2 Reyes 19 - Kashibo-Kakataibo Biblia

Diosan Judánu ꞌikë unikama Senaqueribnën suntárukaman ꞌaisataniabi ꞌamiama ñuikë bana

¹ Usakian kakëxun kuabianxun atun ñuixunkëxun kuakin ka ꞌapu Ezequíasnën ain chupa tukai nishkin bëtsi chupa xëni pañuakëxa, usakin pañubiani ka anuxun Dios rabiti xubunu kuankëxa.

² Kuanx Diosbë banatankëxun ka Eliaquim an ꞌapun xubunu ꞌikë ñukama bërúankë a ꞌimainun an kirika kuënëokë Sebná akëñun, kamabi sacerdotekama ꞌimainun uni ꞌain tukurikubukama aturibi ꞌitsaira paëkin bëtsi chupa pañubiania, an Dios kikë bana ñuikë Isaías Amósnën bakë bëchikë abë banatanun kixun xuakëxa,

³ xukin ka ësai ka ꞌapu kiaxa katánun kixun kakëxa: Bërí kananuna tëmëramikë ꞌiti ꞌain, usa ꞌaish kananuna bakënuxa aín nëtë ꞌikëbë xanu paëtani bënëtibi aín nami bamax kushima ꞌaish ꞌikasmakësa usaribi ꞌiti ꞌain.

⁴ ꞌËn sinánkëxun sapika min Diosan aín ꞌapúan xukëx Asirianu ꞌikë suntárunën kushikama ꞌatimai banai kikë atun banakama kuakë ꞌiti ꞌikën atux ka Israel unikaman Dios ñui ꞌatimati banaxa usa ꞌain sapi ka a kuaxun Diosanbi a ñuia kikë akama ꞌaisama okin tëmëramiti ꞌikën. Usa ꞌain kamina axa bërúkë nukama achúshi okin Dios ñukáxunti ꞌain.

⁵ Ësakin kaxúan xukëx ka suntárunën kushikama an bana ñuikë Isaías isi kuankëxa,

⁶ kuanxun ka ꞌapu Ezequíasnën usakin katánun kixun kakë banakama ñuikin kakëxa, kakëxun kuatankëxun ka an bana ñuikë Isaíasnënribi atun ꞌapua ësokin katánun kakëxa: Nukën ꞌIbu Dios ka ësai kiaxa: Asirianu ꞌikë ꞌapun suntárunën kushikamaxa ꞌë ñui ꞌatimai banakë a mi kamami rakuë́kantima ꞌain.

⁷ Ka kuat, ꞌën kana a kuabiania bënëtishi ratúkiani aín menubi kuantëkëntanua bana ꞌaisama ñuixunun uni achúshi ꞌimiti ꞌain usokin ꞌakëx kuanx ka ꞌën ꞌamikëxun unin ꞌakëx këñuti ꞌikë, kixun ka Diosan Isaías kakëxa.

⁸ Usaia anu atux ꞌimainun ka Asirianu ꞌikë ꞌapu Senaquerib ax aín suntárukamabëbi Laquis ëmanuax rikiankë ꞌiakëxa. Usai anu kuankëbë ka Jerusalénnuax suntárunën kushikama atúxribi anu kuankëxa, kuakinbi ka Libná kakë ëmanua ꞌikë unikama axa ꞌanux ami ꞌikuainkë mërakëxa.

⁹ Anuxun ka Asirianu ꞌikë ꞌapun Tirhaca kakë uni Etíopia menu ꞌikë unikama ꞌapu kaisa mitsubë ꞌakananun aín suntárukamabë Judánu ꞌikë suntárukama ꞌakinux aia kixun ñuikania kuakëxa. Usa ꞌain ka amiribishi Asirianu ꞌikë an aín suntárunën kushikama Ezequías Judá menua istëkëntanun kixun xuakëxa,

¹⁰ xukin ka achúshi kirika ësokin ꞌatankëxun buámiakëxa: Min Dios ami mitsux katamëkë an ka ꞌën suntárukaman ꞌaxuma ꞌanun anu mitsux tsókë Jerusalén ëma a bërúanti ꞌikën; usa ꞌaínbi kamina mia paránkëxunbi usa ka kixun aín bana sinántima ꞌain.

¹¹ Minbi kamina kuan uisakin kara Asirianu ꞌikë ꞌapun aín suntárukama bëtsi unikama ꞌamiaxa kixun. ¿Usa ꞌain kaina mix uisax ië́ti ꞌain?

