kati ꞌain: Urías min suntárunën kushi hitita uni aribi ka ꞌakanxa kixun kati ꞌain.”

²² Ësokin kakëx kuanx anu bëbaxun ka David uisokin kanun kara Joabnën kaxa usabi okin kamabi ñuixuankëxa. Ñuixunkëxun kuati ka David ꞌaisamaira Joabmi nishakëxa, nishkin ka an bana buánkë uni a kakëxa: —¿Uisa kupí kaina mitsun ꞌaisamaira a ëma chichabiani kuankan? ¿Mitsun sapi kamina ꞌunaniman atun ka uisa ñun kara ꞌaisatania anun ëma bëararakin kënëara anuxun uni ꞌaia kixun, usokinribi ka Tebés kakë ëma anuxun achúshi xanun Abimélec Jerubaalnën bakë bëchikë aribi anun ëma bëararakë anuxun anun ñu rënkë maxax nipakin rëa a sinaniman? ¿Uisa kupín kaina, ꞌaisamaira ꞌurama kiani kuankin anun atun ëma bëararakë a chichabiani kuankan?

²³ Usokin kakëxunbi ka an bana ñuixunkë uni anribi kakëxa: —Anu ꞌikë suntárukamax ka nu ꞌai atun ëmanuax chikíkuatsinkin ëmanbi rakankin nu ꞌaxa ꞌakëxunbi kananuna nunribi atun ëmanu atsínti xëkuë ami kikiantanun kuaintisama okin bëaran.

²⁴ Usokëbëtan anun ëma bëararakë a manámi nikianxun ka atun pia nikin min suntárukama ꞌaxa, usokin ꞌakin ka ꞌain kushi raíri ꞌanan hitita uni Urías aribi ꞌakanxa.

²⁵ Usa ꞌain ka Davidnën an bana ñuikuankë uni a kakëxa: —Joab kamina kuantankëxun kai kuanti ꞌain, ꞌitsaira ka ꞌinúkë ñu a sinani masá nuitutima ꞌikën, usaibi ka suntárukama ꞌakanani kuax bamaia. Usa ꞌain kamina min sinánmikin kati ꞌain atu ꞌatankëxuan anua ꞌikankë ëma aribi ꞌaisama okin këñunun kixun.

²⁶ Usokian aín bënë Urías ꞌakankë ka aín xanun kuakëxa, kuatankëx ka ꞌitsaira aín bënë sinani masá nuituakëxa;

²⁷ usai ꞌitankëxa aín masá nuitukë a basikëbë aín sinan bukubutia ka, Davidnën ax anu ꞌikë xubu chaiira anu isa buánxunun kixun aín uni xuakëxa, xukëxun buania ka aín xanu ꞌiti biakëxa, bixun ka ami achúshi okin bëchiakëxa. Usokin ꞌakë ꞌaínbi ka Davidtan ꞌakë ñu ax Diosan iskëx upíma ꞌiakëxa.