2 Reyes 18 - Kashibo-Kakataibo Biblia

Asirionu ꞌikë ꞌapun Samaria ëma ꞌibuokin bia ñuikë bana

⁹ Ezequías ax ka mapai achúshi ꞌimainun rabë́ bari ꞌapu ꞌiakëxa, Oseas kakë Elánën bakë bëchikë ax ka Israel unikaman ꞌapu ꞌiakëxa, anuan rabë́ ꞌimainun rabë́ribi baritia ꞌirukë anun ka Asirianu ꞌikë ꞌapu Salmanasar kakë ax aín suntárukamabë Samaria ëmanu bëbakëxa, bëbakin ka atun ëma bëararaxun atu ꞌibúakëxa,

¹⁰ usokin ꞌatankëxun ka rabë́ ꞌimainun achúshi baritia ꞌikëbëtan Asirio suntárukaman Israel unikama ñatankëxa. Anu ka mapai achúshi ꞌimainun achúshi baritia Ezequías ax Judá menu ꞌapu ꞌiakëxa, ꞌimainun ka Oseas axribi mapai achúshi ꞌimainun rabë́ ꞌimainun rabë́ baritiaribi Israel menu ꞌapu ꞌiakëxa, Asirio unikaman Samaria ꞌibuakë ꞌain.

¹¹ Usakin ꞌaxun ka ꞌapu Salmanasar an israel unikama Asirianu buánxun Habor, menua ꞌikë Gozán kakë baka kuëbía ꞌikë Halah kakë ëma anu raíri xuanan, aín patsankamaribi medos kakë ñakáitsi unikama bukukë atun ëmanu xuakëxa.

¹² Ënë ñukama ka Israel unikama inúakëxa atúnbi ka Diosan bana kikësoi ꞌisamatankankëxa, usai ꞌikin ka a tanti bana ꞌatima okankëxa aín uni Moisés usakin atu ꞌunánminun kixun Diosan ká banakama abi kuaisama tankë kupín.

Senaquerib kakë ꞌapu Judá menu atsían ñuikë bana

¹³ Anuan Ezequías catorce baritia ꞌapu ꞌikë anun ka Senaquerib Asiriakaman ꞌapun aín suntárukamabëtan, Judá menu ꞌikë ëmakama upíokin aín kënë ꞌakë ëmakama a anu atsínkin bikankëxa.

¹⁴ Usa ꞌain ka Ezequías Judá menu ꞌikë ꞌapun an ësokin Asirianu ꞌikë ꞌapu Laquis kakë ëmanua ꞌikë a kamiakëxa: “ꞌËn kana ꞌaisama okin ñu ꞌan. Usa ꞌain kamina ꞌën menuax uiti kaina ꞌë ñukáti atibi mi kupíonun anuax chikiti ꞌain.” Ësakin kamikëxun ka Asirianu ꞌikë ꞌapun Ezequías Judánu ꞌikë ꞌapu ati ꞌitsa kupíonun kamiakëxa, nueve mil novecientos kilo manë uxua ꞌimainun novecientos noventa kilo kuri aribia ꞌinánun kixun kamiakëxa.

¹⁵ Ësokin kamikëxun ka Ezequíasnën anuxun Dios rabiti xubunu ꞌikë kuríki kamabi bianan ꞌapun xubunua ꞌikë ñukama bixun buámiakëxa.

¹⁶ A nëtënbi ka Ezequíasnën anuxun Dios rabiti xubu xëkuë kamanua ami aín xëkuë ꞌati i nitsínkë ami takáshkakin ꞌamia kuri akamabi bixun Asirianu ꞌikë ꞌapu Senaquerib a buámiakëxa.

