2 Reyes 4 - Kashibo-Kakataibo Biblia

Eliseonën Sunem kakë ëmanu ꞌikë kasunamëkë xanun xëni chaiira ꞌinun ꞌimia ñuikë bana

⁸ Achúshi nëtën ka Eliseo Sunem kakë ëmanu kuankëxa, kuankë ka anuxun achúshi xanu unin uisokinbi kakëma an ain xubunuxun isa pikuanun kixun karaishiakëxa. Usa ꞌain ka Eliseonën a ëmanu kuankëtibi a xanun xubunuxun piakëxa.

⁹ Usa ꞌain ka a xanun achúshi nëtën aín bënë kakëxa: —Ka kuat, ꞌën kana ꞌunan, ënë unix ka ënë ëmanu inúkëtibi nu isi aia, ax ka an Dios kikë bana ñuikë ꞌaish mënin sinánñu uni ꞌikën.

¹⁰ Usa ꞌain kananuna nun xubu tëkitsi manámi ꞌikë anua ax nukúti mëníoxunti ꞌain. ꞌAtankëxun kananuna anua ꞌuxti nanxuanan, achúshi mesa ꞌimainun anua tsóti sillaribi nanxuanan anun pë́kitia tiríoti aribi nanxunti ꞌain. Usa ꞌain ka nu isi aia anu ax ꞌitiñu ꞌiti ꞌikën.

¹¹ Usokian ꞌan ka achúshi nëtën Eliseo a xanua aín xubunu mëníoxunkë anu ꞌuxi bërúakëxa,

¹² anuxun ka aín ñu mëëmikë uni Guehazí a kakëxa: —Xubu ꞌibun xanu sunamita a kamina ꞌë kuënxunti ꞌain, kixuan kakëx kuanxun ka an ñu mëëxunkë uni an xubu ꞌibun xanu a kuëankëxa. Kuënkëx ka anua Eliseo ꞌikë anu kuankëxa, kuankëbëtan ka Eliseonën an ñu mëëxunkë uni a kakëxa:

¹³ —Ënë xanu kamina an ka nu ꞌitsaira ꞌakinia usa ꞌain kananuna añu karana nunribi ꞌaxúnti ꞌai kixun ñukáti ꞌain; axa kuëënkëbëtan kananuna anun në́kin ꞌapu kanan suntárunën kushikamaribi nun kaxunti ka asábi ꞌiti ꞌikën. Kixuan kakëbi ka xanu. —ꞌËx kana ꞌën aintsikamabëbi asábi ꞌain —kakëxa kabiani ka anuax chikikiankëxa.

¹⁴ Usai ki chikíkiania kuankëbëtan ka an ñu mëmikë uni kakëxa, —¿Usaía ꞌia karanuna nunribi uisaxun a xanu ꞌakinti ꞌain? —ꞌËnribi kana uisakin karanuna ꞌakinti ꞌai —ꞌunanima kixun ka Guehazínën kakëxa—. A xanux ka tuáñuma ꞌimainun aín bënë kaniakëkë ꞌikën.

¹⁵ —Xanu akamina ënua unun ꞌë kuënxuntëkënti ꞌain —kixun ka Eliseonën an ñu mëëxunkë uni kakëxa—. Kakëx kuanxuan an ñu mëëmikë uni an kakëx kuanxi ka xanu ax anua Eliseo ꞌikë aín xëkuënushi bërúakëxa.

¹⁶ Usai ꞌia ka Eliseonën kakëxa: —Bari itsi ukë anun kamina ënë ꞌuxë ꞌikëbë achúshi tuáñu ꞌinuxun ꞌain. Ësakian kakëxunbi ka xanuxun kakëxa: —Usama ka mix Diosan uni ꞌixun kamina an mi ñu ꞌaxúnti ënë parántima ꞌain.

¹⁷ ꞌAínbi ka Eliseonën kakësabi oi a xanu a bëtsi bari ꞌirukëbë tutankëx achúshi bëbu tuá aín ꞌuxë sënë́nkëbë bakë́ankëxa.

¹⁸ Usakian ꞌain titan tuakëx ka a tuá kaniakëxa. Usai kani ka achúshi nëtën anua aín papa aín unikama ñu ꞌapákë bimikë naë anu kuankëxa,

¹⁹ kuanxbi ka ꞌain maxkátan paëokëx munuma kuënkëni kiakëxa: —¡Uisakaskin kara maxkátan ꞌë paëoia! ¡ꞌËn maxkátan ka ꞌë paëoia! Usai kia kuakin ka aín papan an ñu mëmikë uni achúshi kakëxa: —Ënë tuá kamina aín titanubi buánti ꞌain.

²⁰ Usokian kakëxun ka an ñu mëëxunkë uni an aín titanu buánkëxa, buánxunkëxun ka aín titan bari xamarutamainun makaxun tsókiankëxa. Tsókinkëxi ka a tuá ñuakëxa.

²¹ Usai ꞌia aín titan tuá anua an Dios kikë bana ñuikë ꞌuxkënu buánxun rakankëxa, rakanbëtsini chikíkin ka aín xëputi upíokin xëpúakëxa.

²² Xëpúxun ka aín bënë kamiakëxa, kamikëx aia ka ain bënë kakëxa: —Abë kuanxun an Dios kikë bana ñuixunkë a uni istánun kamina an mi ñu mëëxunkë uni achúshi ꞌëbëa kuanun xuanan achúshi burro ꞌë inánti ꞌain. Abë bana kuatsini kana amiribishi utëkënti ꞌain.

²³ —¿Uisa kupín kaina bëríbi abë banai kuankatsi kin? —kixun ka aín bënën kakëxa—. Bërí ka ꞌuxë ió ꞌianan anun tantiti sábado nëtëma ꞌikën. —ꞌËn kana uisai karana ꞌiti ꞌai a ꞌunanin usa ꞌain kamina ꞌëmi ꞌitsaira sinántima ꞌain kixun ka —aín xanun kakëxa.

