2 Reyes 6 - Kashibo-Kakataibo Biblia

Eliseonën manë ruë bakanu pakëti nanë́kë unin ꞌakëma ñu ꞌakin bëspúnun ꞌimia ñuikë bana

¹ Achúshi nëtën ka an Dios kikë bana ñuikë unikaman Eliseo kakëxa: —Ka is anu nux mibë ꞌikë xubu ax ka chukúmara anu ꞌitsax ꞌisama ꞌikën.

² Usa ꞌain kamina nukama Jordán kakë baka kuëbí anu xubu achúshi ꞌati i bitánun nukama xuti ꞌain anu ꞌiti ka ꞌaíma ꞌikë kixun ka kakankëxa. Kakëxun ka —Asábi ka kamina bitsi kuankanti ꞌai —kixun Eliseonën atu kakëxa.

³ Kakëxunbi ka atu achúshinën kakëxa —mixribi karamina nubë kuantima ꞌai kixun. Kakëxun ka —Asábi ka kana mitsubë kuanti ꞌai —kixun Eliseonën kakëxa.

⁴ Kabiani ka Eliseo atubë Jordán kakë baka kuëbí kuankëxa, kuanx anu bëbaxun ka anua i tëakankëxa.

⁵ Tëakëbëbi ka anúan achúshi unin i tëakëxbi manë ruë ax máchiki kianx bakanu pakëakëxa. Usai ꞌikëbë ka uni ax kuënkëankëxa: —¡Kuëënkëni ka Eliseonën kuanun ësai kiakëxa ꞌënama ka manë ruë ënëx ꞌikën! ¡Bëtsi uni ñukábëtsinkin ꞌën bëkë ka manë ruë ax ꞌikën!

⁶ Kia ka —¿Uinu kara nanë́ax? —Kixun an Dios kikë bana ñuikë uni Eliseonën kakëxa. Usakin ñukatia ka bëtsin ënu ka nanë́axa kixun tanxuankëxa. Tanxunkëxua Eliseonën i pëñan achúshi tëatankëxun anua nanë́kë anubi nikëbë ka manë ruë bakanu nanë́kë ax bëspúti uruakëxa.

⁷ Usai ꞌikëbëtan ka Eliseonën ka bit kixun kakëxa. Kakëbëtan ka bëtsin manë ruë bëspúti uruia biakëxa.

Eliseo ꞌimainun sirionu ꞌikë suntárukama ꞌia ñuikë bana

⁸ Sirionu ꞌikë ꞌapun ka Israel kamabë ꞌakanankë ꞌixun aín suntárunën kushikama timë́xun, uinuira karanuna anu kuanx ꞌiti ꞌati ꞌain kixun ñukákëxa.

⁹ Usa ꞌain ka Eliseonën ësokin Israelnu ꞌikë ꞌapu kamiakëxa, a menu kamina kuankantima ꞌain a menu ka sirio suntárukama nitsia usa ꞌain.

¹⁰ Usa ꞌain ka Israelnu ꞌikë ꞌapun aín suntárukama a menu kuantanun an Dios kikë bana ñuikë unin kakësabiokin ꞌamo xuakëxa, usakin ꞌakin ka ꞌitsokin axa atumi nishkë Sirionu ꞌikë suntárukaman ꞌati ꞌikëbi atu ië́miakëxa.

¹¹ Usa ꞌain ka Sirianu ꞌikë ꞌapun atu anuxunbi ꞌakasmatankëx ꞌitsaira nishkin aín suntárunën kushikama kuënxun kakëxa: —¡Uinu ꞌikë mikama achúshinëx kaina an Israelnu ꞌikë ꞌapu bana ñuixuni kuankë ꞌai kamina ꞌë kati ꞌain!

¹² Kixuan kakëxunbi ka atu achúshinën kakëxa: Nukama achúshinëxbi kananuna anu ꞌikë ꞌapu bana ñuixuni kuaniman. ꞌAínbi ka an Dios kikë bana ñuikë Eliseo Israel ëmanu ꞌikë uni an kuni, kamabi minmi usakin ꞌakatsi kikë banakama Israel unikaman ꞌapu a ñuixunia anumi ꞌuxkë anuaxmi kikë bana abi ka an kuaxun ñuixunkësa ꞌitánun ñuixunia.

