2 Corintios 7 - Kashibo-Kakataibo Biblia

¹ ꞌËn nuibacë xucë́antu, a banacama nun cuanun ca Nucën Papa Dios quiacëxa. A banacama ꞌunánquin cananuna nun sinanën upíira oquin sinánan nun nuituribi upí ꞌianan nun ꞌacë ñuribi upí ꞌinun camabi nëtën bërúancati ꞌain. Usai ꞌi cananuna aín bana cuati ainanshi ꞌaish ax cuëëncësabi oíshi ꞌiti ꞌain.

Corintonu ꞌicë unicamaxa sinana bana

² Mitsun nuitunënbi camina upí oquin sinánquin nu nuibati ꞌain. Mitsu achúshibi cananuna uisa ocëma ꞌain, mitsu achúshibi cananuna ꞌatimaquin sinánmicëma ꞌain, mitsu achúshibi cananuna paráncëma ꞌain.

³ ꞌUchoquin cana mitsu caiman. Bëráma cacësabi oquin cana mitsu catëcënin, cana ꞌaisamaira mitsu nuibatin. Mitsux cuëëncëbë cana ꞌëxribi cuëënin, mitsux masá nuituti tëmëracëbë cana ꞌëxribi masá nuituti tëmëracësa ꞌain.

⁴ Mitsun camina upí oquin ꞌai quixun sinani cana cuëënin. Usa ꞌaish cana, nux tëmëraquinbi mitsun upí oquin ꞌaia cuati, chuámarua tani cuëënin.

⁵ Macedonia menu uax cananuna upíma ꞌaish masá nuituan. Ënuax cananuna ꞌaisamaira tëmëran, numi uni nishcë cupí ꞌianan mitsucëñun Titoribi sinani masá nuituti.

⁶ Usai ꞌiabi ca Nucën Papa Dios, an uni tëmërai masá nuitutiabi chuámarua ꞌinun ꞌimicë, an Tito mitsunuax ënu unun mëníoxun nu chuámarua ꞌimiaxa.

⁷ Tito ucë cupíshima, an mitsu ñuiquin ꞌë cacë bana aribi cuati cananuna chuámarua tani cuëëan. Mitsunuax uxun ca Titon nu caxa, axribi masá nuituti cuanxbisa mitsu isi cuëëanxa quixun. Nux mitsu isi cuanti cuëëananmi ꞌën mitsu quiricanu cacë ñucama sinani masá nuitutími ꞌitsaira ꞌëmi sináncancë, acama Titon ñuia cuati cana cuëëan.

⁸ A quirica buánmixun cana mitsu masá nuitumian. Usa ꞌaínbi cana, a quirica buánmiti ca ꞌaisama ꞌicë quixun pain sinánxunbi bërí ꞌunanin, ꞌaisamairai camina masá nuitucancëma ꞌai quixun.

⁹ Mitsúxmi ꞌën buánmicë quirica isi masá nuitucë cupíma, mitsúnmi masá nuitutancëxunbi sinanacë cupí cana cuëënin. Nucën Papa Dios cuëëncësabi oi camina usai ꞌican. Usa ꞌain ca nun mitsu buánmicë quirica an uibi ꞌatimaquin sinánmicëma ꞌicën.

¹⁰ Aín ꞌuchacama cupí masá nuitutancëxa uni sinanati ca Nucën Papa Dios cuëënia. Sinanatancëx ca aín ꞌucha tërë́ncë ꞌaish Nucën Papa Diosnan ꞌinux ië́cë ꞌia. Usai ꞌitancëx cuëënquin ca —ꞌëx ꞌën ꞌuchacama sinani pan masá nuituti ca asábi ꞌiaxa —quixun sinánti ꞌicën. Usa ꞌaínbi ca uni raíri aín ñu ꞌatima ꞌacë cupí masá nuituquinbi acama ëni ami sinanacëma ꞌaish Nucën Papa Diosnan ꞌima.

¹¹ Nucën Papa Dios cuëëncësabi oi masá nuitutancëxun camina ꞌën mitsu cacë bana upí oquin sinan. —Sinanima cananuna usai ꞌia —quixun sinánan —ami rabínquinma an ꞌaisama ñu ꞌacë uni ꞌaxunma ꞌanun cacëma ꞌaish cananuna ꞌaisama ꞌai —quixun sinani racuë́quin camina upí oquin mëníoti sinan. Camina ꞌën mitsu isi cuanti cuëëanan, an ñu ꞌaisama ꞌacë uni upía ꞌinun ꞌë mitsu cacësabi oquin ꞌaquian. Mitsun camina ꞌën mitsu cacë ñucama upí oquin mënío quixun cana ꞌunanin.

¹² ꞌËn mitsu quirica buánmiquin cana an ñu ꞌatima ꞌacë uni ashi sinánquin cuënëocëma ꞌain, ami ax ꞌuchacë uni aribishi sinánquin cana ꞌacëma ꞌain. Nucën Papa Diosan iscëxun camina asérabi nu nuibaquin nun bana cuati quixunmi mitsun ꞌunánun cana a quirica mitsu buánmian.

¹³ Usa ꞌain cananuna acama sinani masá nuitutíma chuámarua tani cuëëan. ꞌIanan cananuna Titóxribia usaími ꞌicancë bana ñui cuëënia isi cuëëinra cuëëan. Mitsun camina Tito chuámarua tanquian upí oquin sinánun ꞌimian.

¹⁴ Mitsunua cuantánun Tito caquin cana —a unicamax ca upí ꞌicë —quixun mitsu rabiquin can. Nun nu Tito ñuiquin mitsu cacë bana axa cëmëma ꞌain ca nun mitsu ñuiquin Tito cacë banacamaxribi cëmëma ꞌiaxa.

¹⁵ Mitsúnmi axa bëbaia aín bana cuaisa tanquin nuibaquin bicë, a sinánan an cacësabi oquinmi mitsun ꞌacë ñucama aribi sinánquin, ca an asérabi mitsu nuibatia.

¹⁶ Usa ꞌain cana, mitsun camina asérabi upí oquin sinánquin ñu ꞌai quixun sinani cuëënin.