2 Reyes 13 - Kashibo-Kakataibo Biblia

Eliseo ashikin usaia ñukama ꞌiti ñuitankëx ñua ñuikë bana

¹⁴ Eliseo axa ꞌinsínkë ꞌaish ñutisa rakatan ka, Joás Israel unikaman ꞌapu ax a isi anu kuankëxa, kuanxun ka ꞌikúkin bitsi inkin kakëxa: —¡ꞌËn papa ꞌibusa ꞌikë kana mi nuibakin kain, mix kamina Israel suntárukamasamaira kushiira ꞌiakën ꞌia ꞌaíshbi kamina ësaira rakatan!

¹⁵ Kakëxun ka Eliseonën kakëxa: —Kanti achúshi këñun kamina pia itsi biti ꞌain. Kakëxun ka ꞌapun kanti achúshi bianan piaribi biakëxa.

¹⁶ Bitsia ka Eliseonën kakëxa: —Anun bëëkakin pia ninun kamina min kanti kanuti ꞌain kakëxa. Kakëxuan ꞌapun kanti bëëkamainun ka Eliseonën, aín mëkënribi anua ꞌapun kanti bëëkakin tuinkë anubi aín mëkën nankin,

¹⁷ kakëxa: —Anun buánxun isti xëputi chukúma amiaxa bari urukë amia ꞌikë a kamina xëókati ꞌain. Kixun kakëxun xëókaia ka ꞌapu Eliseonën kakëxa: —Bërí kamina, ¡Kanti bëkakin pia niti ꞌain! Kakëxun ka ꞌapun pia kanti niakëxa. Nikëbë ka Eliseo munuma kuënkëni kiakëxa: —¡Min pia ënëmi katamëti kamina Diosan ꞌimikëx ië́ti ꞌain! ¡Pia ënën ka Israelkaman Siria unikama kupitanuma ꞌati ꞌikën! ¡Min kamina sirio unikama Afec, kakë ëmanuxun kupitanuma këñukin ꞌati ꞌain!

¹⁸ Usai pain kitankëxun ka Eliseonën ꞌapu kakëxa: —Pia raíri a kamina biti ꞌain. Kakëxua pia bitsia ka ꞌapu Eliseonën kakëxa: —Bërí kamina pia mi bikë anun me rishkiti ꞌain. Kakëxun rabë́ ꞌimainun achúshi okin me rishki ka ꞌapu anu nirakëakëxa.

¹⁹ Usakin ꞌaia anubi nirakëtia ka an Dios kikë bana ñuikë unin nishkin ꞌapu kakëxa: —Mapai achúshi okin ꞌanan achúshi okin me rishkixun kamina min sirio unikama kamabi këñukin ꞌatsían; ꞌaínbi kamina rabë́ ꞌimainun achúshi okinshi min atu ꞌanuxun ꞌain.

²⁰ Ñukëa Eliseo maínkan ꞌain ka baritsi baritsi inúkëbë, an ñu mëkamakë moabita unikama Israel me kamanu atsíankëxa,

²¹ nëtë itsin ka uiti Israel unikamax kara achúshi uni ñukë maínti buani kuankëxa, ꞌaínbi ka an aín ꞌibu ꞌatankëxun ñu mëkamakë unikama rikuatsinia isi atumi rakuë́ti abákin anu Eliseo ñukë maían kini anu uni ñukë a nipabiani abákankëxa. Usakin ꞌakëx ka uni ñukë ax anu Eliseo ñukë maían aín xo kamami tikishi uinakëti baiski nitsi niruakëxa.