2 Corintios 3 - Kashibo-Kakataibo Biblia

Anun uni upí ꞌaish ainan ꞌiti Nucën Papa Diosan mënío bana

¹ ¿Ësaquinu mitsu cacëxun caramina nux cananuna nubi rabiacati quixun sinanin? Usama ca. Uni raírinën ꞌacësa oquin cananuna mitsu isi cuanquin, uisa uni caranuna nux ꞌai quixun ꞌacë quirica buántima ꞌain. ꞌAnan cananuna usa quiricami nu ꞌaxunun quixun mitsu catima ꞌain.

² Usaquin ꞌacë quirica isquinmabi ca nun nu mitsu bana ñuixuncë cupí unin mitsu isquin nux caranuna uisa uni ꞌai quixun ꞌunánti ꞌicën.

³ Nun cananuna usoquin mitsu ꞌunánmia quiáxa quicë bana ax ca quiricanu tintan ꞌanan maxax paránu ꞌacëma ꞌaíshbi Cristo cupía Nucën Papa Diosan Bëru Ñunshin Upitan mitsun nuitunu ꞌimicë ꞌicën.

⁴ Nucën Papa Diosan ca Cristo cupí mitsu aín bana ñuixunun nu ꞌaquianxa quixun ꞌunánquin cananuna usaquin sinanin.

⁵ Nun cushínbi cananuna Cristo ñuiquin mitsu bana ñuixuan quixun cananuna sinaniman. Nucën Papa Diosan ꞌamicëxuinshi cananuna mitsu aín bana ñuixuan.

⁶ Moisésnën usaía judíos unicama ꞌiti ñuiquin cuënëo bana ca quia, a bana quicësabi oi ꞌicëma ꞌaish ca uni Nucën Papa Diosbë ꞌitimoi bamati ꞌicën. Usa ꞌaínbi ca a banama bana ió, a ñuixunun Nucën Papa Diosan nu ꞌimiaxa. A banax ca quia, aín Bëru Ñunshin Upitan ꞌimicëx ca uni ainan ꞌaish xënibua ꞌaínbi Nucën Papa Diosbë upí ꞌiti ꞌicën.

⁷ Aín bashinuax maxax paránu Nucën Papa Diosan cuënëocë bana a ꞌunánquian unin, ꞌuchati ca ꞌaisama ꞌicë quixun sinánti, a bëi atu ꞌinani aia ca Moisés Israel unicaman aín bëmánan ichúquin bëtë́nancëxun ami racuë́quin ñachama ꞌicën. Usai ꞌia iscasmacëxbi ca aín ichúcë ax munuira munu nëtë́buacëxa.

⁸ A bana Nucën Papa Diosan Moisés ꞌinan, asamaira ca —Cristo cupí ca uni aín ꞌuchacama tërë́ncë ꞌianan Nucën Papa Diosnan ꞌaish aín Bëru Ñunshin Upíñu ꞌia —quicë bana ax ꞌicën.

⁹ Moisésnëan uni ꞌinan banaxa upíira upí ꞌaínbi ca a bana quicësabi oquin ꞌacëma ꞌaish uni Nucën Papa Diosan ꞌuchocë ꞌia. Usa ꞌaínbi ca a ñui quicë bana cuati Cristomi catamëti aín ꞌucha tërë́ncë ꞌaish uni Nucën Papa Diosan ꞌuchocë ꞌima. Usa ꞌain ca Moisésnën cuënëo banasamaira ꞌaish Cristo ñui quicë banax upí ꞌia.

¹⁰ Moisésnëan uni ꞌinan banaxa ꞌiásamaira oi ca Cristo ñui quicë bana upí ꞌicën.

¹¹ Nucën Papa Diosan ꞌináncë bana uni ꞌináncëbë ichutibi ca Moisésnën bëmánan bënëtishi aín ichúcë nëtë́buacëxa. Usa ꞌainbi ca Cristo ñuicë bana axira bëtsi banasamaira upí ꞌain usai ami catamëtia uni upí ꞌiti ax nëtëtima.

¹² Cristo ñui quicë banaxa nëtë́timoi upí ꞌain, usai ꞌi ami catamëtia ca uni upí ꞌiti nëtëtima quixun asérabi ꞌunánquin cananuna rabínquinma unicama ñuixunin.

¹³ Aín bëmánan ichúcë axa nëtëtiama Israel unibunën isia quiax ca Moisés bëmápucüacëxa. Moisés usai ꞌiá ꞌaínbi cananuna nux usai ꞌima.

¹⁴ Israel unibunën ca uisashi oquin cara Nucën Papa Diosan atu upí ꞌimitisa tancëxunbi ꞌunánma ꞌicën. Usa ꞌaish ca bëmápucucësa ꞌiacëxa. Bërí nëtë́nribi ca a bana isquinbi cuatima. Cristomi catamëquin cuni ca unin, uisashi oquin cara Nucën Papa Diosan Moisés ꞌinan bana quicësabi oi ꞌinun aín unicama ꞌimiti ꞌicë quixun ꞌunánti ꞌicën.

¹⁵ Bërí nëtë́nbi ca Moisésnën cuënëo bana isquinbi uisashi oquin cara Nucën Papa Diosan aín unicama ꞌimitisa tania quixun ꞌunanima.

¹⁶ Usa ꞌaínbi ca, Nucën ꞌIbu Jesús ca asérabi Cristo ꞌicë quixun sinánan ami catamëquin cuni ꞌunánti ꞌicën.

¹⁷ Nucën ꞌIbu Jesucristonën sináncësaribi oquin ca Nucën Papa Diosan Bëru Ñunshin Upitan sinania. Usa ꞌain ca axa Jesucristomi catamëcë unin Nucën Papa Diosan Bëru Ñunshin Upitan ꞌimicëxun, upí oquin uisashi oquin cara Nucën Papa Diosan aín unicama ꞌimiti ꞌicë quixun ꞌunánan, Nucën Papa Dios quicësabi oi ꞌi cuëënia.

¹⁸ Usa ꞌain cananuna bëmápucucësama ꞌixun, Jesús ca asérabi Cristo ꞌicë quixun ꞌunani ami catamëti ainan ꞌain. Barían pëcaquin espejo ichucësaribi oquin ca Jesucristonënbi asaribi ꞌinun aín upí nu ꞌinania. Usaquian nu ꞌacëx cananuna bërámanu ꞌá ñucama ëuncubiani Jesucristo cuëëncësabi oi bëtsi sinánñu ꞌaish, asaribi ꞌin. Aín Bëru Ñunshin Upitanbia ꞌimicëx cananuna usai ꞌin.