2 Reyes 2 - Kashibo-Kakataibo Biblia

Diosan bikëxa Elías naínu kuan ñuikë bana

¹ Achúshi nëtën ka an Diosan bana ñuikë Elías ꞌimainun Eliseo kakë uni rabë́ ax Guilgal kakë ëmanuax chikiakëxa, a nëtën kaisa suñu kushiira mañati bëkikë anúan kuanun Diosan Elías naínu buántisa tankë nëtë ꞌiakëxa.

² Usa ꞌain ka Elíasnën ësokin Eliseo kakëxa: —Ënu kamina mix bërúti ꞌain, Diosan ka Betel ëmanu kuantanun ꞌë xuti ꞌikën. Ësokin kakëxunbi ka Eliseonën kakëxa: —Ësokin kana Diosan kuamainun kanan minbimi sinántiokin mi kain, ꞌën kana mishimi kuantanun ëniman. Ësai kanankiani ka a rabëtaxbi Betel ëmanu kuankëxa.

³ Kuanx bëbakëbë rikuatsinkin ka an Dios kikë bana ñuikë Betelnu ꞌikë unikaman Eliseo kakankëxa: —¿Min karamina an mi ñu ꞌunánmikë uni ka Diosan bërí bitsia kixun ꞌunaniman? Kakëxun ka Eliseonën kana ꞌunanin kixun: —Atu kakëxa, usa ꞌaínbi kamina mitsux añui uisaibi kitima ꞌain.

⁴ Ësokin unikaman kaia ka Elíasnën Eliseo kakëxa: —Ënushi kamina mix bërúti ꞌain, Diosan ka Jericó kakë ëmanu ꞌë xutia. Ësokin kakëxunbi ka Eliseonën kakëxa: —Ësokin kana Diosan kuamainun kanan minbi mi sinántiokin mi kain, ꞌën kana mishimi kuantanun mi ënima. Ësai kanankiani ka a rabëtaxbi Jericó ëmanuribi kuankëxa.

⁵ Kuanx anu bëbakëbë rikuatsinxun ka Jericó ëmanu ꞌikë an bana ñuikë unikaman Eliseo kakëxa: —¿Min karamina an mi ñu ꞌunánmikë unika bërí Diosan bitsia kixun ꞌunaniman? Kakëxun ka Eliseonën kana ꞌunan kixun atu kakëxa: —Usa ꞌaínbi kamina mitsux añui uisaibi kitima ꞌain.

⁶ Usakin atu kakëbi ka Elíasnën katëkëankëxa: —Ënubi kamina mix bërúti ꞌain, ꞌë ka Diosan Jordán kakë bakanu kuantanun xutia. Kakëxunbi ka Eliseonën katëkëankëxa: —Ësokin kana Diosan kuamainun kanan minbi mi sinántiokin mi kain, ꞌËn kana mishimi kuantanun mi ëniman. Ësai kanankiani ka a rabëtaxbi kuankëxa.

⁷ Kuania ka an Dios kikë bana ñuikë cincuenta uni Jericó ëmanua ꞌikë atun nuibiankëxa, nuibiani kuankëbë ka Elías ꞌimainun Eliseo Jordán kakë baka kuëbí ꞌurama bëbai anu nirakëakëxa, nirakëmainun ka an bana ñuikë unikama axribi atu ꞌuramaira ꞌima ꞌuri uisai kara a rabëtax ꞌia iskatsikiax nirakëkankëxa.

⁸ Usai anu bëbaxun ka Elíasnën aín tari bikin tarankin anun baka rishkiakëxa, rishkikëxa baka panárabëti ë́ski me rakakëbë ka anun a rabëtax ꞌukëmanan sikákëxa.

⁹ Usai anu sikátankëx kuankin ka Elíasnën Eliseo kakëxa: —Añu karana mibë ënanaxun mi ꞌaxúnti ꞌai kamina ꞌë kati ꞌain. Kakëxun ka Eliseonën kakëxa: —ꞌËxribi an bana ñuikë uni misaribi ꞌi atun kushi ꞌinun kamina ꞌë upíokin sinánxunti ꞌain.

¹⁰ —Kakëxunbi ka Elíasnën kakëxa: —Minmi ꞌë ñukákë ax ka chamarama chaiira ñu ꞌikën. Usa ꞌaínbi kamina Diosan mikëñun ꞌë ënanamia iskin minmi ꞌë ñukákë a biti ꞌain. ꞌAínbi kamina Diosan ꞌëkëñun mi ënanamikëx ꞌëx kuania iskima minmi ꞌë ñukákë ñu a bitima ꞌain.

¹¹ Ësai kia a rabëtax kanankiani kuankëbëbi ka Diosanbi ꞌimikëx, bënëtishi achúshi caballonan nirinkë anu tsi rëkirukësa ꞌimainun caballonuribi tsi rëkirukësa ax mërakëxa, mërakëbëa Elías abë ënanani anu ꞌiruia ka suñúan kushiira mañákë anbi birubiankin naíkamë ꞌëonu buánkëxa.

