2 Pedro 3 - Kashibo-Kakataibo Biblia

Nucën ꞌIbu Jesucristo utëcënti ñui quicë bana

¹ ꞌËn nuibacë xucë́antu, bëtsi quirica pan buánmixunbi cana ënë quiricaribi mitsu buánmin. Quirica buánmiquin cana asérabi Jesucristomi sináncë ꞌixunmi aín banacama manuquinma upí oquin sinánun mitsu ꞌësëan.

² An Nucën Papa Dios quicë bana uni ñuixuncë unicaman Jesucristo ñui quiá banacama a manuquinma sinánan, camina Nucën ꞌIbu Jesucristo, an Nucën Papa Diosnan ꞌinun uni ië́micë, an aín bana ñuixunun caíscë unicaman mitsu ñuixuncë banaribi manuquinma sinánti ꞌain.

³ Ësoquin camina ꞌunánti ꞌain, anúan Jesucristo utëcënti nëtëa ꞌurama ꞌain ca ꞌitsa uni aín cuëëncë ñuishi ꞌai, anun Jesucristonan ꞌiti bana ꞌatimaquin ñui, ami cuaiti ꞌicën.

⁴ Cuai ca quiti ꞌicën: —Jesús ca utëcënti ꞌicë quiáxa uni quiá ꞌaínbi ca ucëma ꞌicën. Nucën raracama bamacëbëa ꞌiásabi oi ca camabi uni bamaia, ꞌimainun ca nëtë ióñua ꞌiásabi camabi ñu ꞌia.

⁵ A unicaman ca sinántisama tania, Nucën Papa Diosan usai ca ꞌiti ꞌicë quixun cacëxëshi ca naicamëꞌëo ꞌimainun bacacama, anua racátinubi racámainun, mecamaribi anubia ꞌiti anu ꞌiacëxa.

⁶ Usaia ꞌiá ꞌicëbi ca Nucën Papa Diosan sinanëinshi mapuquin, bacan ënë menu ꞌicë ñucama cëñuacëxa.

⁷ Usa ꞌaínbi ca naí ꞌimainun mecama anúan Nucën Papa Dios quicëbëtainshi tsin cëñuti nëtë utámainun usabi ꞌiti ꞌicën. A nëtën ca an ñu ꞌatima ꞌacë unicama Nucën Papa Diosan uisa cara oti ꞌicë usoquin ꞌati ꞌicën.

⁸ ꞌËn nuibacë xucë́antu, camina manuquinma ësaquin sinánti ꞌain, Nucën ꞌIbu Diosan, an nëtë́timoi tsócë ꞌixun, tancëx ca nun nu tancë achúshi nëtëx mil barisa ꞌicën. Usaribiti ca nun nu mil barisa tancë ax Nucën Papa Diosan tancëx achúshi nëtësa ꞌicën.

⁹ Usa ꞌain ca —ca uti ꞌicë quiá ꞌaíshbi ca Jesucristo xënibutia —quiáxa uni quicë ꞌaínbi uti ꞌixúnbi Jesucristonën achúshira uníxbia ainanma ꞌaish castícancë ꞌiti cuëënima, camabi unia sinanati ami catamëti cuëënia.

¹⁰ Usaquin caíntancëx ca unin sinánmabi, an ñu mëcamacë uni imë́ ucë usaribiti unían sinánmabi Jesucristo uti ꞌicën. A nëtë ucëbë ca canacamëꞌëo ꞌicësaía anuax banacëbë naíu ꞌicë ꞌuxë, bari, ꞌispa acama, manë tsin cëñumainun anu ax ꞌiti ꞌaíma ꞌiti ꞌicën. Usaribiquin ca camabi mecëñun anua ꞌicë ñucamaribi tsin cëñuti ꞌicën.

¹¹ Usai ca ñucama cëñúti ꞌicë quixun sinani camina Nucën Papa Dios quicësabi oi ꞌi uisaíbi ꞌuchaima bucuti ꞌain.

¹² Usa ꞌain camina Jesucristo Nucën Papa Diosan mëníosabi oi uti caínquin unicama sinanatia ami catamënun ꞌaquinti ꞌain. A nëtën ca naíu ꞌicë ꞌuxë, bari, ꞌispa acama manë tsin rëquiruquin tsatsacacësa ꞌiti ꞌicën. Usai ꞌicëbë ca anua usa ñucama ꞌicë axribi manë tsin cëñucë ꞌiti ꞌicën.

¹³ Usaía ñu ꞌiti ꞌaínbi cananuna Nucën ꞌIbu Dios quiásabi oía me ꞌimainun naí ió ꞌiti cainin. Anu ca uisa ꞌuchabi ꞌaíma ꞌiti ꞌicën.

¹⁴ ꞌËn nuibacë xucë́antu, usaía ꞌiti caíncë ꞌaish camina Nucën Papa Diosan ꞌuchañumarua isanan uisa ñu ꞌatimabi ꞌacëma isti cupí ñu ꞌatima ꞌaíma unicamabë nuibananishi upitax bucuti ꞌain.

¹⁵ Camina ꞌunánti ꞌain, axa ainan ꞌiticama camabi aín ꞌucha tërë́ncë ꞌinun ami catamënun quixun ca Nucën ꞌIbu Jesucristonën cainia. Nucën Papa Diosan sinánmicësabi oquin ca abë́nu nuibanancë nucën xucën, Pablonënribi quirica buánmiquin, usaribi oquin mitsu caxa.

¹⁶ A mitsu buánmicë quiricacamanu ca Pablonënribi ꞌën cacësa ësaribi oquin mitsu caxa. A bana raírinëx ca unían upí oquin cuaisama ꞌicën. Usa ꞌain ca an Nucën Papa Diosan bana upí oquin ꞌunáncëma uni ꞌimainun axa upiti ami catamëcëma unin, uisai quicë cara a bana ꞌicë quixun upí oquin sinánquinma bëtsi oquin sinania. Pablonëan cuënëocë quiricaishima, bëtsi banaribi upí oquin sináncëma ꞌixun bëtsi oquin sinani ca upiti Jesucristomi catamëti ꞌunanima.

¹⁷ ꞌËn nuibacë xucë́antu, ꞌën mitsu ñuixuncë ñu ꞌicëma pain ꞌain, ca usai ꞌiti ꞌicë quixun ꞌunani camina an ñu ꞌatima ꞌacë unicaman paráncëxmi Nucën Papa Diosan bana quicësabi oi ꞌiti ëntin rabanan bërúanracati ꞌain.

¹⁸ Nucën ꞌIbu Jesucristo an Nucën Papa Diosnan ꞌinun mitsu ië́micë, ax quicësabi oi ꞌiti ꞌunánquinbi camina bëríbi ꞌunáncësamaira oquin ꞌunánti ꞌain. ꞌUnánan camina an ca mitsu nuibatia quixun ꞌunani ainainra ꞌiti ꞌain. Bërí ꞌacësaribi oquin ca usabi oquin nëtë xënibua ꞌaínbi camabi aín unicaman a rabiti ꞌicën. Ashi, Pedro.