2 Corintios 4 - Kashibo-Kakataibo Biblia

¹ Ësoquin cana mitsu cain, ꞌuchañuira ꞌicëbi nuibaquin sinanamixun ca Nucën Papa Diosan aín bana uni ñuixunun nu ꞌimiaxa. Usa ꞌain cananuna masá nuituquin ënquinma aín bana uni ñuixunin.

² Uni itsimi unë́xunu ꞌacë ñucama ënquin cananuna a ꞌaínu rabínti ñu ꞌatimaribi ꞌaiman. Uni paránti sinánquinma cananuna Nucën Papa Diosan banaribi bëtsi oquinma ax asérabi quicë banaishi uni ñuixunin. Usaquin ñuixunia cuaquin ca camabi unin ꞌunánti ꞌicën, Nucën Papa Diosan iscëxun cananuna ax quicësabi oquin aín bana ñuixuni quixun.

³ Nun nu Jesucristomi catamëti ca uni Nucën Papa Diosnan ꞌiti ꞌicë quixun uni ñuixuncë ꞌaínbi sapi ca axa Jesucristomi catamëti ië́tisama tancë unicaman a banax ca upí oquin cuaisama ꞌicë quixun sinánti ꞌicën.

⁴ Usaquin sináncë unicaman ca ñunshin ꞌatimanën ꞌapúan sinánmicëxun, uisairai cara aín ꞌucha tërë́ncë ꞌaish Nucën Papa Diossaribi, Cristo, ainan ꞌiti ꞌicë quixun ꞌunanima.

⁵ Nuxbi ñuiacaquin cananuna unicama bana ñuixuniman. Usoquin cananuna —Jesucristo ax ca Nucën ꞌIbu ꞌicë —quixun unicama bana ñuixunin. Nuxbi ñuiacaquinma cananuna Jesús, an nu nuibacë, an nu sinánmicësabi oquin aín bana mitsu ñuixunin.

⁶ Nucën Papa Dios axa bëráma, “Bëánquibucë ca pëquiti ꞌicë” quiá, anbi ca Cristonëan nun nuitu mëúxun nu chuámashi tani cuëënquinu uisaira upí cara Nucën Papa Dios ꞌicë quixun ꞌunánun ꞌimiaxa.

Jesucristomi catamëtishi uni upiti tsóti bana

⁷ Nun cushínbi ꞌatsínxunmabi cananuna an ꞌamicëxuinshi ax cuëëncësabi oquin ꞌati ꞌai quixuan unicaman ꞌunánun ca Jesucristo cupí Nucën Papa Diosan nux abë upí ꞌixúnu aín cushínbi ñu ꞌanun nu ꞌimia.

⁸ Unían nu ꞌatimocëxbi cananuna Nucën Papa Diosan nu ꞌaquincë cupí asábi ꞌain. Uisa ñu cara ꞌicëbëbi cananuna sináncasmai bënëtiman.

⁹ Unin bëtsi bëtsi oiabi ca Nucën Papa Diosan nu ënima. Unin bamatanun quixun mëëcëxbi cananuna bamaiman.

¹⁰ Uinu caranuna cuani anuax cananuna Jesús ꞌiásaribiti, camabi nëtën tëmërai unin bëtsi bëtsi ocë ꞌain. Usaínu ꞌiabia Jesusan nubë ꞌixun nu ꞌaquinia ca camabi unin isti ꞌicën.

¹¹ Jesusan ca nu ië́miquin ꞌaquinia quixun camabi unin isnun ca nun aín bana ñuixuncëbë uni raíri nëtëtima nu bamamicatsi quiax ꞌësë́nania.

¹² Aín bana ñuixuncë cupí nu bamamisa tani uni numi ësë́nanmainunbi camina mitsux nun nu ñuicë bana cuati Jesúsmi catamëti nëtë́timoi Nucën Papa Diosnan ꞌinux ië́cë ꞌain.

^13-14 Cananuna ꞌunanin, Nucën Papa Dios, an Nucën ꞌIbu Jesús bamacëbi baísquimia, an ca usaribi oquin nuribi ainan ꞌicë Cristo utëcëncëbëtan baísquimiti ꞌicën. Baísquimitancëxun ca mitsubënu abë aín nëtënu ꞌinun nu ꞌimiti ꞌicën. Usaquin ꞌunánquin cananuna —ainan ꞌinun an nu ië́micë ꞌixun ca Nucën Papa Diosan nu ꞌaquinia —quixun unicama cain, bëráma Nucën Papa Diosan ꞌamicëxun aín unin ësaquin cuënëosabi oquin: “Nucën Papa Diosan ca ꞌë ꞌaquinia quixun ꞌunánquin cana camabi uni —usa ca —quixun can”.

¹⁵ Nun tëmëraquinbi mitsu bana ñuixuncëx camina ꞌitsaxira Nucën Papa Diosan nuibaquin ꞌaquincëx ainan ꞌaish cuëënin. Usai ꞌiquin camina mitsun ꞌitsaxuinra Nucën Papa Dios —asábi ca —caquin a rabin, Nucën Papa Dios cuëënun.

¹⁶ Usa ꞌain cananuna masá nuituquinma aín bana ñuitiribi ëniman. Nucën nami axa abiira abi xënibucëbëtanbi ca Nucën Papa Diosan camabi nëtën ami catamëti cuëënun nu cushioia.

¹⁷ Cananuna ꞌunanin, ënë nëtënuaxnu tëmëracë ꞌaínbi ca a ñucamax bënëtishi cëñutia. Tëmëracëbi ca nun sináncësamaira oquin Nucën Papa Diosan nux tëmëracë cupínu abë́ ꞌaish chuámarua tani cuëëinra cuëënun nu ꞌimiti ꞌicën.

¹⁸ Usa ꞌixun cananuna nun bërúnbi iscë ñu ꞌaisamaira oquin sinánquinma unin iscëma ñu, uni nuibati, cëmëi banatima, upí sinánñu ꞌiti, acama sinanin. Nun bërun nu iscë ñucamax ca cëñúti ꞌicën. Usa ꞌaínbi ca unin aín bërun iscëma, nun nuitu mëúnu sináncë ñucamax, Nucën Papa Dios rabiti, uni ꞌaquinti, acamax cëñútima ꞌicën.