¹⁷ Usokin ꞌakëxunbi ka Asirianu ꞌikë ꞌapu Senaqueribnën, an ꞌapu Ezequías rabë́ ꞌimainun achúshi aín suntárunën kushikama abëa nuibanairakë akama këñun suntáru ꞌakánanti ꞌunáirabu akama Laquisnua Jerusalén ꞌatanun kixun xuakëxa. Xukëx kuanx ka Jerusalénnu bëbax anun uni nikë bai rapasua ꞌikë baka anuxun chupa chukakëx uxuira ꞌikë kakin anëkë anu bëbakankëxa.

¹⁸ Anu bukuxun ka anuxun ꞌapu anuisa kuanun kixun kamiakëxa, ꞌaínbi ka ax kuankinma ꞌapun Eliaquim Hilquías aín bakë bëchikë an ꞌapun xubunuxun ñu bërúankë, a ꞌimainun Sebná an kirika kuënëokë a ꞌimainun an kirika ꞌapu kikëbëtan kuënëokë Joah Asafnën bakë bëchikë akama atuinsa isi kuantanun kixun xuakëxa.

¹⁹ Xukëx kuanx anu bëbaia ka Asirio suntárunën kushi achúshitan atu kakëxa: —Ësokin kamina Ezequías kati ꞌain, ꞌapu kushiira, Asirianu ꞌikë ax ka ësai kiaxa: ¿Añumira katamëxun kaina ꞌëx kana uisaibi ꞌima kixun sinanin?

²⁰ ¿Min kaina upiti banakë ax isa ꞌakánanti ꞌunairakë usaribi ꞌikë kixun sinanin? ¿Uimi kaina ꞌën kakëxunbi ꞌaisama tankë ꞌaish katamëti ꞌain?

²¹ ꞌËn kana ꞌunanin Egiptonu ꞌikë unikamami kamina mitsux katamëisa tanin. ꞌAínbi ka usama ꞌikën atux ka uníxa tutishan xo tsënkakin bitsibi ami mënaxkikë usaribi ꞌikën. Usa ka ꞌapu faraón Egipto menu ꞌikë ax ami uni katamëisama ꞌikën.

²² Mitsun kamina ꞌë kati ꞌain: nukaman kananuna Nukën ꞌIbu Dios ishi rabin kixun, ¿uisa kupí kara Ezequíasnën anuxun mi bërámabi mitsun Dios rabiakama a rurupatankëxun, Judánu ꞌikë unikama ꞌimainun Jerusalénnu ꞌikë unikama atun Jerusalén nuxuinshia rabinun kixun kain?

²³ Usa ꞌain kamina ꞌën ꞌapu Asirianu ꞌikë abëtan usakinmi ñu ꞌati sinánti ꞌain: ꞌën kana mi dos mil caballo ꞌinánti ꞌain, minmi an nikinti uni mërakë ꞌain.

²⁴ Mix kamina an ñuumara ꞌikëbi abámikin asirionu ꞌikë suntárunën kushikama abámikin ꞌaisama ꞌain, Egiptonu ꞌikë unikama amimi mitsux katamëkë anuax ꞌakánanti akama ꞌinánan caballokama ꞌinánkëxunbi.

²⁵ Nux kananuna ënë ëma ꞌai uan, usa ꞌain kamina mitsun Diosan ka atu ꞌakinia kixun sinántima ꞌain. ¡An ka nukaman masókin atu ꞌanun xuaxa kixun kamina Ezequías kati ꞌain!

²⁶ Usakian kakëxun ka Eliaquim, Sebná ꞌimainun Joah akaman asirionu ꞌikë suntárunën kushikama kakëxa: —Nu kamina arameo banan kati ꞌain, nun kananuna atun bana kuati usa ꞌain. Nu kamina hebreo banan katima ꞌain, axa anun ëma kënëara tanain ꞌikë unikaman ka kamaxunbi kuatia.

