2 Pedro 2 - Kashibo-Kakataibo Biblia

An Nucën Papa Diosan banama, bana itsi ñuixuncë uni ñui quicë

¹ Usa ꞌaínbi ca ꞌiacëxa, uni raíri, an —Nucën Papa Dios ca usai quia —quixun cëmëquin anbi sináncë bana nucën raracama ñuixuncë. Usaribiti ca an mitsu bana ñuixunti uni cëmëquin parani mitsubë ꞌiti ꞌicën. Atúnbi sinánxun ca Nucën Papa Diosan banamabi ꞌatima bana ñuixunquin, Nucën ꞌIbu Jesucristo ami catamëtia uni Nucën Papa Diosnan ꞌiti, ami catamëaxma ꞌinun quixun ñuixunquin uni sinanamiti ꞌicën. Usaquin ꞌacë ꞌaish ca a unicamax bënëtishi cëñúti ꞌicën.

² A unicaman ꞌaia isquin ca ꞌitsa unin usaribi oquin ñu ꞌatima ꞌati ꞌicën. Atúxa usai ꞌicë cupí ca uni Jesucristo ñuicë bana ñui ꞌatimati banati ꞌicën.

³ A unicaman ca mitsun curíqui biti cupíshi cëmëquin paránquin Nucën Papa Diosan banamabi, anbi sináncë bana mitsu ñuixunti ꞌicën. Usaquian ꞌacë cupí ca ië́tima cëñúti ꞌicën, usai atux ꞌitia Nucën Papa Diosan mëníosabi oi.

⁴ Nucën Papa Diosan ca axa ꞌuchacë ángelcama aín ꞌucha tërë́nquinma aín nëtënua chiquínquin anúan an camabi uni isti nëtë utámainuan, anu atux tëmërai ꞌiti, bëánquibucënu manë risin tëcërëcacësa ꞌaish anubi ꞌinun ꞌimiacëxa.

⁵ Usaribi oquin ca Nucën Papa Diosan nëtë ióñu, an aín bana cuacëma unicama atun ñu ꞌatima ꞌacë tërë́nquinma camabi me mapumiquin baca cëñumiacëxa. Usonan ca an ami sinánun aín bana ñuixuncë, Noé, acëñun mëcën achúshi ꞌimainun rabë́ unishi Nucën Papa Diosan ië́miacëxa.

⁶ Usonan ca Nucën Papa Diosan ëma rabë́, Sodoma ꞌimainun Gomorra cacë, ꞌimainun anu ꞌicë unicamaribi atun ñu ꞌaisama ꞌacë cupí aín chimapuishi ꞌitánun nëancëxa. A bana cuatía an ñu ꞌatima ꞌacë unicama ñu ꞌatima ꞌatimi racuë́ti oquin ca Nucën Papa Diosan usoquin Sodoma ꞌimainun Gomorra ꞌacëxa.

⁷ Sodomacëñun Gomorra nënquinbi ca Nucën Papa Diosan Lot cacë uni, axa upí ꞌaish unicaman ñu ꞌatima ꞌaia isi masá nuitucë, a ië́miacëxa.

⁸ Ax atubë ꞌaish ca Lot aín nuitu upí ꞌaish a ëma rabë́nu ꞌicë unicaman ñu ꞌatima ꞌaia isanan cuati, camabi nëtën masá nuituacëxa.

⁹ A unicama atun ꞌucha cupí Nucën ꞌIbu Diosan ꞌatimocëbëbia Noé ꞌiásaribiti Lot ië́a, a sinánquin cananuna ꞌunánti ꞌain, Nucën ꞌIbu Diosan ca axa ami catamëti ax quicësabi oi ꞌicë unicama, uisa ñu cara ꞌicëbëtanbi ië́miti ꞌicë quixun. Usonan ca an ñu ꞌatima ꞌacë unicama ië́miquinma, anúan an camabi uni isti nëtë utámainun tëmëranun ënti ꞌicën.

¹⁰ Nucën ꞌIbu Diosan ca anbia masáquin sináncë ꞌixun ñunshínquin ꞌatima ñu ꞌanan aín bana cuacëma unicama asérabi uisoquin cara ꞌati ꞌicë usoquin ꞌati ꞌicën. A unicaman ca rabínquinma ax cuëëncësa oquinshi ñu ꞌaisama ꞌanan, ami racuë́quinma Nucën Papa Diosan ꞌimicë ꞌicëbi unin cushicamaribi ꞌatimaquin ñuia.

¹¹ Ax atubëtan sënë́nma ꞌaish cushiira ꞌixunbi ca ángelcaman, axa usai quicë unicaman ꞌacësaribi oquin, cushicama ꞌatimaquin ñuiquin Nucën ꞌIbu Dios caima.

