2 Reyes 24 - Kashibo-Kakataibo Biblia

Joaquím aín suntárunën kushikama ꞌimainun unikama këñunbi Babilonianu ꞌikë suntárukaman ñatanbiankin buan ñuikë bana

⁸ Joaquímnën ka dieciocho baritiañu ꞌixun ꞌapu ꞌikin pëuax rabë́ ꞌimainun achúshi ꞌuxëishi Jerusalénnu ꞌapu ꞌiakëxa. Aín titax ka Nehustá kakin anëkë ꞌaish Elnatán Jerusalénnu tsókë uni aín bakë bëchikë ꞌiakëxa.

⁹ ꞌAínbi ka an ꞌakë ñukamax Diosan iskëx ꞌaisama ꞌiakëxa, aín papa ꞌasaribiokian ꞌatima ñu ꞌakë ax.

¹⁰ A nëtëkaman ka Nabucodonosor kakë uni ax Babilonia menu ꞌapu ꞌiakëxa, usa ꞌixun ka aín suntárukaman Jerusalén ꞌanuxun bëarabuinnu xuakëxa.

¹¹ Usakin xukëx kuanxuan aín suntárukaman ꞌakëbë ka, atun ꞌapu Nabucodonosor ax Jerusalénnu bëbakëxa.

¹² Usakin ꞌakëx ka ꞌapu Joaquín Judá menua ꞌikë ax, aín tita ꞌimainun aín suntárunën kushikama a ꞌimainun aín ꞌapukama abëbi Babilonianu ꞌikë ꞌapu Nabucodonosor an aín menu buánuxun binun atuxi ꞌinámëakëxa. Ësai ka Nabucodonosor axa ocho baritia aín menu ꞌapu ꞌixuan ꞌamikëx ꞌiakëxa.

¹³ Usakin ꞌanan ka ꞌapu Nabucodonosornën anua ꞌikankë anuxun Dios rabiti xubunua ꞌikë ñu upíbu a bianan anua ꞌapu ꞌikë aín xubu anuaribi ñu upíirabu biakëxa, usakin ka ꞌanuxun ꞌaia kiaxa Dios kiásabiokin ꞌakëxa, ꞌanan ka kamabi ñu upíbu kuri akama Salomón Israel kaman ꞌapu an anuxun Dios rabiti xubunu nantia ꞌamia akamaribi masókin tukapakëxa.

¹⁴ Usakin pain ꞌatankëxun ka kamabi Jerusalén ëmanu tsókë unikama ꞌimainun, kamabi atun ꞌapukama ꞌimainun atun suntáru ꞌakánanti ꞌunáinrabu a ꞌimainun, kamabi ñu unioti unainrabu ꞌimainun an manë charóxun unioti ꞌunánkë a kamabia timëkëx ka diez mil uni sënë́nmikin ñatankë ꞌiakëxa. Usakin ka kamabi uni ñu ꞌunánbuira a buánan ñuñuira akamaribi buánkin uni ñuñuma kamaishi anubi ꞌinun ëbiankëxa.

¹⁵ Usakin ꞌanan ka ꞌapu Nabucodonosornën Joaquín ꞌimainun aín tita, aín xanukama aín suntárunën kushikama a ꞌimainun uni ñu ꞌunánkëirabu a ëmanua ꞌikë atuishi buánkëxa. Usokin ka Jerusalén ëmanua bibiankin Babilonia aín me anu buánkëxa.

¹⁶ Babilonianu ꞌikë ꞌapu Nabucodonosor an ka aín suntárukamabëtan, siete mil suntáru Judánu ꞌikë axa ꞌakánanti ꞌunáinrabu a ꞌimainun; an bëtsi bëtsi ñu ꞌati ꞌunánkëkama ꞌianan manë unioti ꞌunánkë a unikama mil uankëxa.

¹⁷ Usokin ꞌatankëxun ka Babilonianu ꞌikë ꞌapu an Matanías ꞌapu anëanan Joaquín aín piaka a chikíankëxa usoxun ka aín anë itsi Sedequías kakin anëkin nankëxa.

Sedequías Judá menu ꞌapu ꞌiá ñuikë bana

¹⁸ Sedequías an ka veintiún baritiañu ꞌixun ꞌapu ꞌikin pëuakëxa, pëua ꞌaish ka mapai rabë́ ꞌimainun achúshi baritia ꞌimi Jerusalénnu ꞌapu ꞌiakëxa. Aín titax ka Hamutal kakin anëkë ꞌiakëxa, ax ka bëtsi Jeremías Libná ëmanu tsókë uni aín ꞌini bëchikë xanu ꞌiakëxa.

¹⁹ ꞌAínbi ka an ꞌakë ñukamax Diosan iskëx Joaquímnën ꞌasaribi okían ꞌakëx ꞌaisama ꞌiakëxa.

²⁰ Usokin ꞌakëbë ꞌaisamaira atumi nishkin ka Diosan an ꞌinan me Jerusalén ꞌimainun Judánua atu chikíankëxa.