¹² ¿Bëtsi dioskama kara ꞌën chaitiokëkama raíri ëma masókin ꞌaia Gozán, Harán, Résef ꞌimainun Bet-edén menua ꞌikë ëma Telasar anua bukukë unikama ië́miakëx?

¹³ ¿Uinu kara Hamat, Arpad, Serfavaim, Hená ꞌimainun Ivá a ëmakamanua ꞌikë ꞌapukama ax ꞌik?

¹⁴ Usakin xukëx kuanxua Senaqueribnën suntárunën kushikaman Jerusalénnu bëbakin ꞌinánkëxun ka Ezequíasnën kirika kuënëokë a biakëxa, bitsi ka a isi anuax banakëxa. ꞌAbiankin ka anuxun Dios rabiti xubunu kuanxun anu pëokakin nankëxa,

¹⁵ nantakëxun ka Dios abë banakin ësakin kakëxa: Israel unibunën Dios mix kamina min ángelkama a manami ꞌain, usa ꞌaishi kamina mix kamabi menu ꞌikë ꞌapukaman Dios ꞌain, min kamina naíkamë ꞌëokëñun me uniokën.

¹⁶ ꞌËn mi ñukákëxun kamina upíokin kuati ꞌain. Min kamina ësaia ñu ꞌia isin nun ꞌIbu Dios. Senaqueribnën ka ꞌatima banakama mi ñuikin kuënëoxun ꞌë kirika bëmiaxa, mix Dios ꞌaish këñutima oi unia ꞌaínbi ka.

¹⁷ Dios asérabi ka, Asirianu ꞌikë ꞌapukaman ka ëmakama ꞌanan atun meribi ꞌaisama oxa,

¹⁸ ꞌanan ka atún dioskamaribi xarátanu nënkin ꞌaisama oxa, akamax ka asérabi Diosma ꞌiaxa, usa ꞌaish ka i ꞌakë ꞌianan maxábia unin ꞌakë ꞌiaxa. Usa ꞌikë ka Asiriokaman masókin këñúaxa.

¹⁹ Usa ꞌain kamina mix nun Dios ꞌixun bërí an ꞌaisatankë unikaman ꞌaisataniabi nu bërúanti ꞌain, usakinmi nu ꞌakinia ka kamabi menu ꞌikë unikaman mix kamina asérabi Dios ira a ꞌai kixun ꞌunánti ꞌikën.

²⁰ Usa ꞌain ka Isaíasnën ësokian Ezequías katánun kixun kamiakëxa: Ësai ka Nun ꞌIbu Dios Israel unibunën Dios ax kiaxa: ꞌËn kana Asirianu ꞌikë ꞌapu Senaquerib a ñuikian ꞌë kakë banakama kuan.

²¹ Ënë banakama ka Dios Asirianu ꞌikë ꞌapu ñui kiaxa: Jerusalénnu ꞌikë unikama ax ka xanu xuntaku ꞌikësai mimi kuaia Senaquerib. Jerusalénnu tsókë unikama ax ka mixmi kuainkëbë aín maxká shaíkai mimi kuaia.

²² ¿Ui kaina min ꞌatimakin ñuikin ꞌichan? ¿Uimi ꞌatimai banai kianan karamina mix ismina usaira ꞌai kiax manámia isi kian? ¡Uimima Israel unikaman Dios upíira a ñui ka usai kiaxa!

²³ Min unikamax ka kuanx Dios ꞌichakin ñui ësai kia. “ꞌËx anuax ꞌakánanti caballonën nirinkëkama nun tupuntisamaira anun kuani kana aín bashi mapë́rakëan, ꞌianan kana Líbano anu ꞌikë aín bashi nun mapërakëtisamaira abi mapë́rakëan. Anuxun kana atun kunxan chaxkë́irabu a tëapanan pino kakë i upíirabu aribi ꞌakën. ꞌAi kana aín bashi rëbu aín manainra anu nukuanan, anua ñu ꞌapákësa kian ꞌaish ni rakákë anubi nukuakën.

²⁴ ꞌUnánkëma menu kana me naëxun anua ꞌumpax xëakën, ꞌimainun kana ꞌën taë napatan akësokin Egiptonu ꞌikë bakakama ë́skati ꞌai kiax ka kiakëxa.

²⁵ ¿ꞌAínbi kaina Dios ꞌixun kana kamabi ñu ësokin ꞌimi kixun ꞌunánma ꞌain? Bërámabi kana nëtë ió ꞌain ꞌën usaía ꞌiti ñukama mëníokën. Usa ꞌain kamina min bërí ëma upíokin kënëkë abi tankinma rurupakin ꞌati ꞌain; usakinmi rurupakin ꞌakëx ka tsamaintsi tsamaintsi ꞌitánun aín tukibukë ax rurukubuti bukubuaxa.