¹² Usai ꞌia isi ka Eliseo munuma kuënkëni kiakëxa: “¡Mix kamina ꞌën papasa ꞌianan Israelnën suntárukama kushiira usarabi ꞌian!” Usai kuania nëtëtia ka amiribishi Eliseonën Elías istëkëanma ꞌikën. Usa ꞌain ka aín pañukë tari a bikin masá nuitukin Eliseonën rabë́okin tukakëxa.

Eliseo Elías ꞌiásaribiti an bana ñuikë uni ꞌia bana

¹³ Usokin ꞌatankëxun ka Elíasnëa nipabiankë aín tari a biakëxa, bibiani kuanx ka Jordán kakë baka kuëbí nirakëakëxa.

¹⁴ Nirakëkin tari tarankë anun baka rishki ka munuma kuënkëni kiakëxa: “¿Uinu kara Elíasnëa rabia Dios ꞌik, an kara a ꞌaxuansa okin ꞌëribi ꞌaxúntima ꞌik?” Ësai kikin baka rishkikëbëishi ka amo rabë́bi baka bërúti nirakëakëxa, usai ꞌikëbë ka Eliseo anun sikátëkëankëxa.

¹⁵ Usai ꞌikiania baka sikátëkënkiani kuania isi ka an Dios kikë bana ñuixunkë Jericó ëmanu ꞌikë unikamax kiakëxa: “¡Elíasnua ꞌikë Diosan bëru ñunshin ax ka Eliseonu bërí ꞌikë kiax kikankëxa!” Ësai kikiani kuani ka a bëtanain ami ñanati ꞌikankëxa,

¹⁶ ꞌikin ka ësokin kakankëxa: —Ka kuat, ënu kananuna an mi ñu ꞌaxúnti cincuenta uni ain sinan kushibu ꞌain. Usa ꞌain kamina an mi ñu ꞌunánmikë uni a baritanun nukama xuti ꞌain, Diosan bëru ñunshina atuma buánxun aín bashinu niananbi me sapanubu nia istánun. ꞌAínbi ka Eliseonën ësai kiabi atu kakëxa: —Usama ka uibi kamina mitsun a baritanun xutima ꞌain.

¹⁷ Usa ꞌaínbi ka ꞌurainra ubíokin kakëxun na baritanun a cincuenta unikama xuakëxa, xukëxun ka rabë́ ꞌimainun achúshi nëtë ꞌimikin Elías barikankëxa, barikinbi ka Elías atun mërama ꞌikën.

¹⁸ Usokin barikinbi mëraima ka anua bërúkë Jericó ëmanubi rikuatsinxun Eliseo kakëxa: Usa ꞌain kana ꞌën mitsu a bari kuaxma ꞌinun kan.

Eliseonëa Jericónu ꞌikë baka upí ꞌi mëníokanun ꞌimia ñuikë bana

¹⁹ Usa ꞌain ka Jericónu ꞌikë unikaman Eliseo kakëxa: —Ka kuat, Jericó ëma ënëx ka upí ëma ꞌikën, uisa kara min iskëx ꞌikën, ꞌaínbi ka baka ꞌatima ꞌimainun menu ꞌapákëxbi ñu upiti koima.

²⁰ Kakëxun ka Eliseonën: —Achúshi tasun iókëñun kamina tashi ꞌë bëxúnti ꞌai kixun kakëxa. Kakëxun bëxunkëxun a tasun buani ka,

²¹ Eliseo anua xëxá ꞌumpax ꞌikë anu tashi sakai ësai kiakëxa: —Ësai ka Dios kiaxa: ꞌËn kana ënë baka upí ꞌitánun mënion, usa ꞌain ka uínsaranbi a xëai ñuina ꞌimainun uni achúshirabi bamatima ꞌikën, ꞌimainun ka menu ꞌapákë ñu bimiñumama ꞌitima ꞌikën.

²² Usokin ꞌakë anuinshi ka baka Eliseo kikësabi upí ꞌinun mëníokakë ꞌiakëxa.

²³ Usokin ꞌabiani ka Eliseo anuax Betelnu kuankëxa. Kuania bëbakiania isi ka anu ꞌikë uni bënábunëx ami kuai pëukukankëxa. Pëukin ka munuma sharákin kakankëxa: ¡Ka ꞌiru maruñu! ¡Ka ꞌiru maruñu!

²⁴ Ësokin kakëx kaxú bësui kuainakëkin iskin ka Eliseonën ꞌatima okin sinánxunkin Diosan anën kakëxa. Kakëbëshi ninuax chikíkin ka xaëón rabëtan cuarenta y dos uni këñukin piakëxa.

²⁵ Usokin ꞌakëbë ka Eliseo Carmelo kakë aín bashinu kuantankëx anuaxëshi ka Samaria ëmanu kuantëkëankëxa.