2 Reyes 25 - Kashibo-Kakataibo Biblia

Babilonianu ꞌikë ꞌapun Jerusalénnu ꞌikë unikama atun menu ñatanbiankin uan ñuikë bana

¹ Anua nueve baritia ꞌapu ꞌikë ꞌaían mapai rabë́ nëtë décimo ꞌuxë ax ꞌikëbë ka Nabucodonosor kakë ꞌapu ax aín suntárukamabë Jerusalén ꞌanuxun bëararati kuanuxun isi, anu ꞌiakëxa. Kuanx atun ëma ꞌurama a bëtánain basi pain ꞌikin anun ëma kënëarakë a buinarakin anun ꞌirukianxun atu ꞌati ꞌakëxa.

² Usokin ëma bëararakë ꞌain ka Sedequías mapai rabë́ ꞌimainun achúshi bari anun ꞌapu ꞌikë ꞌiruakëxa.

³ Usokin bëararatankëxa Babilonianu ꞌikë suntárukamax basipain anu ꞌikëbë ka a piti këñuakëxa, usai ꞌikëbëa bari rabë́ ꞌimainun rabë́ ꞌuxë ꞌirukë anun nueve nëtë ꞌikëbë ka anun a piti ñu këñuakëxa usa ꞌain ka numi chaiira a ëmanu ꞌiakëxa.

⁴ Usa ꞌain ka a nëtënbi ꞌapu Sedequíasnën kamikëxun ain unikaman anun ëma kënëara kënë anun chikiti kini achúshi ꞌakëxa, anun ka ꞌapu Sedequías a imë́ abánëakëxa. Babilonia kama atu ꞌurama ꞌaínbi, usai abáti ka amo rabë́bi kënëkian xëkuëokë anun kuani ꞌapun xubu ꞌurama ñu ꞌapákë a ratanbiani kuankin bai bibiani Jordán kakë baka me sapan ꞌikë ami kikiani kuankëxa.

⁵ Kuaniabi ka Babilonianu ꞌikë suntárukaman ꞌapu Sedequías nuibianxun Jericónu ꞌikë me sapan anua nukúkin ñatankin bikankëxa. Bitsia ka kamaxunbi aín suntárukaman abati abískin ëankëxa.

⁶ Usokin ñatanbiankin ka Babilonianu ꞌikë suntárukaman ꞌapu Sedequías ꞌimainun aín bakë bëchikëma Babilonia menu buánkin. ꞌApu Riblá ëma, Hamat menua ꞌikë anu buánkëxa. Anuxun ka ꞌapu Nabucodonosornën Sedequías ka sipuakë ꞌiti ꞌikën kixun bana nankëxa,

⁷ usakin ꞌakin ka an ismainunbi aín bakë bëchikë bëbukama rëtënun ꞌamiakëxa. ꞌAmianan ka Sedequías aín bëru rabë́ ëchitankëxuan manë risin tëkërë kabiankin Babilonianu buánun ꞌamiakëxa.

Anuxun Dios rabiti xubu në́an ñuikë bana

⁸ Nabucodonosornën ka aín suntárunën kushi comandante Nebuzaradán a Jerusalénnu xuakëxa, xukëx kuanx ka mapai achúshi ꞌuxë ꞌirukë anua mapai achúshi ꞌimainun rabë́ nëtë ꞌikëbë bëbakëxa, a baria Nabucodonosor dieciocho baritia ꞌapu ꞌitankëxa anun diecinueve baritia ꞌapu ꞌikë a barin ka usakin ꞌamiakëxa,

⁹ usakin xukëx kuanxun ka anuxun Dios rabiti xubu akëñun anua ꞌapu tsókë aín xubu a ꞌanan kamabi uni ñu ꞌunánkë a ëmanu ꞌikë xubukamaribi nëankëxa,

¹⁰ usakin ꞌamainun ka abëa kuankë Babilonianu ꞌikë suntárukaman, anun buinarakin Jerusalén ëma kënëara kënë a rurupakëxa.

