2 Juan 1 - Kashibo-Kakataibo Biblia

Cristo cuëëncësabi oi ꞌiti ꞌimainun unicama nuibati bana

¹ ꞌËx axa Jesucristomi catamëcë unicaman cushi ꞌixun cana mixmi Nucën Papa Diosan ainan ꞌinun caíscë xanu ꞌicë, ꞌën asérabi a nuibacë min tuácamacëñun, ënë quirica an Nucën Papa Diosan bana ꞌacë unicamabëtan, mi cuënëoxunin.

² Ainan ꞌaíshnu xënibua ꞌaínbi abë ꞌiti Jesucristo, a cupí cananuna mitsu nuibatin.

³ Nucën Papa Diosan ca aín Bëchicë Jesucristobëtan nuibaquin mitsu ꞌaquinti ꞌicën. An ca asérabi an nuibaquin ꞌaquincëxmi chuámarua ꞌaish bucunun mitsu ꞌimiti ꞌicën.

⁴ Min tuá raírinën ca Nucën Papa Dios quicësabi oquin ꞌaia quixuan ñuicania cuati cana cuëëinra cuëëan.

⁵ Min ꞌunáncëma banama, Jesucristomi catamëtabaquinu cua, a banabi cana mi ñuixuntëcënin. A bana quicësabi oi cananuna bëtsibë bëtsibë nuibananti ꞌai quixun cana mi cain.

⁶ Asérabi Nucën Papa Diosmi sináncë unin ca axa quicësabi oquin ꞌaia. Aín banax ca quia, camina bëtsibë bëtsibë nuibananti ꞌai quiax. Jesucristomi catamëtabaquinmi cua, abi ca a bana ꞌicën.

An uni paráncë unicama ñui quicë bana

⁷ ꞌItsa unin ca camabi menu cuanquin uni paránquin —Nucën Papa Diosan Bëchicë ca uni ꞌinux uacëxa —quixun caquinma, bëtsi bana ñuiquin uni parania. Usa unix ca an uni paráncë ꞌianan an ꞌatimaquinra Cristo ñuicë uni a ꞌicën.

⁸ Usa ꞌaínbi ca an mitsun a ꞌati ꞌináncë ñucamami ax quicësabi oquin sënë́onquin ꞌaia a cupí aín nëtënuxun Nucën Papa Diosan an mëníosabi oquin mitsu ꞌimiti ꞌicën. Uisaira oquin cara ꞌimiti ꞌicë usoquian mitsu ꞌiminun camina an ꞌatimaquin Cristo ñuicë unían mitsu paránunma bërúanracati ꞌain.

⁹ Ui unin cara Cristonën bana quicësabi oquin ꞌaquinma ax cuëëncësa oquinshi ꞌaia abëma ca Nucën Papa Dios ꞌicën. Usa ꞌaínbi ca axa Cristonën bana quicësabi oi ꞌicë uni abë cuni Nucën Papa Dios ꞌimainun aín Bëchicë Jesucristo ꞌicën.

¹⁰ Ui unin cara mitsu isi cuanxun Jesucristo ñui quicë bana —ax ca asérabi ꞌicë —quixun ñuiquinma bëtsi oquin ñuia, a camina min xubunu atsínmima ꞌianan —caina uan —quixunribi catima ꞌain.

¹¹ Axa usa unibë nuibanancë uni an ca an ꞌacësaribi oquin ñu ꞌaisama ꞌaia. Usa ꞌaish ca ꞌaisama uni ꞌia.

Ashia Juanën cá bana

¹² ꞌËn mitsu a ñuiquin cati ñu ca ꞌitsa ꞌicën. ꞌAínbi cana tintan quiricanu cuënëoquin a ñucama mitsu ñuixuniman. Usa ꞌain cana mitsu isi cuanti sinanin. Cuanxun cuni cana mitsu ꞌën cuëbitanbi ñuixunquin cati ꞌain. Usa ꞌain cananuna camáxbi isánani, cánani chuámarua tani cuëënti ꞌain.

¹³ Nucën Papa Diosan atúxribia ainan ꞌinun caíscë min xucënan tuá atúnribi ca bërúanxmi ꞌinun quixun mi ꞌë camia. Ashi, Juan.