2 Corintios 5 - Kashibo-Kakataibo Biblia

¹ Cananuna ꞌunanin, bëráma unin ꞌá ꞌaísha xubu chëquicësaribiti ca nun nami anu nun bëru ñunshin ꞌicë ax ꞌia. Usaía nun nami ꞌiti ꞌaínbi ca Nucën Papa Diosan chëquitimoínu anu abë ꞌiti a aín nëtënu nu mëníoxuanxa. Ax ca unían ꞌacëma ꞌicën.

² Usai cananuna Nucën Papa Diosan nëtënu ꞌiti ꞌai quixun ꞌunani cananuna asérabi ënë nëtënuax anu cuainsa tani bënëtin.

³ Anuax cananuna ënë namima bëtsi namiñu ꞌiti ꞌain.

⁴ Ënë nëtënu ꞌaish cananuna paë tani masá nuituti bënëtin. Usa ꞌaish cananuna ënë namiñuma bëtsi nami bamatima, axa usabii ꞌiti, aañu ꞌiti cuëënin.

⁵ Usaínu ꞌinúan an nu ꞌimicë ax ca Nucën Papa Dios ꞌicën. An ca, usai cananuna ꞌiti ꞌai quixúnu ꞌunánun aín Bëru Ñunshin Upí nubëa ꞌinun nu ꞌináncëxa.

⁶ Usa ꞌain cananuna an ca aín quicësabi oquin nu ꞌimiti ꞌicë quixun sinani, Nucën Papa Diosmi catamëti bënëtiman. Ënëribi cananuna ꞌunanin, ënë nëtënu ꞌaish, nun nami, nun xo acamax ió ꞌicëma pain ꞌaish, cananuna Nucën ꞌIbu Jesúsbë aín nëtënuirama pan ꞌain.

⁷ A isímabi cananuna ënë nëtënuax ami catamëti ax cuëëncësoi ꞌin.

⁸ Usa ꞌaish cananuna —an ca abë ꞌinun nu ꞌimiti ꞌicë —quixun ꞌunani chuámashi tani cuëënin. Usai ꞌi cananuna ënë nëtënu ꞌima Nucën ꞌIbu Jesúsbë aín nëtënu ꞌiisa tanin.

⁹ Usa ꞌain cananuna ënë nëtënu ꞌaish ꞌicësaribiti aín nëtënuxunribi ax cuëëncësa oquin ñu ꞌati cuëënti ꞌain.

¹⁰ Utëcëntancëxun ca Cristonën unicama achúshi achúshi uisaquin cara ënë nëtënuxun ñu ꞌaxa quixun isti ꞌicën. Usoquin ca, atun ñu ꞌacë cara upí ꞌicë, cara upíma ꞌicë quixun isti ꞌicën. Atun ñu ꞌacësabi oquin istancëxun ca raíri ax cuëëncësabi oquin ꞌacë, axa cuëënun ꞌimianan raíri an aín bana quicësabi oquin ꞌacëma uni a uisoquin cara ꞌati ꞌicë usoquin ꞌati ꞌicën.

Uisai cara uni chuámarua ꞌiti ꞌicë quicë bana

¹¹ Usaquin ca Nucën ꞌIbu Jesucristonën unicama ashúshi achúshi isti ꞌicë quixun ꞌunánquin cananuna ami racuë́quin camabi unínribi ꞌunánun a ñucama ñuiquin bana ñuixunin. An nu sinánmicësabi oquin cananuna bana ñuixuni quixun ca Nucën Papa Diosan ꞌunánxa. Usaquinu ꞌaiami mitsúnribi ꞌunánti cana cuëënin.

¹² Nuxbi rabíacatëcëni banaquinma cananuna mitsun uisa caranuna nux ꞌai quixun ꞌunánquin axa nu ñui banacë unicama canun quixun usaquin mitsu can. A unicaman ca —nux cananuna upí ꞌai —quixun uni sinánmisa tanquinbi aín nuitu upí ꞌiti sinanima.

¹³ Uni raírinëan, nux cananuna ñunshíncësa ꞌai quixun sinánmainunbi cananuna Nucën Papa Dios ax cuëëncësabi oquin ñu ꞌain. Usaribi oquin cananuna raíri unínribia, nux cananuna ñunshíncëma asábi ꞌai quixun sinánmainun, mitsúxmi upiti Nucën Papa Diosmi sináncë ꞌinun, aín bana mitsu ñuixunin.

¹⁴ Cristonën ca camabi uni ꞌitsaira nuibatia quixun ꞌunánquin cananuna a sinánquin —usa ca —quixun atu cain. Cananuna ꞌunanin, ax achúshi ꞌaíshbi ca Nucën Papa Dios cuëëncësabi oi camabi unin ꞌucha cupí bamacëxa. Usaía Cristo ꞌiá ꞌain, cananuna tëmëraíbi nux cuëëncësabi oi ꞌima, ax cuëëncësabi oi ꞌiti ꞌain.

¹⁵ Aín unicamaxa ënë nëtënuax atux cuëëncësa oi ꞌima, ax cuëëncësabi oi ꞌinun ca Cristo, axa atu cupí bamatancëx baísquia, ax camabi unin ꞌucha cupí bamacëxa.

¹⁶ Bëráma uni isquin, ax ca unishi ꞌicë quixun sinan ꞌixunbi cananuna bërí, uisa uni cara, —axribi ca Jesucristonan ꞌiti ꞌicë —quixun sinanin. Usaribi oquin —Cristo ax ca unishi ꞌicë quixun sinan ꞌixunbi cananuna bërí Cristo ax ca asérabi Nucën Papa Diosan Bëchicë, an nu ainan ꞌinun ië́micë, a ꞌicë quixun ꞌunanin.

¹⁷ Usa ꞌain ca uinu ꞌicë unix cara Cristomi catamëtia ax Cristobë ꞌaish bëtsi uni ꞌicën. Usa ꞌixun ca bëráma ꞌacësa oquin sinántëcënima. Bëtsi oquin ca sinania.

¹⁸ Nucën Papa Diosan ꞌimicëx ca axa Cristomi catamëcë uni usai ꞌia. Cristo cupí nux abë upí ꞌinun ca Nucën Papa Diosan nu ꞌimiacëxa. ꞌImianan ca camabi uníxa abë upí ꞌinun aín bana ñuixunun nu ꞌimiacëxa.

¹⁹ Ënëx ca ësa ꞌicën: Nucën Papa Diosan ca Cristo cupía camabi uni abë upí ꞌinun mëníocëxa. Mëníonan ca atun ñu ꞌatima ꞌacëcama a sinántëcënuxunma tërë́nxuanan, nun aín bana anun unicama abë upí ꞌinun ñuixunun nu cacëxa.

²⁰ Nux Cristonën ꞌimicë ꞌixun cananuna an sinánmicësabi oquin mitsu ësaquin cain, Nucën Papa Dios anbia mitsu cacësa ꞌinun: Nucën Papa Diosbë upí ꞌinux camina min ꞌuchacama tërë́ncë ꞌinun Jesucristomi catamëti ꞌain.

²¹ Cristo axa añu ꞌuchañumabi ꞌicëbi ca nun ꞌuchacama tërë́ncë ꞌinúan, nun ꞌucha bitsi ꞌuchañuirasa ꞌinun Nucën Papa Diosan ꞌimiacëxa, nux an iscëx ꞌuchañuma ꞌinun. Nuxnu abë ꞌimainuan Cristo axribi nubë ꞌicëbëtanu ax cuëëncësabi oquin ꞌanun ca Nucën Papa Diosan nun ꞌuchacama a ꞌináncëxa.