¹¹ Usokin ꞌatankëxun ka Nebuzaradánën aín suntárukamabëtan Jerusalénnu bërúkë uni raíri ꞌimainun, axa Babilonianu ꞌikë ꞌapumi rakuë́ti anu kuankë akamakëñun an ñu ꞌati ꞌunánkë akamaribi uankëxa.

¹² Usakin uanan ka uni ñuñumairakama ashi, naëoxun uvas ꞌapáxun mënioi ꞌinun ënkankëxa.

¹³ Usonan ka Babilonianu ꞌikë suntárukaman anuxun Dios rabiti xubunu ꞌikë manë panshian ꞌakë ñukama tukapakëxa: ꞌanan ka ami xubu ꞌati nitsínkë akëñun ami birukin ꞌakë aín tapun akamakëñunbi chaiira ꞌinua ami ꞌumpax nanti ꞌakë akamabi rurupanan kamabi manë panshian raíri Babilonia ëmanu buánkëxa.

¹⁴ Buanan ka amia chimapu bikë tasunsa chukúmabu, a ꞌimainun anun ñu mëëti manë pará, ꞌimainun manë paná kuënukin ꞌakë, a ꞌianan tasunkama, cuchara chabu a ꞌimainun, anun Dios rabikin xëati, manë panshian ꞌakë anuxun Dios rabiti xubunua nankë akama uankëxa.

¹⁵ Usaribi okin ka suntárunën kushi Nebuzaradán an ka kamabi ñu kuri ꞌakë ꞌimainun manë uxua ꞌakë ñu akamabi biakëxa: bianan ka amia tsi ëxku ënxaira bikë tasun chaiirabu a bianan chukúmabu akamaribi biakëxa.

¹⁶ A mi xubu puruti nitsínkë rabë́ ꞌianan ami ꞌumpax nanti chaiira a ꞌimainun ami tapuakin anuxun Dios rabiti xubu ꞌatia Salomónnën ꞌamia akamax ka uiti ꞌëñë kara kixun uínbi tupuntisamaira ꞌiakëxa.

¹⁷ Usa ꞌain ka ami xubu ꞌati nitsínkë rabë́ ax aín chaxkë́ ocho metro inumikin ꞌakë ꞌiakëxa, usa ꞌaish ka amiribishi manámi okin tupuntëkënkin akë ax rabë́ metro ꞌinúmikin tupunkë ꞌiakëxa, anu ka ñu kuënëoti ꞌunánkë unikaman kaxorisa ꞌitánun buinarakin manë panshian risi tankin ꞌakëxa. Usakin ꞌakë ꞌaish ka sënë́nbi a rabë́ ꞌiakëxa.

Aín menua bibiankin Judánu ꞌikë unikama buánkan ñuikë bana

¹⁸ Nebuzaradán comandante suntárunën kushi an ka Seraías sacerdotekaman kushi a ꞌimainun sacerdote Sofonías an Seraíasnën kakësabiokin ñu ꞌakë rabë́ ꞌimainun achúshi uni an xëkuë bërúankë aribi ñatankin biakëxa.

¹⁹ Bianan ka sacerdote unibuma Jerusalénnu ꞌikë unikama, bianan ka suntárunën kushi an aín suntáru nikinkë aribi bianan mapai achúshi sënën uni anbia ꞌapu bana ñuixunkë a bianan, an uni ꞌakananuxa suntáruti bikë ain kushi a ꞌimainun sesenta uni ñu ꞌunanbu a ëmanu ꞌikë akamaribi biakëxa.

²⁰ Usakin bitankëxun ka suntárunën kushi Nebuzaradán an atu ain suntárukamabëtan, Babilonianu ꞌikë ꞌapu axa Hamat kakë menua ꞌikë ëma Riblá kakë anu ꞌain.

²¹ Anuxun ka Babilonianu ꞌikë ꞌapu Nabucodonosor an Hamat kakë me anuxun aín suntárukaman atu rëtënun ꞌamiakëxa. Usokin ka atu Judá menua bëkë a unikama ꞌamiakëxa. ꞌAnan ka unikama raíri Judá menua bëkë a, atun menu buánkëxa.