²⁴ Usokin aín bënë katankëxun ka xanun an ñu mëmikë uni burro mëníonun ꞌamiakëxa. ꞌAmikëxuan mëníokë ka kakëxa: —Kananuna kuani usa ꞌain kamina minpan rëkuë́nkiani nirakëtima ꞌën mi kakëx mi nirakënun kuanshiti ꞌain.

²⁵ Usakin kabiani kuantankëx ka a xanu Carmelo kakë aín bashi anua an Dios kikë bana ñuixunkë uni ꞌikë anu nuküakëxa. Usaia kuania ka Eliseonën ꞌuranxunbi xanu a isakëxa, iskin ka an ñu mëëxunkë uni Guehazí a kakëxa: —Ka kuat, sunamita xanu bënuñu an ꞌain xubunu nu ꞌimikë aka aia.

²⁶ Kamina abákianxun bikin uisa kara ax ꞌikë ñukánan uisa kara aín tuá ꞌimainun aín bënë ꞌikë ñukákin biti ꞌain. Usakia kakëx abákiani kuanxun ka an ñu mëëxunkë uni an Eliseonën kakësabiokin bikin ñukákëxa, ñukákëxun ka xanun kamabi ka asábi ꞌikë kixun kakëxa.

²⁷ Usakin bibiankin buánxun ka anua Eliseo ꞌikë Carmelo kakë anu bëbakiankëxa. Bëbakinkëxuinshi ka ain taë rabë́ ꞌikúkin biakëxa, bitsia okin a ꞌurama ukin Guehazínën ëmikasiabi ka Eliseonën kakëxa: —Kamina ënti ꞌain ax ka ꞌitsaira masá nuitutia Diosan ka bëríbi usaía ënë ñu ꞌiti ñuikin ꞌë kakëmapan ꞌikën.

²⁸ Ësai kia ka xanuxun kakëxa: —ꞌËn ꞌIbu, ¿ꞌën karana achúshi tuáñu ꞌiti mi ñukan? ¿ꞌËn karana ꞌëmi paránxuma ꞌanun mi kakëma ꞌain?

²⁹ Usakin kakëxun ka Eliseonën Guehazí kakëxa: —Mëníokakiani kamina ꞌën tatsi bibiani xanu ënën xubunu kuanti ꞌain. ꞌAínbi kamina kuankin unibë mëranankin uisakinbi katima ꞌain, ꞌimainun kamina uin kara uisa karamina ꞌai mi kaia a unibi uisokinbi katima ꞌain. Kaima kuantankëxun kamina tuá aín bëmánanu ꞌën tsati nanti ꞌain.

³⁰ ꞌAínbi ka tuá aín titan Eliseo kakëxa: —Ësokin kana Diosan kuamainun mi kain, mixmi ꞌëbë kuankëbëma kana ꞌëxribi ënuax kuanima. Ësokia kakëx ka Eliseo a xanubë kuankëxa.

³¹ Usai banamainun ka Guehazí ax pain rëkuë́nkiani kuanx xanu aín xubunu bëbakëxa bëbaxun ka tuákën bëmánanu Eliseonën tatsi buánkë a nankëxa, ꞌaínbi ka tuá ax uisaibi ka uinakëtia kixun istisari ꞌiama ꞌikën; usokëxa uisaibi ꞌikëbëtama ka Guehazí na aia mërakin Eliseo ësokin kakëxa: —ꞌËn kana minmi usakin ꞌanun kakësabiokin tuá a ꞌan, ꞌaínbi ka shaikiananbi ubikëma ꞌikën.

³² Usakian kakëx xubunu atsínkin Eliseonën iskëxbi ka tuá ñukë anua ax ꞌuxkë anu rakankë ꞌiakëxa.

³³ Usa ꞌain ka anu atsínkin anua ꞌuxkë a xëpúax Eliseo Diosbë banakëxa. Usa ꞌain ka tuá ñukë a ꞌimainun Eliseo ashi anua ꞌuxkë ꞌukëmëu anu ꞌiakëxa.

³⁴ Usai Diosbë banatankëx anua ax ꞌuxkë anua tuá ñukë rakankë anu ꞌirukin ka ꞌikúkin bëonakin tuá ñukë ꞌain kuëbíbëtan sënën aín kuëbí nanan bëískin aín mëkënu aín mëkën nankin ꞌiküakëxa. Usakin ꞌakëx ka ñukë ax aín nami matsikë abira abi aín nami xanakëxa.

³⁵ Usai ꞌikëbë nirui ka Eliseo anua ꞌuxkë anuax kuaínbëkini niakëxa; usai ꞌitankëx ka amiribishi anua ꞌuxkë anu ꞌirutëkënkin tuá ñukë a ꞌikútëkëankëxa. Usokin ꞌikúkëx uinakëti mapai achúshi ꞌimainun rabë́ oi kushikin uin bitsi ka bëpëkiakëxa.

³⁶ Usai ꞌikëbëtan ka Eliseonën Guehazí kakë uni a kuënxun kakëxa: —Xubu ꞌibu sunamita xanu akamina kuënti ꞌain. Kixun kakëxua Guehazínën kuënkëx ka xanu ax anu uakëxa, ukë ka Eliseonën xanu a kakëxa: —Min tuá ka baískiaxa kamina biti ꞌain.

³⁷ Usakin kakëx ka a ꞌuramoi a tanain rakabukin ka Eliseo asábi ka kakëxa. Usai ꞌitankëxun aín tuá mëinbiani ka anua Eliseo ꞌikë anuax kuankëxa.