2 Corintios 8 - Kashibo-Kakataibo Biblia

II. AXA JERUSALENUAX JESUCRISTOMI CATAMËCË UNICAMA CURIQUI BUANMITIA PABLO QUIA (8.1-9.15) ꞌAquinsa ꞌicë uni upí oquin ꞌaquinti bana

¹ ꞌËn xucë́antu, mitsúnmi ꞌunánun cana mitsu caisa tanin, Macedonia nëtënu ꞌicë unicamax ca ainan ꞌaish ësai Nucën Papa Diosan sinánmicëx ꞌia.

² Amia uni nishmainun bëtsi ñu cupíribi tëmëraquinbi Jesucristomi catamëti ëníma ca chuámaruaishi ꞌaish bucuia. Chuámarua ꞌixun ca ñuñuma ꞌixunbi cuëënquin ñuñu unin ꞌacësa oquin curíqui ꞌinánxa.

³ ꞌËnbi cana uisoquin cara atun curíqui ꞌinánxa quixun ꞌunan. Cuëënquin ca a ꞌinánti a ꞌinánanbi ainan ꞌitia nancë aribi ꞌinánxa.

⁴ ꞌItsa oquin ca ësoquin nu caxa: —Nunribi cananuna axa Jerusalénuax Jesucristomi catamëcë unicama ꞌaquinquin curíqui ꞌinántisa tani —quixun.

⁵ Nun sináncësamaira oquin ꞌaquin ca Nucën ꞌIbu Jesús pain —nux minan ꞌixun cananuna mix cuëëncësabi oquin ꞌati ꞌai —quixun catancëxun Nucën Papa Diosan sinánmicësabi oquin nun bana cuanan nun nu Jerusalénu buánun atun curíqui nu ꞌinánxa.

⁶ Macedonianu ꞌicë unían ꞌacë sinánquin cananuna an bëráma mitsúnmi Jerusalénu buánmiti curíqui biquinbi sënë́onma cupí, a sënë́onquin bitsia isía cuanun quixun Tito xutin.

⁷ Raírinëan ꞌacësamaira oquin camina upí oquin sinani Jesucristomi catamëanan, Nucën Papa Diosan bana ꞌunánquin a bana uni ꞌunánmiti ꞌunánan, asérabi chiquíshquinma cuëënquin ñu ꞌanan, asérabi nu nuiban. Usaquin ꞌaxun camina raírinëan ꞌacësamaira oquinribi Jerusalénu ꞌicë unicama nuibaquin atu buánmiti curíqui timëquin nanti ꞌain.

⁸ Usoquin ꞌati cuëënquinmabimi ꞌanun quixun cana mitsu caiman. Macedonianu ꞌicë unicaman ca cuëënquin axa Jerusalénuax Jesucristomi catamëcë unicama curíqui ꞌinania quixunmi ꞌunánun quixuinshi cana mitsu can. Usoquin ꞌunánquin camina ꞌunánti ꞌain, caramina asérabi Jerusalénu ꞌicë unicama nuibati ꞌai quixun.

⁹ Uisaira oquin cara Nucën ꞌIbu Jesucristonën nu nuibatia quixun camina ꞌunanin. Mitsúxmi chuámarua ꞌianan aín nëtënu xënibua ꞌaínbi abë ꞌiti cupí ca ax aín Papan nëtë upí ëbëtsini ënë menu ñuñuma ꞌinux uacëxa.

¹⁰ Usa ꞌain cana ꞌën mitsu cacë cupímami mitsúxbi cuëënquin Jerusalénu ꞌicë unicama curíqui ꞌinánti sinan ꞌicë ësaquin mitsu cain: bëtsi baritian camina mitsun curíqui ꞌinánti sinani cuëëancën. Usaquin sinánxun atu ꞌinánti curíqui biquinbi camina sënë́oncanma ꞌain.

¹¹ Sënë́onma ꞌixun camina bërí sënë́oncanti ꞌain. Uiti curíquiñu caramina ꞌicanin, a camina mitsúnbi sinánquin, mësú ꞌinánti ꞌain. Mitsúxmi a ꞌati sinani cuëëansabi oquin sënë́onquin ꞌinani camina cuëëncanti ꞌain.

