2 Corintios 6 - Kashibo-Kakataibo Biblia

^1-2 Nucën Papa Diosan bana cuënëo ca ësai quia: Anúnmi ꞌë ñucácë nëtën cana min bana cuan. Cuaquin cana anúnmi ꞌënan ꞌinux ië́ti nëtën mi ië́mian. A bana quicësabi oi ca bëríribi anúan mitsun ñucácëxun cuati nëtë a ꞌicën, bëríbi ca anúan mitsu ainan ꞌinun ië́miti nëtë ꞌicën. Usa ꞌain cananuna Nucën Papa Diosbëtan mitsu cain, an mitsun bana cuanan ꞌaquinsa tancëxun camina an mitsu ꞌaquinun axa cuëëncësabi oquin a ñucáti ꞌain.

³ Uinu ꞌicë unínbia nun bana —ꞌaisama ca —quixun caquin cuaisama tanunma cananuna ñu ꞌatima ꞌaquinma Nucën Papa Dios cuëëncësabi oquinshi ꞌain.

⁴ Bëtsi bëtsi onan numi nishquin unin tëmëramicë ꞌianan uisa ñu cara ꞌicëbëbi bënë́quinma tanshiquin Nucën Papa Diosan bana ñuixunia isquin ca camabi unin ꞌunánti ꞌicën, nux cananuna asérabi Nucën Papa Diosan uni ꞌai quixun.

⁵ Unían nu mëëanan sipuanan raíri uni numi tsuáquirumimainun ꞌaisamaira oquin ñu mëëanan, ꞌuxti tëanan ꞌacëñuma ꞌaish panancë ꞌixunbi cananuna bënë́quinma tanshitin.

⁶ Usa ꞌixun ñu ꞌaisama ꞌati sinánquinma Nucën Papa Diosan bana ꞌunáncë ꞌixun ami nishíma unibë asérabi upí ꞌianan Nucën Papa Diosan Bëru Ñunshin Upitan sinánmicë ꞌianan, paránquinma asérabi uni nuibanan

⁷ bëtsi bana ñuiquinma, an cushiocëxuinshi aín bana ñuixunia isquin ca nux cananuna asérabi Nucën Papa Diosan uni ꞌai quixun camabi unin ꞌunánti ꞌicën. An iscëx nun nuitu upí ꞌixun cananuna racuë́quinma uni itsiribi Cristomi sinánun ꞌaquinti ꞌain. Usoquin ꞌaia ca numi manánquinbi unin ꞌunánti ꞌicën, nun cananuna ñu ꞌaisama ꞌacëma ꞌai quixun.

⁸ Raíri uni nu ñui —a unicamax ca aín nuitu upí ꞌicë —quimainun raírinëxribishi nu ñui ꞌatimati banaia. Usaribitia raírinëx nun isanuna Nucën Papa Diosan bana upí oquin ñuixuni quimainun ca raírinëxribi nun isanuna Nucën Papa Diosan bana ꞌunáncëma ꞌai quia. Usaribiti ca raíri uníxa —Pablonën bana ca asérabi ꞌicë —quimainun raírinëxribishi —a banax ca cëmë ꞌicë —quia.

⁹ —Uínbi ꞌunáncëma ca a uni ꞌicë —quiax nu ñui quicancëbëbi ca raíri —nun ꞌunáncë ca Pablo ꞌimainun abë ꞌicë unicama ꞌicë —quia. Bamatisa ꞌaíshbi cananuna ië́an. Usai ꞌínu upiti ami catamëti ꞌunánti cupía Nucën Papa Diosan nu castícancëxbi cananuna bamacëma ꞌain.

¹⁰ Masá nuitucë ꞌaíshbi cananuna chuámaruaishi ꞌain. Ñuñuma ꞌixunbinu Cristo ñuiquin bana ñuixuncëx ca an a bana cuacë unicamax uni ñuñu ꞌicësamaira oi chuámarua tani cuëënia. Ñuñuma ꞌicëbi ca Cristonën nubë ꞌixun ax cuëëncësabi oínu anun ꞌinun nu ñu ꞌinania.

¹¹ Corintonu ꞌicë nucën xucë́antu, asérabi mitsu nuibaquin cananuna nux ꞌicëcama ꞌimainun nun sináncë ñucamaribi mitsu ñuixuan.

¹² ꞌItsaira mitsu nuibaquin nun cacësaribi oquin mitsun nu nuibaquin cati sináncëbëtanbi camina nu cacëma ꞌain.

¹³ Usa ꞌicë cana unían aín bëchicë cacësaribi oquin mitsu cain, ꞌën mitsu ꞌacësaribi oquin camina ꞌëribi nuibacanti ꞌain.

Nux cananuna anu Nucën Papa Dios ꞌicë a ꞌai quicë bana

¹⁴ An ñu upíshi ꞌacë unin sináncësaribi oquin ca an ñu ꞌaisama ꞌacë unicaman sinaníma. Usa ꞌain camina mitsux Jesucristomi catamëcë ꞌixun axa Jesucristomi catamëcëma unicamabëtan atun cuëëncësa oquin ñu ꞌatima ꞌain. Nëtëx ca imë́bë mëscutíma. Usaribiti ca Cristonën unicamax Cristonanma unicamabë nuianantima ꞌicën.

¹⁵ ¿Cristonën cara ñunshin ꞌatimanën ꞌapúan sináncësa oquin sinanin? Usaquin ca sinaníma. ¿Axa Cristomi catamëcë unin cara axa Cristomi catamëcëma unin sináncësaribi oquin sinanin? Usaquin ca sinaníma.

¹⁶ ¿Anuxun Nucën Papa Dios rabiti xubunuxun cara atúnbi ꞌacë ñu unin rabiti ꞌic? Ca ꞌatima ꞌicën. Nucën Papa Dios, ax bamatimoi tsócë, a aín unicaman rabicë, ax ca mitsunu ꞌicën, axa ësai quiásabi oi: ꞌËx cana atubëbi ꞌianan uinu cara atux cuania anuribi atubë ꞌiti ꞌain. ꞌËx cana aín Dios a atun rabiti a ꞌain, atux ca ꞌën unibu ꞌiti ꞌicën.

¹⁷ Ësairibi ca Nucën ꞌIbu Diosan bana quia: Axa ꞌëmi sináncëma unicamabë ꞌima ꞌianan camina atun sináncësaribi oi ꞌicantima ꞌain. Usai ꞌiquin camina ꞌëx cuëëncëma ñu ꞌatima ꞌain. Usai ꞌia cana ꞌënan mitsu ꞌimiti ꞌain.

¹⁸ ꞌImianan cana mitsun Papa ꞌiti ꞌain. ꞌIcëbë camina mitsux, bëbu ꞌimainun xanucamaxribi, ꞌën bëchicë ꞌiti ꞌain. Usai cana mitsun ꞌIbu Dios, cushiira, ꞌëx quin.