Israel unikama Judá menu bërúkë akamaxa Egipto menu abá ñuikë bana

²² Usokin pain atu ꞌamitankëxun ka Nabucodonosor Babilonianu ꞌikë ꞌapu an, achúshi Israel uni Guedalías Ahicamnën bakë bëchikë ꞌimainun Safánnën xuta ax atun ꞌapu ꞌixuan Judá menu an ëbëtsinkë unikama bërúanun anëakëxa.

²³ Anëkë kuabiani ka suntárunën kushikama Judá menua Babilonia suntárukaman ñatankëma akamax Mispá kakë ëma anu Guedalías ꞌapu anëkë kuabiani abë banai kuankëxa. Aín kushikama ax ka ꞌiakëxa, Ismael, Netanías kakë uni aín bakë bëchikë; Johanán, Caréah kakë uni aín bakë bëchikë; Seraías, Tanhúmet ꞌain bakë bëchikë ax ka Netofá kakë ëma anu tsókë uni ꞌiakëxa ꞌimainun ka Jaazanías ax achúshi uni Maacá kakë ëma anu tsókë uni aín bakë bëchikë ꞌiakëxa. Akamax ka ain suntárukamabë kuankëxa.

²⁴ Kuankë ka Guedalíasnën aín suntárukama këñunbi, katëkënxuma ashikin usai ka ꞌitsíanxa kixun ñuixunkin kakëxa, mitsux kamina Babilonianu ꞌikë suntárunën kushikama anunu ꞌikë ënë menu bërúkëbë atu ñu mëëxuntimi rakuë́tsiama, usokëx ka asábi ꞌitsíanxa.

²⁵ Usakin kakia atu sinanamikë ꞌixunbi ka, Ismael Netanías aín bakë bëchikë Elisamá ain xuta Judá menu ꞌikë, ꞌapukaman aintsi ax Mispánu mapai rabë́ unikamabë bëbaxun mapai achúshi ꞌimainun rabë́ ꞌuxë këñuti kuankë anun ka Guedalías ꞌimainun ꞌain suntárunën kushikama ꞌianan, Judá menu ꞌikë raíri unikama ꞌimainun Babilonianu ꞌikë uni atubëa ꞌikë akamakëñunbi ꞌakëxa.

²⁶ Usokian ꞌan ka kamabi suntárunën kushikama Judá menua ꞌikë uni ñuñuma ꞌimainun ñuñu unikama atux Babilonianu ꞌikë unikaman ꞌatimi rakuë́ti Egipto menu abákankëxa.

Joaquín sipuakë ꞌikëbi Babilonianu ꞌikë ꞌapun chikían ñuikë bana

²⁷ Usa ꞌain ka Joaquín kakë Judá menua ꞌikë a bitankëxun Babilonianu ꞌikë ꞌapun treinta ꞌimainun siete baritia sipuakëxa. Sipua ꞌaínbi veinticinco nëtë anun febrero ꞌuxë këñuax marzo ꞌuxë ꞌiruti nëtë anun ka achúshi uni Evil-merodac kakë ax ꞌapu ꞌikin pëuax ꞌapu ꞌixun an ꞌitsaira nuibakëxa, nuibakin ka bëtsi ꞌapun sipua ꞌikëbi an Joaquín chikíankëxa.

²⁸ Usa ꞌixun ka upiti abë banakin abëa ꞌikë ꞌapukaman ñatanbiankin buánkë ꞌapukama a ꞌakësamaira okin Babilonianu ꞌikë ꞌapun nuibakin abëa ꞌinun ꞌimiakëxa.

²⁹ ꞌImikin ka Joaquín sipunu ꞌixuan pañukë aín chupa pëmianan bëtsi chupa pañumiakëxa, usakian pañumikëxun ka ꞌapubëtan aín ñuti nëtë ꞌitámainun anu ꞌixun ꞌapun xubunuxun piakëxa.

³⁰ Usakin ꞌakë ka Joaquín aín ñuti nëtë ꞌitámainun, Babilonianu ꞌikë ꞌapun nëtëtibi anúan aín kuëënkë ñu maruti kuríki ꞌinánkëxa.