2 Pedro 1 - Kashibo-Kakataibo Biblia

Pedronëan axa Jesucristomi catamëcë unicama quirica cuënëoxuan

¹ ꞌËx cana Simón Pedro, ax cuëëncësabi oquin ꞌanan aín bana uni ñuixunuan Jesucristonën caísa ꞌain. An nu ië́micë Jesucristo, axbi Nucën Papa Diosribi ꞌaish upí ꞌixuan nu ꞌacësaribi oquin ainan ꞌinun ië́micë, mitsu cana ënë quirica buánmin.

² Mitsux Nucën Papa Dios ꞌimainun Nucën ꞌIbu Jesús an ꞌunánmicë ꞌaíshmi mitsúxmi ꞌicësamaira oi chuámarua ꞌaish bucucanti cana cuëënin.

Uisai cara axa Cristomi catamëcë unicama ꞌiti ꞌicë quicë bana

³ Nucën Papa Dios cushiira ꞌianan aín nuitu upíira ꞌixuan an nu ainan ꞌaish asaribi ꞌinun caíscë, an ca uisaira cara aín cushi ꞌicë quixun nu ꞌunánmiquin anúnu upitax ꞌiti ꞌimainun anúnu ax cuëëncësa oi ꞌiti a nu ꞌinánxa.

⁴ Ainan ꞌimiquin ca aín bana ꞌinánquin Nucën Papa Diosan uisaira oquin cara nu ꞌaquinti ꞌicë quixun nu ꞌunánmia. Usaquian ꞌunánmicëx, a banami catamëti camina an sinánmicësabi oquin sinánan uni itsían ñunshínquin ñu ꞌatima ꞌaia isquinbi, usaribi oquin ꞌaquinma upí ñuishi sinánti ꞌain.

⁵ Usai mitsux Nucën Papa Diosmi catamëcë ꞌixun camina upí ꞌixun ënquinma ñu upíshi ꞌati sinánquin ꞌati ꞌain. Upí ñu ꞌacë ꞌixun camina Nucën Papa Dios cuëëncësabi oi caramina uisai ꞌiti ꞌai quixun ꞌunánti ꞌain.

⁶ Usai ꞌiti ꞌunáncë ꞌixun camina ñu ꞌaisama ꞌaisa tanquinbi tënëanan cushixun Nucën Papa Diosan a ꞌanun mitsu ꞌináncë ñu asérabi ꞌati ꞌain. Usaquin ꞌacë ꞌixun camina mitsumi uisa ñu cara ꞌicëbëtanbi bënë́quinma tanshiti ꞌain. Usaquin ꞌai camina Nucën Papa Diosmi asérabi sinánti ꞌain.

⁷ Usaquin sináncë ꞌaish camina bëtsibë nuibananti ꞌain. Usai ꞌiquin camina camabi uni nuibati ꞌain.

⁸ Asérabi usai ꞌi camina an uni itsin Jesucristomi sinánun ꞌaquincëma unisa ꞌitima ꞌain. Usai ꞌi camina ñancábimi Nucën ꞌIbu Jesucristomi sináncë ꞌitima ꞌain.

⁹ Usa ꞌaínbi ca axa usai ꞌicëma uni ax bëxuñu unisa ꞌianan a ñubi sináncëma unisa ꞌicën. Usa ꞌixun ca aín ꞌucha ca tërë́ncë ꞌicë quixun sinanima manúaxa.

¹⁰ ꞌËn xucë́antu, usa ꞌain Nucën Papa Diosan ainan ꞌiti caíscë ꞌaish camina an cacësabi oi ꞌinux bërúanracati ꞌain. Usa ꞌiquin camina Nucën Papa Diosmi sinánti ënquin ñu ꞌatima ꞌatima ꞌain.

¹¹ Usai ꞌitancëx camina Nucën ꞌIbu Jesucristo, an nun ꞌucha tërë́nquin Nucën Papa Diosnan ꞌinun nu ië́micë, an mëníosabi oi asérabi aín nëtënu abë cëñútimoi ꞌiti ꞌain.

¹² Uisai caramina Nucën Papa Dios cuëëncësabi oi ꞌiti ꞌai quixun ꞌunani camina usai ꞌin. Usaími ꞌiabi cana ënímami mitsux ꞌicësabi oi ꞌinun sinánmitëcënti ꞌain, manúti rabanan.

^13-14 Nucën ꞌIbu Jesucristonën ꞌunánmicëxun cana ꞌunanin, ꞌën bamati nëtë ca ꞌurama ꞌicë quixun. Usa ꞌain ca ꞌën sináncëx bamaquin ënë nëtë ëncëma pan ꞌixuinshi ënë ñucama ꞌën mitsu sinánmitëcënti asábi ꞌicën.

¹⁵ ꞌËx bamacëbëtanmi ënquinma usabi oquin ꞌanun quixun cana ënë banacama mitsu cuënëoxunin.

An Nucën ꞌIbu Jesucristonën aín cushínbi ñu ꞌaia isa unicama

¹⁶ Nucën ꞌIbu Jesucristonën cushi ñuixuanan aín utëcënti ñuiquin nun mitsu cacë bana ax ca unían anbi sinánxun ñuicë banama ꞌicën. Nucën bërúnbi cananuna Nucën ꞌIbu Jesucristonëan aín cushínbi ñu ꞌaia isacën.

¹⁷ Usaquin iscë ꞌixun cananuna camabi unin ꞌunánuan, a ñui, Nucën Papa Dios ësai quia cuacën: “Ënëx ca ꞌën nuibairacë ꞌën Bacë Bëchicë ꞌicën, a cupí cana chuáma tani cuëënin” —quiax.

¹⁸ Anua Nucën Papa Diosan cushi ꞌain cananuna matánu Nucën ꞌIbu Jesúsbë ꞌixun, Nucën Papa Dios naínuax usai Jesucristo rabi quia asérabi cuacën.

¹⁹ Usai banaia cuaquin cananuna ꞌunáncën, an Nucën Papa Dios quicë bana uni ñuixuncë unin cuënëo bana quiásabi oi ca Jesucristo ꞌiaxa quixun. Mitsúnmi upí oquin a bana sinánti ca asábi ꞌicën. Lamparinën bëánquibucënuxun pëcacëbëtan cananuna xubunu ꞌicë ñu upí oquin isquinmabi isin. Usaquin isquinbi cananuna barían pëcacëbëtainra upí oquin isin. Usaribi oquin camina a unicaman bëráma cuënëo bana ꞌunánquinbi asérabi mitsun nuitunubi Cristo ꞌicëbëtainra, uisai cara a bana quia quixun upí oquin ꞌunánti ꞌain.

^20-21 An Nucën Papa Dios quicë bana uni ñuixuncë unicama ca anbi sináncë bana unicama ñuixuanma ꞌicën. Ax asérabi aín Bëru Ñunshin Upitan sinánmicë ꞌixun ca Nucën Papa Diosmi upiti catamëcë ꞌixun ax cuëëncësabi oquin bana ñuixuancëxa. Usa ꞌain camina asérabi ꞌunánti ꞌain, unin ca anbi sinántancëxun Jesucristo ñuiquin bana cuënëoma ꞌicë quixun.