2 Corintios 12 - Kashibo-Kakataibo Biblia

Namácësa oquian Pablonën isa

¹ ꞌËx rabiacacë ꞌaíshbi ca ñancáishi ꞌiti ꞌicën. Usa ꞌaínbi cana ꞌën namáquin iscësa oquin Nucën ꞌIbu Jesucristonën ismicë ñu ꞌimainun an ꞌë sinánmicë ñu a ñuiti ꞌain.

² ꞌËn cana ësaía ꞌia ñu ꞌunanin. Axa Cristomi catamëcë uni achúshinëx ca naí cata rabë́ ꞌucë cuancëxa, Nucën Papa Diosan ꞌimicëx. Aín namibëbi cara cuancëxa, aín bëru ñunshínshi cara cuancëxa cana ꞌunaniman. Nucën Papa Diosainshi ca ꞌunánxa. Usai a uni ꞌiá ca catorce baritia ꞌicën.

³ A uni cara aín namibë cuancëxa, cara aín namibëma cuancëxa quixun cana ꞌunaniman. Nucën Papa Diosainshi ca ꞌunánxa.

⁴ ꞌËn cana ꞌunanin, an ꞌimicëx ca a uni Nucën Papa Diosan nëtënu cuancëxa. Cuanxun ca uinu ꞌicë unínbia ñuitima bana cuacëxa, cuanan ca uinu ꞌicë unínbia chiquinaquin uni ñuixuntima bana cuacëxa.

⁵ ꞌËxbi ënë ñu ñui rabiacátisa ꞌaíshbi cana ꞌëxbi rabiacatiman. ꞌËnbi sinánxun ñu ꞌatima ꞌicëbi ca Nucën Papa Diosan ꞌë ꞌaquianxa quixuinshi sinani cana rabiacatin.

⁶ Rabiacátisa tani ꞌëx quicëxbi ca ꞌën bana, cëmëma ꞌaish sinánñuma uni banacësa ꞌitima ꞌicën. Usa ꞌaínbi cana rabiacatima ꞌain. ꞌËx rabiacatiamabi camina ꞌën ꞌacë ñucama isanan ꞌën bana cuaquin mitsun uisa uni carana ꞌëx ꞌai quixun ꞌunánti ꞌain. Usaribi oquin camabi unin ꞌë ꞌunánti cana cuëënin.

⁷ ꞌInsíncë ꞌaish ꞌën nami paëi ꞌëx ubiti tëmëracë ꞌaínbi ca Nucën Papa Diosan ꞌëx aín nëtënu cuanxun ñu iscë cupí rabiacáti rabanan usoquin ꞌë ꞌiminun ñunshin ꞌatimanën ꞌapu ëanxa.

⁸ Rabë́ ꞌimainun achúshi oquin cana Nucën ꞌIbu Jesucristo ꞌën ñucë ënëa ꞌë tërë́caxunun quixun ñucan.

⁹ Ñucácëxunbi ca ꞌë caxa: “ꞌËn mi nuibaquin ꞌaquincëxun ꞌunani camina usashi ꞌiti ꞌain. An —cushima cana ꞌai —quixun sináncë uni, a cana ꞌën cushínbi upí oquin ñu ꞌanun ꞌaquinin”. Usoquin ca Nucën ꞌIbu Jesucristonën upiti ami catamëquin ñucë ꞌixunbi ñu ꞌanun ꞌë ꞌaquinia quixun ꞌunani cana ꞌëx ñucë ꞌaíshbi cuëënin.

¹⁰ Usa ꞌaish cana Cristo ñuiquin aín bana unicama ñuixuncë cupí uni ꞌëmi ꞌatimati banacë ꞌianan ñuñuma ꞌianan unin bëtsi bëtsi ocë ꞌianan numi uni nishmainun bëtsi ñu cupíribi tëmëraquinbi bënëquinma tanshitin. Usa ꞌaish cushima ꞌixunbi cana Cristonën cushiocëxun ax cuëëncësabi oquin cushiñu ꞌixun ñu ꞌati ꞌain.

Corintonu ꞌicë axa Jesucristomi catamëcë unicamami sinania Pablo bënë́a

¹¹ Mitsúnmi ꞌë rabicëma cupí cana sinánñuma uni banacësari rabiacan. Mitsúxira ꞌë rabi upiti banatisa ꞌixunbi camina —Pablosamaira ꞌaish ca an Pablo ñuicë unicama ënëx Nucën Papa Diosan uni ꞌicë —quixun sinánan ꞌën bana isa ñancáishi ꞌicë quixun sinánquin a unicaman mitsu ñuixuncë bana cuacanin. Usaquinmi mitsun sináncëbëbi cana ꞌëx a unicama meuma ꞌain, ꞌënbi ꞌaquinma, Nucën Papa Diosan aín cushin ꞌamicëxuinshi ꞌën ꞌacë cupí.