¹² Ënë unicamax ca sinánñuma ꞌixuan ñuinacan, uisa cara oia quixun sinánquinmabi, ñu ꞌacësaribi oquin ꞌanan ñuinanëxa mëraquian unin ꞌanúnbi nicësa, usaribi ꞌicën. Atux ca an ꞌunáncëma ñu ñui ꞌatimati banaia. Usa ꞌaish ca ñuina bamacësaribi bamati ꞌicën.

¹³ An bëtsi uni tëmëramicë cupí ca usaribiti tëmërai bamati ꞌicën. Atun ca —camabi nëtën nun cuëëncë ñu ꞌai cananuna cuëëinshiti ꞌai —quixun sinania. ꞌAisama ñu ꞌatishi sináncë ꞌaish ca usai ꞌi cuëënia. Mitsux Nucën Papa Dios rabinux timë́cë ꞌain, mitsubëtan pibi ca atux ñu ꞌatima ꞌai cuëënia. Ax ca ꞌaisama ꞌicën. Usa ꞌaish ca a unicamax axa Jesucristomi sináncë unisama ꞌicën.

¹⁴ Usa ꞌaish ca xanu isíma isímashi anun cuëënia, aín ꞌucha ëníma ca amiribi amiribi ꞌuchaia. Atúxa ꞌicësaribitia ꞌinun ca axa Jesucristomi upiti sináncëma xanu ꞌimainun bëburibi sinánmia. Ax ñun cuëën ꞌaish ca ꞌitsa ñuñu ꞌiti cuëënia. A unicama ca Nucën Papa Diosan aín ꞌucha cupí uisoquin cara ꞌati ꞌicë, usoquin ꞌati ꞌicën.

¹⁵ A unicaman ca Nucën Papa Diosan bana quicësabi oquin ꞌaquinma ñu ꞌatima ꞌaia. Usa ꞌaish ca Balaam, Beornën bëchicë, axa ꞌiásaribiti ꞌia. Balaanën ca an Nucën Papa Dios quicë bana uni ñuixuncë uni ꞌixunbi curíqui biti sinánxun ñu ꞌatima ꞌati sináncëxa.

¹⁶ An cacëxunbia aín bana cuacëma cupí ca Nucën Papa Diosan, ñu ꞌatima ꞌaxunma ꞌanun quixun anúan cuancë aín burro bëaracëxa. Bëaracëx Nucën Papa Diosan ꞌimicëx, uni ꞌicësari banaquin, ca aín burron Balaam sinanamiacëxa. A unicamax ca Balaam ꞌiásaribiti ꞌia.

¹⁷ Uni raíri ꞌaquincëma ꞌaish ca xëxá ësquiaxa ꞌunpáxñuma ꞌicësa ꞌianan ꞌuí ꞌibúnux nëtë bënamëtiabi suñun bëcacëx nëtë́cësa, usaribi ꞌicën. Usa ꞌaish ca anua atux tëmërai ꞌiti bëánquibucëira anu nëtë́timoi xënibua ꞌaínbi ꞌiti ꞌicën.

¹⁸ Usa unicaman ca axbi cërúanan rabiacati sinánñumasa ꞌixun, an ꞌacësaribi oquian ñunshínquin ñu ꞌatima ꞌanun quixun, an ñu ꞌatima ꞌati ëinsa tancë uni raíri sinanamitëcënia.

¹⁹ Usoquin ꞌaquin ca caia, uisari caramina ꞌiisa tani usai camina ꞌiti ꞌain. Usaími ꞌiabi ca Nucën Papa Diosan mi uisabi oima. Usai quicë ꞌixunbi ca atun ñu upí ꞌaisa tanquinbi ꞌatima ꞌicën, atun sinan upíma ꞌixun. Aín sinan upí ꞌixun ca unin aín ꞌacësabi oquin upí ñu ꞌaia. Usa ꞌaínbi ca aín sinan ꞌaisama ꞌixun unin usabi ꞌatima ñu ꞌaia.

²⁰ Ënëx ca ësa ꞌicën: Ui unicaman cara Nucën ꞌIbu Jesucristomi catamëquin ñu ꞌatima ꞌati ëncë ꞌixunbi amiribishi ñunshínquin ñu ꞌatima ꞌatëcënia, a unicamax ca bëráma ꞌiásamaira ꞌinun ꞌuchaia.

²¹ Jesucristomi catamëcë ꞌixunbi ëncë ꞌaish an ꞌunáncëma unicamax ꞌicësamairai ꞌuchatima cupí Jesucristomi sinanima ꞌitibi ca a unicama ꞌia.

²² Usaquian upí ꞌiti ëncë unicamax ca unia ësai quicësa ꞌicën: “Camunan ca quinántancëxunbi amiribishi aín quinan pitëcënia. Usaribiti ca cuchi nashitancëxbi me chabánu racátëcëni chuatëcënia”.