2 Samuel 1 - Kashibo-Kakataibo Biblia

Davidtan Saúl ñukë ñuikania kua bana

¹ Usa ꞌain ka Saúl ñukë ꞌain David aín unikamabëtan amalecita suntárukama abámikin ꞌabiani Siclag kakë ëmanu kuantëkëankëxa, kuanx ka anu rabë́ nëtën bërúakëxa.

² Anu ꞌixunbi ka Davidnën Saúl ka ain bakë bëchikë rabëbë bamaxa kixun ꞌunánma ꞌikën, usa ꞌain ka rabë́ ꞌimainun achúshi nëtë ꞌikëbë anua Saúl ꞌikë anuax uni achúshi aín chupa tukibukë ꞌixun ain maxkánu chimaputan matakakiax ꞌitsaira masá nuituti kuatsini uakëxa. ꞌAi ka anu bëbai David bëtánain aín bëmánanën me tikai tëtúbuti tsóbuakëxa.

³ Usai ꞌia iskin ka Davidtan ñukákëxa: —¿Uinuax kaina mix ain? ꞌËx kana anua israel unikama ꞌikë anuax abati uan: —Kixun ka a unin kakëxa.

⁴ —¿Uisai kara anuax ꞌikanx? ¡Kamina ꞌë kati ꞌain! —Kixun ka Davidtan karaishiakëxa. —Kakëxun ka suntárukama ka ꞌakananibi abákanxa kixun kanan ka ꞌitsaira suntáru ka bamaxa —kixun a unin kakëxa—. ¡ꞌImainun ka Saúl aín bakë bëchikë Jonatán abë bamaxa kixun kakëxa!

⁵ Kakëxun ka ñukákëxa. —¿Uisaxun kaina Saúl ꞌimainun aín bëchikë Jonatán ka bamaxa kixun ꞌunán? —kixun ka Davidtan an bana chanioi kuankë uni a ñukákëxa.

⁶ Ñukákëxun ka a unin kakëxa: —Anu kuanti sinanmaxi ain bashi Guilboa kakë anu kuan kuankinbi kana Saúl aín manë xëtokëmi kërëxax nikë isan, iskëbëbi ka filisteo suntárukamax anúan ꞌakanankë caballonëan nirinkë ꞌimainun axa caballonuax ꞌakanankë suntárukaman ꞌurama obëtsinkin a nukui aia kana isan kixun këmëkin kakëxa.

⁷ Iskëbëtan anribi kaxú bësukinbi aia iskin ka ꞌë kuëanxa. Kuënkëx kana a ꞌurama obiani kuan.

⁸ Kuania ka ui uni kara isana ꞌëx ꞌai kixun ꞌë ñukáxa, ñukákëxun kana ꞌëx kana amalecita uni ꞌai kixun kan.

⁹ Kakëxun ka ꞌurama onun kixun ꞌë kaxa, kakëx ꞌuramaira obiani kuania ka ꞌë kaxa, kana tëmëratisama tanin ꞌë kamina bëríbi ꞌati ꞌain kixun, ꞌaínbi ka bamatisa ꞌaish ꞌitsaira tëmëraibi bamakëmapain ꞌiaxa.

¹⁰ Usakin kakëxun ꞌurama okin kana ꞌan, ꞌaínbi ka ꞌën iskëx pakëtankëx amiribishi nirutëkëntisamaira ꞌiaxa. Usa ꞌikë ꞌaxun kana aín maxkánua mañukë ain mañuti bianan kana aín mëñusuti aribi mi bëxúnti bian ꞌën ꞌIbu.

¹¹ Usokin kakëxun kuati ka David ꞌimainun abë ꞌikë unikama atun chupa anun paëkin tukai,

¹² ꞌitsaira ꞌatimokin sinani ini Saúl ꞌimainun ain bakë bëchikë Jonatán bamakë kuati ꞌianan ꞌakanankian israel suntárukama Diosan ꞌakinkë ꞌikëbi, bëtsi unikama abámikin ꞌakë a sinánkin bari kuantamainun añu ñubi pima samákankëxa.

¹³ Usai ꞌikin ka axa bana chanioi ukë bëná uni a Davidtan ñukákëxa: —¿Mix kaina uinu ꞌikë uni ꞌain? —Kakëxun ka —ꞌëx kana bëtsi menu tsókë amalecita uni ꞌai —kixun bëná uni an kakëxa.