¹² Mitsubë ꞌixun cana tëmëraquinbi tanshiquin, Cristo ñuiquin bana ñuixuanan, uni itsin ꞌacëma ñu ꞌacën. ꞌËn ꞌaia isquin camina, ꞌëx cana asérabi Nucën Papa Diosan aín bana ñuixunun caíscë ꞌai quixun ꞌunancën.

¹³ ꞌËn bëtsi bëtsi ëmanu ꞌicë axa Jesucristomi catamëcë unicama ꞌacësaribi oquin cana mitsu nuiban, mitsúxmi atusaribi ꞌicë. Usa ꞌaínbi sapi camina mitsúnmi curíqui ꞌinánti sinántisa tancëxunbi ꞌën bicëma cupí masáquin sináncanin. ꞌËn mitsun curiqui bicëma axa ꞌaisama ꞌain camina ꞌëmi masáquin sinánquinma a ñu manucanti ꞌain.

¹⁴ Rabëti cana mitsu isi cuan. Amiribishi mitsu istëcëni cuanti cana sinanin. ꞌËn ꞌacësabi oquin cana curíqui ꞌinánanmi ꞌë ñu ꞌináncanun mitsu ñucátima ꞌain. Mitsun ꞌë ñu ꞌinánquinmabimi mitsun ꞌë nuibati ashi cana cuëënin. Aín bëchicënën ca uni curíqui timëxuntima ꞌicën. Aín papan cuni ca aín bëchicë curíqui timëxunti ꞌicën. Usa ꞌain cana ꞌëx mitsun papasa ꞌixun mitsun curíqui bitima ꞌain.

¹⁵ ꞌËx asérabi mitsu nuibati tëmëraquinbi cana Cristo cupí mitsux upí ꞌinun mitsu aín bana ñuixunquin, ꞌën curíqui cëñúanan ꞌën cushi cëñúquinbi ꞌaquinti ꞌain. ꞌËn mitsu asérabiira nuibacëxunbi sapi camina ꞌën ꞌacësaribi oquin mitsun ꞌë nuibatiman.

¹⁶ Micama raírinëx caísmina ꞌën isna mitsúnmi ꞌë ꞌitsaira nuibaquin ꞌaquinun quixun mitsu paránquin bana ñuixunquin ñu ñucácëma ꞌai quiax quin.

¹⁷ ¿An mitsu paránun carana uni xuan? Cananuna xucëma ꞌain.

¹⁸ Mitsu istánun cana Titocëñun axa Cristomi catamëcë uni itsiribi xuan. ¿Titon cara mitsu paranx? Titobëtan ca axa abë ꞌicë unin mitsu paráncëma ꞌicën. ꞌËn ꞌacësaribi oquin sinánquin ca atun ñu ꞌaxa.

¹⁹ Nun usaquin mitsu cacëxun oquin mitsun nu nuibanun quixun isanuna ësaquin mitsu cai quixun sapi camina sináncanin. ꞌAíshbi ca usama ꞌicën. ꞌËn nuibacë xucë́antu, cana mitsu cain, ami catamëti ax quicësabi oíshi ꞌinun cananuna Cristo cuëëncësabi oquin mitsu ꞌaquinsa tanquinshi ënë ñucama mitsu ñuixuan. Asérabi ca usa ꞌicë quixun ca Nucën Papa Diosan ꞌunania.

²⁰ ꞌËn mitsu isi cuanxun iscëxbi sapi camina ꞌën sináncësama ꞌicanti ꞌai quixun cana sinanin, ꞌëxribi mitsun sináncësama ꞌimainun. Usa ꞌixun cana sinanin, mitsux sapi camina nutsi cuamianani cuëbicananan, bëtsibë bëtsibë nishánancë ꞌianan, bëtsimi manáncë ꞌianan, minainshi ñu ꞌati sinánan bëtsi unibë ñuianancë ꞌianan, rabiacaquin upí oquin sináncëma uni ꞌain.

²¹ Mitsu isi cuantëcënia sapi ca aín bana cuacë ꞌaíshbimi usai ꞌicancëbëtan Nucën Papa Diosan mitsu cupí ꞌë rabínmiti ꞌicë quixun cana sinanin. ꞌImainun cana sinanin, mitsu raírinën ñu ꞌaisama ꞌai mitsunanmabi xanu itsibë ꞌianan xanusa unibë ꞌianan ñunshinacëquin ñu ꞌatima ꞌaquin, a ñucama manuquin sinanacëma cupí sapi cana bëunan mëscúti ꞌai quixun.