2 Reyes 7 - Kashibo-Kakataibo Biblia

¹ Kixun kakëxun ka Eliseonën kakëxa: —Diosan bana kamina kuati ꞌain. Ësai ka Dios kiaxa: “Imë́ishi ënë horanbi ka Samaria ëmanu ꞌikë unikaman anun atsínti xëkuënuxun mapai achúshi ꞌimainun rabë́ litro trigo putuakë achúshi kuríki manë ꞌakë kupinshi maruti ꞌikën, ꞌimainun ka achúshi kuríki manë ꞌakë kupinshi quince litro cebada putuakëribi maruti ꞌikën.”

² Ësokin kakëxun ka an ꞌapu ñu mëëxunkë unin an Dios kikë bana ñuikë uni Eliseo kakëxa: —Diosan naíkamë ꞌëo xëókinun ꞌimikëbëbi ka mix kikësoibi ꞌitima ꞌikën. Usai kiabi ka Eliseonën kakëxa: —Min bërúnbi kamina usaía ꞌia ñu isti ꞌain, ꞌaínbi kamina min a ñukama pitima ꞌain.

³ Usakian kamainun ka rabë́ ꞌimainun rabë́ uni an nami chëkimikë ꞌinsínñu uni anun ëmanu atsínti xëkuënua ꞌikë atuxi kanankëxa: —¿Añu karanuna nun bamatishi kaini tsókin ënuxun ꞌati ꞌain?

⁴ Ëma ꞌukëmëu atsínti sinanx atsini kananuna anuax bamati ꞌain, anu ka numi chaiira ꞌikën; ꞌimainun ënubi tsótax kananuna bamati ꞌain. Usa ꞌain kananuna ënuax anua sirio unikama ꞌikë anu kuanti ꞌain; anuxun ꞌakaskin ꞌakëx sapi kananuna anuax bamati ꞌain.

⁵ Ësai kanankiani ka a xupibutia bë́anki kuankëbë anua sirio unibu ꞌikë anu rikiankëxa; ꞌaínbi ka anua atux ꞌikë anu, bëbai kuankin ꞌurama okinbi uibi anua ꞌaíma okëxa.

⁶ Usai ꞌinuan Diosan ꞌimikëbëa sirio suntárukama anuax ꞌakánanti ꞌaisamaira caballonën nirinkëxa banakësari ꞌia kuanun ꞌimianan caballonuax ꞌakanankë suntáru ukësari ꞌia kuanun kuamiakëxa; kuamikëxun ka sirio suntárukaman sinánkëxa. Israelnu ꞌikë ꞌapun isa hitita ꞌimainun egipcionu ꞌikë ꞌapukama atuisa aín suntárukamabë timë́xun ꞌanun kupíoxa kixun sinánkëxa.

⁷ Usakin sinani ka bari xupibuti bë́anki kuankëbë, atux anu ꞌitia chupa xubusa okin ꞌakë a ëbianan aín caballo ꞌimainun aín burro akamabi anua ꞌikankë anubi uisabi okinma atu ꞌaisa sinani abákin ëbiankankëxa.

⁸ Ëbian ka an nami chëkimikë ꞌinsínñu unikama anua ꞌikankë chupa xubusa okin ꞌakë kamanu atsínbëkinkin anua ëbiankankë piti pianan xëakëxa; usakin ꞌanan ka manë uxua, kuri ꞌimainun chupa, akama bibiankin buánxun unëakëxa. Unëbëtsini uxun ka bëtsinuaribi ñukama bibianxun aribi unëakëxa.

⁹ Usakin ꞌax ka atuxi kánani kikankëxa: —Nun nu ësokin ñu ꞌakë ënëx ka upíokin ꞌakëma ꞌikën. Usa ꞌain kananuna ënë nëtënbi unë́kinma atu kai kuanti ꞌain, nun kananuna unë́xun ësokin ñu ꞌatima ꞌain. Nun nu imë́ishi kai kuanxun kaínti ꞌaínbi ka nun isanuna ꞌatima ñu ꞌa kixun nu ꞌuchokanti ꞌikën. Usa ꞌain kananuna kuantankëxun anua ꞌapu ꞌikë xubunu ꞌikë unikama kai kuanti ꞌain.