²⁷ Ësai kiabi ka Asirionu ikë suntárunën kushi achúshinën kakëxa mitsun ꞌapu ësokin kanun ka Asirianu ꞌikë nun ꞌapun nu xuaxa; axa anun ëma kënëara anu ꞌikë unikama anribi ka mitsun ꞌakësaribi okin atun puibi pianan atun insúnbi xëanuxun ꞌaia.

²⁸ Ësokin katankëx ka suntárunën kushi niruax hebreo banan munuma kuënkëni kiakëxa: —Kamina kuakanti, ꞌain ësai ka kushiira ꞌapu Asirianu ꞌikë Senaquerib ax kiaxa:

²⁹ Ezequíasnën mitsu paránun kamina ꞌamitima ꞌain; an ka ꞌën suntárukamabëtan ꞌaia mitsu ꞌakinkasmati ꞌikënꞌ

³⁰ A mi katamëtia ka Diosan nu ꞌakinti ꞌikë kixun Ezequíasnën mitsu kati ꞌikën: Asérabi ka Diosan nukama ëñëmikin ꞌakinti ꞌikë kixun kakian; ënë ëma ka Diosan Asirianu ꞌikë ꞌapun aín suntárukamabëtan ꞌatima ꞌikë kixun,

³¹ kakëxunbi kamina aín bana kuakantima ꞌain. Asirianu ꞌikë ꞌapun ka ësokin mitsu kanun ꞌë xuaxa abë nuibanani mëníonantankëx atubë ꞌikin ismina, aín uvas ꞌapákë ꞌanan higuera akama pianan atun xëatia me naëxun ꞌamikë ꞌumpax aribi xëakanti ꞌai ka kiaxa.

³² Usai ꞌia kana achúshi me upíira mitsun mesaribi anua trigo pán ꞌati a ꞌimainua uvas aín baka xëati, ꞌianan anua olivos bimi aín xëni biti ꞌimainun, buna rëpa ꞌaisamaira ꞌikë ꞌën nëtë anu mitsu uanti ꞌain. Usa ꞌain kamina anuax bamaima mitsux upitax tsókanti ꞌain. Usa ꞌain kamina Ezequíasnën mitsu paránkin Diosan ka nu ꞌakinti ꞌikë kixun kakëxunbi aín bana kuakantima ꞌain.

³³ ¿Bëtsi ëmanuxun unin rabikankë dioskama an kara Asirianu ꞌikë ꞌapun aín suntáru ꞌamia mitsu ꞌakinti ꞌik?

³⁴ ¿Uinu kara Hamat ëmanua tsóa unikaman dios a ꞌimainun Arpad ëmanua ꞌikë unikaman dios ꞌik? ¿Uinu kara Sefarvaim, ëmanu ꞌimainun, Henánu ꞌianan Ivá kakë ëmanu ꞌikë dios axribi ꞌik? ¿A dioskaman kara Asirianu ꞌikë suntárukaman ꞌaia Samarianu tsókë unikama ꞌakinti ꞌik?

³⁵ ¿Uinu ꞌikë mekamanu ꞌikë diosan kara ꞌapu Senaqueribnën aín suntárukamabëtan ꞌaia ꞌakinti ꞌik? Mitsun kamina sinántima ꞌain Diosan ka Jerusalén ëmanu tsotia mitsu ꞌakinti ꞌikë kixun.

³⁶ Ësokian kakëx ka anun ëma kënëarakënua ꞌikë unikamax uisa bana banakama ꞌikën, ꞌapu Ezequíasnën banaiabi atu uisakinbi kaxuma ꞌanun kixun kakë ꞌaish.

³⁷ Usa ꞌain ka Eliaquim an ꞌapun xubunuxun ñu bërúankë a ꞌimainun Sebná an kirika kuënëokë a ꞌianan, an ꞌapu kikëbëtan kirika kuënëokë Joah akaman ꞌatimokin sinani nishkin, atun chupa tukabiani ꞌapu Ezequías isanan usakian Asirionuax ukë suntárunën kushikaman kakë akama ñuixuni kuankëxa.