2 Corintios 13 - Kashibo-Kakataibo Biblia

Pablonëan ashiquin ꞌësëanan bërúanxa ꞌinun ca

¹ Mitsu isi rabëti cuan ꞌaíshbi cana amiribishi mitsu isi cuantëcënti ꞌain. Camabi ñu ca unin, rabë́ unían ñuia cuapánti ꞌicën. Rabë́ ꞌimainun achúshi unían ñuiaira ca asérabi ca quixun ꞌunánti ꞌicën.

² Mitsu isi cuanx anu ꞌixun cana mitsu can, ꞌën mitsu istëcëni uxun iscë́xa an ñu ꞌatima ꞌacë unicama ꞌimainun raíri uníxribi sinanatíma usabi ꞌain, cana atu ꞌësëquin cushin cati ꞌain. Usoquin ꞌën mitsu cacësabi oquin cana ꞌura ꞌixunbi ënë quiricanën mitsu catëcënin.

³ Mitsun camina upí oquin ꞌunántisa tan, carana Cristonën sinánmicësabi oquin unicama bana ñuixuni quixun. ꞌËx mitsu isi amiribishi cuanxun, an ñu ꞌaisama ꞌacë unicama cushin cacëbëtan, camina ꞌunánti ꞌain, Cristo ax ca asérabi ꞌëbë ꞌicë quixun. Cristo ax ca cushiñúmama ꞌicën. Usa ꞌixun ca mitsu sinanamianan ami catamëtími upí ꞌinun ꞌimiquin, aín cushi mitsu ismiti ꞌicën.

⁴ Cristo ax ca uni itsi ꞌicësai i curúsocënu matáscë ꞌiacëxa. Usai ꞌiá ꞌaíshbi ca bërí Nucën Papa Diosan cushin uisatimoi tsotia. Usa ꞌain cananuna nux Cristo ꞌiásaribiti ꞌiquin uisa cara unin ocëxunbi cupiquinma tanshiti cushimasa ꞌixunbi an ꞌimicëxun Nucën Papa Diosan cushin mitsu ꞌaquinin.

⁵ Mitsúnbi camina sinánti ꞌain, caramina asérabi Cristomi catamëti ax cuëëncësabi oi ꞌi quixun. Upí oquin ca sinan. ¿Caramina ꞌunaniman. Jesucristo ax ca asérabi mitsubë ꞌicë quixun? Asérabi Cristonanma ꞌain ca ax mitsubëma ꞌicën.

⁶ Cristo ca asérabi nubë ꞌicë quixunmi mitsun ꞌunánti cana cuëënin.

⁷ Mitsun —usama ca —quixun nu sináncëbëtanbi cananuna ñu ꞌatima ꞌaxmami ꞌicanun quixun Nucën Papa Dios mitsu ñucáxunin. Nun cananuna mitsu upí oquin ꞌunánmia quixuan unin sinánti cupíma, mitsúnmi upí ñu ꞌati cupíshi, cananuna Nucën Papa Dios mitsu ñucáxunin.

⁸ Cristonën bana quicësama oquin cananuna ꞌaiman. Aín bana quicësabi oquinshi cananuna ꞌain.

⁹ Nux cushimasa ꞌixunbi ꞌaquincëxmi mitsux upí ꞌain cananuna cuëënin. Mitsun ñu ꞌatima ꞌacëcama mëníocë ꞌaish upíshi ꞌinun cananuna ënquinma Nucën Papa Dios mitsu ñucáxunin.

¹⁰ Nucën ꞌIbu Jesucristonën, mitsu ꞌatimoquinma an iscëx upí ꞌinun ꞌaquinun ꞌë cacë ꞌixun, cana mitsu isi cuantëcënxunmashi ënë quirica mitsu buánmin, cuanxun ꞌën iscëxmi ꞌaisama ꞌicania cushin banaquin masá nuitumiquin mitsu catin rabanan.

¹¹ ꞌËn xucë́antu, chuámashi camina ꞌicanti ꞌain. Añu ñucama cara ꞌaisama ꞌicë camina mëníoquin sinántëcëntima ꞌain, ꞌën mitsu cacë banacama cuati camina bëtsin sináncësabi oquin sinani nishananíma nuibananishi ꞌicanti ꞌain. Usai ꞌia ca Nucën Papa Dios, an aín unicama nuibaquin bënëtima chuámarua ꞌinun ꞌimicë, ax mitsubë ꞌiti ꞌicën.

¹² Jesucristo cupí mitsun nuitu upí ꞌaish camina chuámarua ꞌinux bëtsibë bëtsibë cananti ꞌain.

¹³ Axa ꞌëbë ꞌicëcama Cristonën ꞌimicë ꞌaish aín sinan upíira upí acamanribi ca mitsu chuámarua ꞌaishmi bërúanx ꞌicanun ꞌë camiaxa.

¹⁴ Mitsux ꞌuchacëbi Nucën ꞌIbu Jesucristonën nuibaquin ië́micë ꞌicëa Nucën Papa Diosanribi nuibamainuan aín Bëru Ñunshin Upí axribi mitsubë ꞌicëbëmi chuámarua bucucanti cana cuëënin. Ashi, Pablo.