¹² Curíquiñu ꞌixun unin ꞌinántisa tanquin ꞌinánti ax ca Nucën Papa Diosan iscëx asábi ꞌicën. Usaribiti ca curíquiñuma ꞌixun unin ꞌinántisa tanquinbi ꞌináncëma, axribi Nucën Papa Diosan iscëx asábi ꞌicën.

¹³ Atu curíqui ꞌinántancëxmi mitsux curíquiñuma ꞌinun cana mitsu caiman. Mitsux ꞌicësaribitia atúxribi ñuñu ꞌiti cupíshi cana mitsu cain.

¹⁴ Usa ꞌain camina mitsux bërí ñuñu ꞌixun ñuñuma unicama ꞌinánti ꞌain. Usaribi oquin ca atúxribi ñuñu ꞌixun mitsu ñuñuma ꞌicë ꞌinánti ꞌicën. Usai ꞌi ca camabi uni ñuñu ꞌiti ꞌicën.

¹⁵ Usaribi oi ca Nucën Papa Diosan bana cuënëo ësai quia: “An piti ꞌitsa bicë, ainan ca tëxëcëma ꞌicën. ꞌImainun ca an ꞌitsamashi bicë, anribi pucháquin piaxa”.

Titocëñun abë ꞌicë unicama ñui quicë bana

¹⁶ Nucën Papa Diosan sinánmicëxun ca ꞌën ꞌacësaribi oquin Titon mitsu nuibaquin ꞌaquinsa tania. An usaquin Tito sinánmicë cupí cana Nucën Papa Dios —asábi ca —cain.

¹⁷ ꞌËn mitsu isi cuantánun cacëx ca axribi cuainsaira tani cuëëanxa. Usa ꞌaish ca ax cuëëncësabi oquin mitsu ꞌaquinuxun isi cuania.

¹⁸ Bëtsi uniribi —an ca upí oquin Cristo ñuiquin bana ñuixunia —quixuan camabi ëmanuxun ꞌunáncancë, aribi cananuna Titobë cuanun xutin.

¹⁹ A uni ca camabi ëmanuxun axa Jesucristomi catamëcë unicaman ënë ñu mëëti nu ꞌaquinia nubë cuanun caísaxa. Mitsúnmi usoquin ꞌináncë isquian unicaman Nucën ꞌIbu Jesús rabinun cananuna ënë curíqui bixun Jerusalénu ꞌicë unicama ꞌinani cuanin.

²⁰ Unían nunan ꞌinun a curíqui biisa sinánquin nu ñuiti rabanan ca a uni nubë cuania.

²¹ Nun cananuna ënë curíquicama mëcamaquinma upí oquin buánti ꞌai quixun Nucën ꞌIbu Diosan ismainuan unicamanribi ꞌunánti cananuna cuëënin.

²² Tito ꞌimainun ꞌën mitsu ñuixuncë uni, acëñun cananuna bëtsi uniribi mitsunu cuanun xutin. Ax ca Cristomi catamëcë ꞌaish nun xucën ꞌixun nu upí oquin ñu ꞌaxúanxa. Mitsun camina Jerusalénu ꞌicë unicama curíqui buánmisa tani quixun ꞌunani ca axribi mitsu ꞌaquini cuainsa tania.

²³ An ꞌunáncëma unicaman —ui cara Tito ꞌicë —quixun ñucácëxun camina cati ꞌain, —an Pablobëtan ñu mëëquin mitsu ꞌaquinti uni ca ax ꞌicë —quixun. Canan camina abë cuancëcamaribi ñuiquian —ui cara —quixun ñucácëxun cati ꞌain, acamax ca axa Jesucristomi catamëcë unicaman xucë́xa cuancë ꞌicë quixun. Cristonën ꞌimicë ꞌixuan atun upí oquin ñu ꞌaia isquin ca —usa ca Cristonën uni ꞌicë —quixun camabi unin ꞌunania.

²⁴ Usa ꞌain camina ënë unicama upí oquin biti ꞌain. Mitsun usaquin ꞌaia cuaquin ca camabi ëmanuaxa ax Jesucristomi catamëcë unicaman ꞌunánti ꞌicën, mitsun camina acama nuibati quixun. ꞌUnánan ca nux mitsu ñui quicë bana ca asérabi ꞌicë quixun ꞌunánti ꞌicën.