²⁶ Usokin ꞌakëbë ka anu ꞌikë unikama rakuë́ti kushiñumasa ꞌaish ꞌitsaira rakuëaxa, usai ꞌika xubi naënua iskësa ꞌianan pasto paxa iskësaira ꞌiaxa, ꞌianan ka xubu manan xubi koiabi amiaxa bari urukë amixun bëkakian suñun ꞌakëx chushikë usaribi ꞌiaxa.

²⁷ ꞌËn kana ꞌunanin uinuax kaina aín, uinu kaina kuanin akamabi; ꞌimainun kana ꞌunanin kamabi min ꞌakë ñukama, ꞌunánan kana mix kamina ꞌëmi ꞌaisamairai nishan kixun ꞌunan.

²⁸ ꞌIanan kana ꞌën ꞌunan mix nishkimi min kuëënkësokin ñu ꞌaia, usa ꞌain kana caballo ꞌakësabiokin achúshi ñu mi rëñumianan, caballo anun nitsinanan anun buinati aín kuëbínu ꞌakësaribi okin min kuëbínu nanti ꞌain. Usa ꞌain ka Jerusalénnuax ukë bai anunbi kuantëkëntanun mi xuti ꞌikë ka Dios kiaxa.”

²⁹ Ësokia kakëxun ka Isaíasnën Ezequías kakëxa: Ënëx ka axa kikësoibia ꞌiti a ꞌikën: Ënë bari ꞌimainun bëtsi bari ꞌirukë anun kamina axi kotankëxua tuákë bimi a mitsun piti ꞌain, ꞌaínbi kamina baritsi ꞌirutëkënkë anun, ꞌapátankëxun tuaia pain mitsun uvas këñun bëtsi ñukamaribi piti ꞌain.

³⁰ Axa ñukëma ꞌaish Judá menu utëkënkë akamax ka: ꞌapákëxa ñu tapuni ꞌikësaribiti bakë bëchipati kaikamë ꞌëoti ꞌikën.

³¹ Usa ꞌain ka Jerusalénnu ꞌitsama unishi bërúmainun aín bashi Sión kakë anuribi axa ñukëmakama axribi anu tsóti ꞌikën. Ësokin kana ꞌën atu nuibakin Dios kamabi kushiñuira ꞌixun ꞌëx kiásabiokin ꞌati ꞌain.

³² Ësokinribi ka Isaíasnën Ezequías Asirianu ꞌikë ꞌapu a ñuia usai Dios kikë bana kakëxa: Jerusalénnu ka atux atsintima ꞌikën, ꞌianan ka atun pia achúshirabi atumi nianan, aín manë parókë ami katamëxunbi ꞌatima ꞌikën, ꞌanan ka anúan atun ëma kënëkë a rapasu buinarakin ꞌakë anunbi ꞌirukiani kuanxun atu ꞌati ñubi ꞌatima ꞌikën.

³³ Anun uaxa Jerusalén menu bëbakë bai, anunbi ka aín menubi kuantëkënti ꞌikën; ënë ëmanu ka uisaxi atsintima ꞌikën. ꞌËx kana Dios ꞌaish ësai kin.

³⁴ ꞌËn kana a ëma bërúankin ië́miti ꞌain, ꞌën uni David an ka ꞌën kakësabiokin ꞌakëxa, ꞌimainun kana ꞌëxi usokin ꞌakinkatsi kiakën.

³⁵ Usakian kakë a imë́bi ka anu kuanxun Diosan ángelnën, ciento ochenta ꞌimainun cinco mil uni asirio unibunën suntáru anua ꞌikankën anuabi maë rakátanun këñuakëxa, usokin ꞌoonkëka iskankëxa.

³⁶ Usakian an ka Asirianu ꞌikë ꞌapu Senaquerib ax aín suntárukama uani Nínive kakë aín ëmanubi kuantëkëankëxa.

³⁷ Achúshi nëtën ka ꞌitsa baritia inúkëbëtan Senaqueribnën anuxua aín dios Nisroc kakë a rabiti xubunu atsínxun rabiakëxa, rabikëbëbi anu atsínkin ka aín bakë bëchikë rabë́ Adramélec ꞌimainun Sarézer a rabëxun aín papa ꞌakëxa, ꞌabiani ka Ararat kakë menu abákëxa. Usakin ꞌabiania abán ka aín bakë bëchikë itsi Esarhadón kakë ax aín papa ꞌiásaribiti ꞌapu ꞌiakëxa.