2 Corintios 2 - Kashibo-Kakataibo Biblia

¹ Mitsu masá nuitumiti rabanan cana mitsu isi bënëtishi cuantëcëntima sinan.

² ¿ꞌËn mitsu masá nuitumia cara uin ꞌë upí oquin sinánmiti ꞌic? ꞌËn sapi cana mitsu masá nuitumia, usa ꞌaínbi camina mitsúinshi ꞌë upí oquin sinánmiquin ꞌë cuëënmiti ꞌain.

³ Mitsu isi cuaniami ꞌë masá nuitumiti rabanan cana cuanquinma mitsu usaía quicë quiricashi buánmian. Buánmiquin cana sinan, ꞌëx cuani masá nuitutíma cuëënia isi camina mitsúxribi upí oquin sinani cuëënti ꞌai quixun.

⁴ Mitsu buánminuxun a quirica cuënëoi cana mitsu sinani masá nuituti bëunan mëscuti ꞌian. Mitsúxmi masá nuitunun quixun cana a quirica ꞌacëma ꞌain. ꞌËn cana asérabi mitsu nuibati quixunmi ꞌunánun cana usaquin ꞌan.

Axa numi ꞌuchacë uni aín ꞌucha manumiti bana

⁵ ꞌAisamaira oquin mitsu masá nuitumitisama tanquinbi cana mitsu cain, an ñu ꞌatima ꞌacë unin ca ꞌëishima micamaribi masá nuitumiaxa.

⁶ Timë́xunmi mitsun ꞌën mitsu cacësa oquin ꞌacë uni a camina usashi oxun ënti ꞌain.

⁷ Usaquin ꞌacëxa sinanatia camina aín ꞌacë ñu manuquin a nuibaquin aín masá nuitucë nëtë́miquin, upí oquian sinánun ꞌaquinti ꞌain, axa ꞌaisamaira masá nuituti rabanan.

⁸ Usaquin ꞌaquin camina axribia mitsubë timë́nun canan mitsun camina a nuibati quixuan ꞌunánun abë upíonanti ꞌain.

⁹ Asérabi caramina Jesucristo cuëëncësabi oquin ꞌaquin, ꞌën mitsu cacë bana cuaquin ꞌati ꞌai quixun ꞌunánuxun, cana a quirica mitsu buánmian.

¹⁰ Usoquin ꞌaquinmi mitsun aín ꞌucha manuquin, aribi manumicëbëtan, cana ꞌënribi aín ꞌucha manuin. Axa ꞌëmi ꞌuchacëbi cana mitsúnmi aín ꞌucha manucë cupí, ꞌënribi aín ꞌucha manuan, Cristo cuëëncësabi oquin.

¹¹ Usoquin manucëma ꞌicë ca ñunshin ꞌatimanën ꞌapu, Satanás, an nu ꞌatimaquin sinánmiquin ꞌatimamiti ꞌicën. Usa ca ax ꞌicë quixun cananuna ꞌunan. An usoquin nu ꞌatimaquin sinánmiti rabanan cananuna aín ꞌucha manui a unibë upí ꞌiti ꞌain.

Troasnuaxa Tito isíma Pablo bënë́a

¹² Troas ëmanuxun Cristo ñuiquin bana ñuixunux bëbatancëxun, ax cuëëncësabi oquin ꞌën ñuixuncëxun cuati ca unicama cuëëanxa.

¹³ Cuëënia ñuixunti ꞌaíshbi cana nucën xucën Titobë mërananxma bënëti, anu ꞌicë unicama ëbiani, Macedonia menu cuan.

Cristomi catamëti aín unicama cushi ꞌiti bana

¹⁴ Ñunshin ꞌatimanëan nu ꞌatimaquin sinánmisa tanan aín bana ñuixunxunma ꞌanun ꞌimitisa taniabi ca Nucën Papa Diosan, Cristo Jesús cupí, nun ꞌacësabi oquinu aín bana ñuixunun nu ꞌimia. An ca aín ꞌacësabi oquin nu ꞌaquinia quixun ꞌunánquin cananuna —asábi ca —quixun caquin a rabin. Uinu caranuna cuani, anuxun ca nun nu Cristo Jesús ñuiquin aín bana ñuixunia, a banax ca asérabi upíira ꞌicë quixun unin sinania.

¹⁵ Nun Cristo ñuiquin aín bana unicama nuibaquin ñuixuncëbë ca Nucën Papa Dios cuëënia. Nun nu ñuixuncëxun cuatia raíri uni ainan ꞌinun ië́micë ꞌimainuan raíri unix ami sinántisama tani ië́micëma ꞌaínbi ca Nucën Papa Dios nun nu a unicama nuibaquin aín bana ñuixuncëbë cuëënia.

¹⁶ Axa ami sinántisama tancë unicamax ca nun nu Cristo ñuixuncëxun cuatíbi cuëënima, xënibua ꞌaínbi Nucën Papa Diosbëma ꞌiti ꞌicën. Usa ꞌaínbi ca axa ami sinántisa tancë unicamax nun nu Cristo ñuixuncëxun cuati, ami catamëti —usai ꞌinux ië́micë ꞌaish cana xënibua ꞌaínbi Nucën Papa Diosbë ꞌiti ꞌai —quixun ꞌunani cuëënia. ¿Usoquin unicama sinánmiquin bana ñuixunti cara uin ꞌati ꞌic?

¹⁷ ꞌItsa unin ca curíqui biti cupíshi Nucën Papa Diosan bana ñuixunquinbi a bana quicësa oquin ñuiquinma bëtsi oquin ñuixunia. Usa ꞌaíshbi cananuna nux a unicamasama ꞌain. Usa ꞌixun cananuna Cristonan ꞌianan Nucën Papa Diosan nu aín bana ñuixunun caíscë ꞌixun, axa cuëëncësabi oquin aín bana unicama ñuixunin.