¹³ Usakian kakëxun ka aín suntárunën kushikaman Sirionu ꞌikë ꞌapu kakëxa: —Anu kuanxun kamina uinu kara, Eliseo ꞌia isti ꞌain ꞌën kana suntárukama ñatamiti ꞌain. Usakian kakëx kuanxun isëtsinxun ka Dotán kakë ëmanu ka Eliseo ꞌia kixun kakëxa,

¹⁴ usakian ñuixunkëxun ka Sirionu ꞌikë ꞌapun axa caballonuax ꞌakanankë, ꞌimainun caballonën nirinkë anuax ꞌakánanti ꞌunanbu ꞌimainun menuax ꞌakanankë suntárukama ꞌitsaira xuakëxa xukëx kuanx ka imë́ Dotán kakë ëmanu bëbaxun atu bëararákëxa.

¹⁵ Usakin bëarakë a pëkarakëma ꞌaínshi ka Eliseonën ñu mëmikë uni niruakëxa, nirui ëman chikikinbi ka ꞌaisamaira suntáru ꞌimainun caballonuax ꞌakanankëkama ꞌimainun caballonën nirinkë anuax ꞌakanankë suntárukaman ëma bëararakë mërakëxa, mërabiani kuanxun ka Eliseo kakëxa: —ꞌAisamaira unin ka nu bëarabuianxa, ¿a ñu karanuna bërí nun ꞌati ꞌain?

¹⁶ Kixuan kakëxun ka Eliseonën kakëxa: —Kamina rakuë́tima ꞌain, axa nubë ꞌikë ax ka ꞌitsaira ꞌaish atubëa ꞌikë abëtan sënë́nmaira ꞌikën.

¹⁷ Ësokin katankëxun ka Eliseonën Dios ësokin abë banakin kakëxa: “ꞌËn kana ësokin mi ñukatin, ꞌËn ꞌIbu an ꞌë ñu mëëxunkë uni kamina bërí min ismiti ꞌain.” Kixun kakëxun ka Diosan Eliseo an ñu mëëxunkë uni ismiakëxa, ismikëxun ain bashikama anua Diosan suntárukaman tsi rëkirukësa ꞌixun bëararakë isakëxa.

¹⁸ Usa ꞌain ka atu ꞌanux sirio suntárukama kuankëbëtan Eliseonën Dios ñukákin kakëxa: ꞌËn kana ënë suntárukama mi bëxuñu ꞌiminun mi ñukatin. “Usakian Eliseonën ñukákëxun ka Diosan sirianu ꞌikë suntárukama bëxuñu ꞌinun ꞌimiakëxa.”

¹⁹ Usai ꞌia ka Eliseonën atu kakëxa: —Anunmi ukankë bai ënëx ka a baima ꞌikën ꞌimainun ka anu mi ukankë ënëx a mi ꞌanuxun barikë ëma ama ꞌikën. Usa ꞌain kamina ꞌën ami barikankë uni anu mitsu buánun ꞌë nuibëtsinkanti ꞌain. Usakin kabiankin ka Samaria ëmanu atu uankëxa.

²⁰ Atu uanx anu bëbakin ka Eliseonën ësokin Dios ñukákëxa: “Bërí kamina ënë unikaman bëru na iskanun bëpëkinun ꞌimiti ꞌain.” Usakin ñukákëbë bëpëkikin iskinbi ka Samaria ëma nëbë́tsinshi bëbakë okankëxa.

²¹ Usai anu sirionën suntárukama bëbakë iskin ka Israel unikaman ꞌapun Eliseo ñukákëxa: —¿Ënë unikama kamabi rëtënun ꞌën suntárukama ꞌamiti kara uisa ꞌiti ꞌik?

²² Kiabi ka Eliseonën kakëxa: —Usama ka kamina rëtëmitima ꞌain. Abë ꞌakanankin ñusmoxun bixun uni itsi ꞌai kamina ꞌaxëtima ꞌain. Usakin ꞌakinma kamina pimianan xëamitankëxun atun ꞌapunua kuantanun xuti ꞌain.