¹⁰ Usai kanankiani kuanxun ka an ëma bërúankë uni kuënxun kakëxa: —Nukamax kananuna anua sirio suntárukama ꞌikë anu kuan, ꞌaínbi ka uíxbi asérabi anu ꞌaíma ꞌiaxa; ꞌimainun ka achúshi unirabi banakëma panákë ꞌiaxa. Usa ꞌain ka caballo kamabëbi burrokamaxribi tëkërëkapabuinkë ꞌianan anua ꞌikankë atun xubu chupa ꞌakë ax atun ꞌakësabi ꞌiaxa.

¹¹ Ësokin kakëxun ka an anun ëmanu atsínti xëkuë bërúankë unin ꞌapun xubunu ꞌikë suntárukama bënë́kinshi kuëankëxa.

¹² Kuënxun kakëxuan aín suntárunën kakëx nirukin ka ꞌapun a imë́bia ain suntárunën kushikama timë́xun kakëxa: —Ësokin kana sirio unikama ꞌikë ñuixunkin mitsu kain. Nuxnu pitiñuma ꞌaish tëmërai numin ꞌia ka atun ꞌunánxa, usa ꞌain sapi ka atux anu ꞌikëkama ëbiani unëti kuanxa, atun sapi ka sinánxa nuxnu ëmanuax chikíkiania nukama ꞌakimashi bianan anu atsínkin Samaria ëma biti sinanx ninu unëkanxa.

¹³ Kiabi ka aín suntárunën kushi achúshinën kakëxa: —ꞌËn kana ësokin mi kain min kamina suntárukama mapai achúshi caballo bërúkë anun kuantankëxuan, uisai kara ꞌakanania istánun uni xuti ꞌain. Xutia ꞌakëx ka bamananbi ꞌakëxma usabi utëkënti ꞌikën, ꞌaínbi ka atux utankëx anun rabiti nusamaira ꞌisatanan axa ënu tikikë Israel unikamasamaira ꞌisatantima ꞌikën.

¹⁴ Usakin kakëxun ka rabë́ caballonën nikinkë a bitankëxun, ꞌapun anua sirio suntárukama bukukë a ñachatanun kixun xuakëxa.

¹⁵ Usakin kakëx rikiani kuankin ka anua sirio suntárukama abati kuankë anunbi kuantankëx Jordán kakë baka anubi bëbakin nuiakëxa, nuibiani kuankinbi ka anúan kuankankë anua ꞌaisamaira atun chupa puanan ñuribi sirio unikaman bënëti abákin pubiankë isakëxa. Usai isiani anu kuantëkënxun ka an istia xukë suntárukaman ꞌapu atun isiankë ñukama ñuixuankëxa.

¹⁶ Usakian ñuixunkëx bënëtishi rikianxun ka Samarianu ꞌikë unikaman anuaxa sirio unikama abákë atun ꞌikëkama ꞌatimokëxa. Usakin ꞌakë ꞌain ka Dios kikësabiokin trigo putuakë mapai achúshi ꞌimainun rabë́ litro a manë kuríki achúshi kupí bianan; cebada putuakë quince litro aribi, manë kuríki ꞌakë a achúshi kupíshi maruakëxa.

¹⁷ Usokëbëtan ka ꞌapun an a ñu mëëxunkë uni an isa anun ëmanu atsínti xëkuë bërúanun kixun ëankëxa, ꞌaínbi ka ꞌaisamaira ꞌixuan unikaman xëkuënuxun anu ꞌirukin chákakankëx ñuakëxa, usakin ka an Dios kikë bana ñuikë unían ꞌapu a isi kuankë ꞌikë kakësabiokin a bana sënë́nmikin ꞌakëxa.

¹⁸ Usai ka an Dios kikë bana ñuikë unia ꞌapu, kakësabi oi Samaria anun atsínti xëkuënuxun unin mapai achúshi ꞌimainun rabë́ trigo putuakë maruanan cebada quince litro manë ꞌakë kuríki achúshi kupín ishi maruti ꞌikë kikësabiokin ꞌakëxa.

¹⁹ Usa ꞌain ka an ꞌapu ñu mëëxunkë uni an Dios kikë bana ñuikë uni Diosan naí kamë ꞌëo xëókimikëbëbi isa usai ꞌitima ꞌikë kixun kamainua. Eliseonënribi min bërúnbi kamina usai ꞌia ꞌisnuxun ꞌain, ꞌaínbi kamina a ñukama pinxuma ꞌai kixuan kakësabi oi ka usai ꞌiakëxa.

²⁰ Usai ka asérabi, unían ꞌaisamaira ꞌixun chakakëx anun ëmanu atsínti xëkuënu rakati a uni ñuakëxa.