¹⁴ ¿Kakëxun ka uisa kupí kaina ꞌatimokin ꞌakin Diosan ain unikaman ꞌapu ꞌinun kaískë uni a ꞌan? —kakin ka munuma banakin Davidtan,

¹⁵ ain suntárunën kushi achúshi kuënkin kakëxa: —¡Ënë uni kamina bëríbi ꞌati ꞌain! Kakëxun ka amalecita uni a bamatanun ꞌakëxa,

¹⁶ ꞌakëbë ka David kiakëxa: —Mix bamakë ënëx ka mixi kamina min ꞌucha chikínati ꞌënbi kana Diosan kaískë ꞌapu ꞌa kiax kikë a kupími bamakë ꞌikë kiakëxa.

David bëunan mëskuti Saúl ꞌimainun ain bakë bëchikë Jonatán bënini ian ñuikë bana

¹⁷ Ësai ki ka David Saúl ꞌimainun ꞌain bëchikë Jonatán bamakë kuatankëx rabiti kantai kiakëxa,

¹⁸ ësai rarumati kiti bana ënë ka kamabi Judá menu tsókë unikaman ꞌunánti ꞌikë, kiax ka kiakëxa. Usa ꞌain ka bëunan mëskuti ini kia bana ënë anua Israel unikama ꞌusai ꞌikë ñuikin kuënëokë kirikanuribi kuënëokëxa:

¹⁹ “¡Israelkama ka ꞌitsaira masá nuitutia, ax ami nishkë unikaman ka atún ꞌapu aín bashinuxun axa! ¡Nun suntárukama axa ꞌakánanti ꞌunanbu aka ami nishkë unikaman ꞌaxa!

²⁰ Usa ꞌain ka Gatnu tsókë unikama kuatima ꞌikën, ꞌimainun ka Ascalón ëmanu bëbakin a bana ñuitima ꞌiaxa, filistea xanukamax ka a banakama kuati kuëëanan, manámiki chirini kuëënti ꞌikën, atux ka bëtsi ñu rabikë xanubu ꞌikë usa ꞌaish.

²¹ ¡ꞌImainun ka anu mitsux ꞌikankë Guilboa kakë aín bashi ax ꞌuí ꞌimainun nibítan ꞌibúkin chabokëma ꞌiti ꞌikën, anuax ka ꞌaisamaira Israel unikama bamaxa! Anuxun ka axa rakuë́timaishi ꞌakánanti ꞌunánkë unikama ꞌaxun ꞌain manë parókë ami nishkë unikaman aín ꞌibu ꞌatankëxun amákanxa. Anuax ka Saúlnën manë parókë aín ꞌibu bamakë ꞌain, aín ichukë ax taën amákin chuokankëx aín ichukë ax nëtë́axa.

²² Uinsaranbi ka Saúl ꞌimainun Jonatánnën ami nishkë unikama ꞌatankëxun aín imin aín pia xëpukan kakëma ꞌaish aín xubunu uama ꞌikën, ꞌimainun ka ꞌain manë xëtokë ain pia axa ꞌakánanti ꞌunánkëira unikaman imin ꞌanan aín xënin xëshibëtsini aíma ꞌiama ꞌikën, kiax ka David kiakëxa.

²³ Saúl ꞌimainun Jonatán ax ka kamabi israel unikaman axa upí uni ꞌikë nuibakë ꞌiakëxa, ꞌianan ka tsókëpan ꞌaish ꞌiásabi ñuaxi atubë ënanankëma ꞌikën. ¡Ax ka tëtëkamë ꞌëo nuankësamaira ꞌianan! ¡Paru ꞌinuán kushisamaira ꞌiakëxa!

²⁴ ¡Israelnu ꞌikë xanukama Saúl sinani ka inkan, an ka lino ꞌakë chupa minanën mëskukin pukukë mitsu pañumiakëxa, pañumianan ka chupa kurin chëxëokin upíira okin ꞌakë mitsu ꞌinánkëxa!

²⁵ ¡Uisai ꞌakanani kara axa rakuë́timaishi ꞌakánanti ꞌunáinra unikama anuaxa ꞌakanankënuax bamakanxa! ¡Jonatán ka numi nishkë unikaman ꞌakëx ain bashi chairukënuax bamaxa!

²⁶ ꞌAisamaira kana mi sinani masá nuituti bëunan mëskutin. ¡Jonatán ꞌën xukë́n ꞌakësamaira okin kana mi nuiban! ¡Min kamina ꞌitsaira ꞌë ꞌupíira okin nuiban! ꞌËx kana ꞌën xanu ꞌakësamaira oi mibë nuibanankën.

²⁷ ¡Uisai ꞌiax kara axa rakuë́timaishi ꞌakánanti ꞌunáinra unikama ꞌain ꞌakanankënuax bamati ꞌik! ¡Atúxa anun ꞌakanankë aín manë xëtokëkama ka ꞌatima okë ꞌiaxa!”