2 Reyes 22 - Kashibo-Kakataibo Biblia

Josías Judá menu ꞌapu ꞌiá ñuikë bana

¹ Josías kakë tuá Amón kakë ꞌapu aín bakë bëchikë ax ka Judá menu ꞌitabakin ocho baritiañura ꞌixun pëua ꞌaish, Jerusalénnu treinta ꞌimainun achúshi baritia ꞌapu ꞌiakëxa. Aín tita Jedidá ax ka Adaías kakë uni aín ꞌini bëchikë ꞌiakëxa, ax ka Boscat kakë ëma anu tsókë uni ꞌiakëxa.

² Usa ꞌain ka Josíasnën ꞌakë ñukama Diosan upí isakëxa, an ka aín chaitiokë Davidtan ꞌasaribiokin bëtsiokin sinánkinma upíokin ñu ꞌakëxa.

Diosan bana kuënëo kirika nankë mërá ñuikë bana

³ Dieciocho baritia ꞌapu ꞌikin ka Josíasnën anuxun Dios rabiti xubunu an kirika kuënëokë Safán, Asalíasnën bëchikë Mesulam aín xuta a xunuxunpain. Ësokin kakëxa:

⁴ —Anu kuanxun kamina abë banakin Hilquías sacerdotekaman kushi a kai kuanti ꞌain, anuxun Dios rabiti xubu xëkuë an bërúankë unikaman, unin bëia bikë kuríki akama timëxuan,

⁵ anuxun Dios rabiti xubu bërúanxun mëníotëkënun ꞌamikë unikama akamina anúan an ñu mëëkë unikama kupíonun kuríki a ꞌinánti ꞌain,

⁶ ax ka anun carpintero ꞌimainun an ñu mëia ꞌamikë a ꞌianan, an xubu ꞌati ꞌunánkë uni ꞌimainun anun i maruanan maxá anuxun Dios rabiti xubu ꞌati mëníokin tëapakë akama kupíonun inánkë ꞌikën.

⁷ ꞌInántankëxun kamina uisa kara kuríki oxa kixun mi ñuixunun kixun katima ꞌain, atun ka ꞌamikëxun upíokin ñu ꞌaia, kixun ka ꞌapu Josíasnën Safán kakëxa.

⁸ Kakëxun ka Safánën anu kuanxun ꞌapu Josíasnën kakë ñuixunkin Hilquías sacerdotekaman kushi an kirika kuënëokë a kakëxa, kakëxun ka Hilquíasnën Dios kikë a tanti banakama anu kuënëo kirika a isa anuxun Dios rabiti xubunua nan ꞌikë mëraxua; ꞌinánkëxun ka Safánën kirika isakëxa.

⁹ Usokin ꞌabiani kuanxun ka Safánën ꞌapu Josías, a ñuikin ësokin kakëxa: —Min unikaman ka anuxun Dios rabiti xubunua timëkin bikë manë uxua a anuxun Dios rabiti mëníonun ꞌamikë unikama ꞌinánxa kixun kakëxa.

¹⁰ Kanan ka Safánën Hilquías mëraxun kirika achúshi ꞌinánkëxa, ꞌinánkëxun buánxun ka Safánën ꞌapu Josíasnën kuamainun isi kiakëxa.

¹¹ Usakin a kirikanua a tanti banakama kuënëo isi kiti ꞌaia anua banaia kuati ratuti masá nuituti ꞌikin ka ꞌapun aín chupa tukakëxa,

¹² usakin ꞌakinshi ka Hilquías, ꞌimainun Ahicam Safánën bakë bëchikë akëñun Acbor Micaíasnën bakë bëchikë akëñun Safán an kirika kuënëokë a ꞌimainun ꞌapun suntárunën kushi Asaías akama timë́xun kakëxa:

¹³ —Anu kuanxun kamina ꞌë ñukáxuanan unikamami ꞌanan kamabi Judánu ꞌikë unikama Dios ñukáxunti ꞌain, ꞌanan kamina kirika kuënëokëa bërí Hilquíasnën mërakë kirika anua kikë banakama ax kara uisai kia ñukati ꞌain; Dios sapi ka nukamami ꞌaisamairai nishia nun chaitiokëkaman ka ënë kirikanu kuënëokë kikësabiokin ꞌakin táma ꞌikën.

¹⁴ Usakia kakëx ka ꞌain kushibu Hilquías, Ahicam, Acbor, Safán ꞌimainun Asaías, an bana ñuikë Hulda kakë xanu Salum kakë uni aín xanu abë banai rikiankëxa, Salum ain bakë bëchikë Ticvá, Harhás aín xuta ꞌiakëxa, ax ka anuxun Dios rabiti xubunu ꞌikë chupakama anu nankë a bërúankë ꞌiakëxa. Hulda ax ka Jerusalén ëmanuira ꞌima a ꞌuria ꞌikë ëma itsinu tsókë ꞌikë ka anu kuanxun kakankëxa,

¹⁵ kakëxun ka xanuxun atu kakëxa: —Ësai ka Israel unikaman Dios ax kiaxa: Usa ꞌain kamina an ꞌëbë bananun mitsu xukë uni ësokin kai kuanti ꞌain,

¹⁶ ꞌëx Dios ꞌaish kana ësai kin: ꞌËn kana Jerusalénnu tsókë unikama ꞌanan ain ëmaribi ꞌatima oti ꞌain, Moisésnën kuënëo banakama kirikanua mërakë anuaxa Judánu ꞌikë ꞌapu banai kia kuakë banai kia kuakë usabi okin kana ꞌati ꞌain.

¹⁷ Atun ka ꞌën kakësokin ꞌakë a ëntankëxun, bëtsi dioskama a rabikin ñu xaroxuanxa, usokin ka ꞌë nishmikin a ñukama uisokin ꞌati kara kuëënia usabiokin ꞌaxa; usa ꞌain kana atumi ꞌaisamaira oi nishin, usa ꞌixun kana ñu ꞌatima ꞌaishia bukunun ënkinma atu ꞌatima oti ꞌain.

¹⁸ Kanan kamina ësokin Judánu ꞌikë ꞌapu an Diosbë bananun mitsu xukë a kai kuanti ꞌain, Israel unikaman Dios ax ka ësairibi kiaxa: Min kamina a bana kuakin asérabi ka ax ꞌikë kixun sinan,

¹⁹ min kamina masá nuitukin ꞌëmi sinani ꞌën ënë mekama këñunbi anu ꞌikë unikama këñuti sinani, usai ꞌikin kamina min chupabi tukai masá nuituti ꞌën ismainunbi min unikama ꞌimainun min ꞌaintsikama ꞌianan min chaitiokëkama ënë bana kuatima ꞌucha a sinani ꞌian, usaími ꞌia kana ꞌënbi min bana kuan. ꞌËx Dios ꞌaish kana ësai kin.

²⁰ Usa ꞌain ka bëtsin ꞌatimokëx ñuia anua ain chaitiokëkama maínkan anubi maínti ꞌikën, usokëxun ka ꞌën ënë ëma aín unikama këñunbi ꞌatimokëxa tëmëraia an istima ꞌikën. Usa ꞌain ka ꞌapúan xukë unikama usakin kakë Diosan bana buani a kai anu rikiantëkëankëxa.