2 Corintios 9 - Kashibo-Kakataibo Biblia

Axa Jerusalénuax Cristomi catamëcë unicama buánmiti curíquia Pablonën ñuia

^1-2 Cana ꞌunanin, ꞌën cacëxunmabi camina mitsúnbi cuëënquin axa Jesucristomi catamëcë unicama curíqui buánmiti sináncancën. Usaquinmi sináncë cupí cana mitsu ñuiquin —bëtsi baritian ca Acaya menu ꞌicë unicaman curíqui timëti sinánxa —quixun Macedonia menu ꞌicë unicama cain. Usaquin ꞌën ñuia cuaquin ca Macedonianu ꞌicë unicaman mitsun ꞌacësaribi oquin ꞌati sinánxa.

³ Usa ꞌaínbi cana ꞌën mitsu ñuiquin atu cacë bana cëmë ꞌiti rabanan, ënë unicama mitsunu cuanun xutin, ꞌëx quicësabi oía mitsun curíqui mëníocë ꞌiti cupí.

⁴ Macedonianu ꞌicë unían ꞌëbë mitsunu cuanxun iscëxbi nun sináncësabi oquin mitsun ꞌacëma ꞌain cananuna rabínti ꞌain. A ñucama mitsun sináncësabi oquin ꞌacëma ꞌaish camina nux ꞌicësamairai rabíncanti ꞌain. Usaínu ꞌitima cupí cana ënë unicama mitsunu cuanun xutin.

⁵ Usa ꞌain cana ënë unicama atux pain cuanxuan, mitsun sinánsabi oquin curíqui timëti ꞌaquinun quixun rëcuë́onquin xuti sinan. Usoquin mitsun ꞌaia ca axa ꞌëbë cuancë unicaman ꞌunánti ꞌicën, nun sinánmicëxunmabi camina mitsúxbi cuëënquin curíqui Jerusalénu ꞌicë unicama ꞌinani quixun.

⁶ Ësa ca quixun camina sinánti ꞌain, an ñu bëru ꞌitsama ꞌapácë uni, an ca aín bimiribi ꞌitsamaribi bitsia. Usaribi oquin ca an ñu bëru ꞌitsa ꞌapácë uni an aín bimiribi ꞌitsa bitsia.

⁷ Usa ꞌain camina mitsúnbi mitsun nuitu mëu upí oquin sinántancëxun ꞌinánti ꞌain. Sinánquinbi ꞌinántisama tanquin camina ꞌinántima ꞌain. Usaribi oquin camina uni itsían mi cacëxuinshi ꞌinántima ꞌain. Nucën Papa Diosan ca an asérabi cuëënquin uni ñu ꞌináncë uni a nuibatia.

⁸ Nucën Papa Diosan ca camabi ñu anúnmi mitsux ami sinani cuëëni bucuti mitsu ꞌinánti ꞌicën. ꞌInánan ca anúnmi usaribi oquin bëtsi uniribi ꞌaquinun mitsu ꞌinánti ꞌicën.

⁹ Usa ꞌain ca axa ami sináncë uni ñui Nucën Papa Diosan bana cuënëo ësairibi quia: Upí oquin sinánxun ca ñuñuma uni ñonquinma ꞌitsaira ꞌinánxa. Usoquian ꞌacë a ca Nucën Papa Diosan manuquinma xënibua ꞌaínbi sinania.

¹⁰ Nucën Papa Dios, an ꞌapáti ñu bëru uni ꞌináncë, an ca ꞌapáxuan aín bimi piti oquin uni ꞌinania. Usaribi oquin ca anun uni itsi ꞌaquinti ñu mitsuribi ꞌinánti ꞌicën, camabi nëtë́nmi anun upí oquin uni ꞌaquinun.

¹¹ Usa ꞌain ca ñonquinmami anun uni itsi ꞌaquinun Nucën Papa Diosan camabi ñu mitsu ꞌinánti ꞌicën. An ꞌináncëxunmi mitsun buánmicë curíqui nun ꞌináncëxun biquin ca Jerusalénuaxa ax Jesucristomi catamëcë unicaman —asábi ca —caquin Nucën Papa Dios rabiti ꞌicën.

¹² Usoquin ꞌaquinquin cananuna anun aín cuëëncë ñuñu ꞌinun ꞌinanin. Usaquin ꞌinánquin cananuna —asábi ca —caquin rabia Nucën Papa Diosmi sinánun acama ꞌaquinin.

¹³ Usoquin mitsun ꞌaquincëxun ca a unicaman —mitsun camina Cristonan ꞌixun aín cuëëncësabi oquin ꞌai —quixun sinánquin Nucën Papa Dios rabiti ꞌicën. Rabianan ca mitsun camina atu ꞌimainun uni raíriribi ñonquinma ñu ꞌinani quixun sinánquin Nucën Papa Dios —asábi ca —cati ꞌicën.

¹⁴ Usaribi oquin ca, Nucën Papa Diosan nuibaquin ꞌaquincëxunmi mitsun curíqui ꞌináncë cupí, atun mitsu nuibaquin Nucën Papa Dios ñucáxunti ꞌicën.

¹⁵ ¿Nucën Papa Diosan aín Bëchicë achúshi nu ië́minuxa bamanun xuá, a sinani caranuna uisairai quiti ꞌain? A sinánquin cananuna cuëënquin —asábi ca —caquin ꞌitsaira rabin.