²³ Usa ꞌain ka achúshi fiesta chaiira ꞌakin atubëtan pianan xëakankëxa. Usakin ꞌatankëxua ꞌapun kamina kuankanti ꞌai kixun xukëx ka atun ꞌapunubi kuankankëxa. Usakin ꞌakë anuxuinshi ka sirio unikaman Israel menuax atubë ꞌakanankë ëankëxa.

Sirianu ꞌikë suntárukaman Samaria me bikë ꞌain anu Eliseo ꞌia ñuikë bana

²⁴ Usai ꞌikë basikëbëtan ka, Ben-hadad Sirianu ꞌikë ꞌapu an aín suntárukama timëakëxa, timëbiani atubë kuanxun ka Samaria kakë ëma ꞌati sinánxun bëararákëxa.

²⁵ Usakin ꞌan ka Samaria ëma xëkuë anun kuainti ꞌaíma ꞌinun upíokin xëpukë ꞌain numin ꞌitsaira ꞌikankëxa, usa ꞌain ka a piti këñúkëbëtan achúshi burro maxká ochenta kuríki manë ꞌakë sënën aín kupí ꞌiakëxa, ꞌianan ka ñumakuru pui achúshi litro chukúma ꞌinun bikë ax, mapai achúshi kuríki manë ꞌakë sënën kupíakëxa.

²⁶ Achúshi nëtën ka Israelnu ꞌikë ꞌapu anun ëma bëararakin kënëkë manámitan inutia mërakin kuënkëonkin achúshi xanun kakëxa: —¡ꞌApu ꞌixun kamina min ꞌë ꞌakinti ꞌain!

²⁷ Kixuan kakëxun ka ꞌapun kakëxa: —Diosan mi ꞌakiniama karana, ¿uisokin ꞌën mi ꞌakinti kaina kuëënin? ¿ꞌËn karana trigo këñun mi, vino ꞌinánti ꞌain?

²⁸ ¿Uisai kaina ꞌian? Kixuan kakëxun ka xanun kakëxa: —Ënë xanun ka ësokin ꞌë kaxa, min tuá kamina bërí nun piti bëti ꞌain, imë́ishi kananuna ꞌënanribi piti ꞌain.

²⁹ Usakin kakëxun kananuna ꞌën tuá, upíokin ronxun nëishokin ꞌaxun pian. Usakin ꞌonxun kana a pëkarakëbëtan aín tuaribia a piti ꞌati bënun kan, ꞌaínbi ka an aín tuá unëaxa.

³⁰ Ësokian a xanun kakëxun kuati ꞌitsaira nishkin ka, ꞌapun aín chupa tukakëxa. Tukakian anun ëma bëararakin kënëkë manámixun, bëtsi chupa pañuia ka anu ꞌikë unin iskankëxa.

³¹ Usakin ꞌai ka ꞌapu munuma kuënkëni kiakëxa: “¡Diosan ka Eliseo Safatnën bakë bëchikë a ënë nëtënbi aín maxká tëbískaiama ꞌaisamaira okin ꞌë tëmëramiti ꞌikën!”

³² Usai ꞌimainun ka Eliseo aín xubunu uni aín tukurikukamabë timë́ax bukukë ꞌiakëxa. Anu bukumainun ka ꞌapun aín uni achúshi xuakëxa. Xukëx kuanxa aín xubunu bëbakëma pain ꞌain ka, Eliseonën aín tukurikubukama a kakë ꞌiakëxa: —ꞌApun ka an uni ꞌakë ꞌixunbi ꞌë isa ꞌanun kixun uni xuaxa. Usa ꞌain kamina, atúxa bëbakëbëtan xubu xëputi xëpukin ꞌaimakin kushiokin tuinti ꞌain, usa ꞌain kana atu kaxú aia nikuatsinia aín ꞌapu kuati ꞌain.

³³ Kixun atu kaia sënë́nkë ꞌaímabi ka, anua Eliseo ꞌikë xubunu bëbakin Eliseo kakëxa: —Diosanbi ka ësainu nux ꞌinun nu ꞌimiaxa, ¿añu karanuna nua ꞌakinun kixun kainkin nun ꞌati ꞌain?