2 Corintios 11 - Kashibo-Kakataibo Biblia

Pablo ꞌimainun Jesucristonën ꞌimicëxun isa aín bana ñuixunia quicë unicama

¹ Sinánñuma uni ꞌicësai ꞌëx rabiti banaiabi mitsun ꞌën bana cuati cana cuëënin. Usai banaiabi ꞌën bana cuatibi camina ꞌicanin.

² Cristonainshi ꞌinun cana mitsu aín bana ñuixuan. Usa ꞌixun cana xanúxa bëtsi unin bana cuatima aín bënën banaishi cuati ami sináncësaribi oi, mitsux bëtsi bana quicësa oíma Cristo quicësabi oíshi ꞌiti cupí, mitsu cain, Nucën Papa Diosan ꞌë sinánmicëxun.

³ Ax cëmëti ꞌunan ꞌixun ca runun Eva paráncëxa. Usaribi oquin sapi ca anu ꞌicë unicaman mitsu parania quixun cana ꞌitsa sinanin. Cristomi asérabi upiti catamëcë ꞌixunbi sapi camina bëtsi oquin sinánquin aín bana ënti ꞌai quixun cana sinan.

⁴ Mitsun camina uni itsían nun ꞌacësabi oquin Jesusan bana ñuixunquinma, a bana bëtsi oquin ñuixuncëxun cuatin. Cuanan camina Nucën Papa Diosan Bëru Ñunshin Upitan sinánmicëma, bëtsi ñunshinan sinánmicë unicaman mitsu ñuixuncëxun a bana cuatin. Cuanan camina Jesucristo cupía Nucën Papa Diosan nu ië́miti a bana pain cuaxunbi ënquin bërí bëtsi bana, unin ñuixuncë, aribishi cuacanin.

⁵ Mitsúnmi, ꞌësamaira isa a unicama mitsun aín bana cuacë, ax ꞌicë quixun sináncëbëbi, cana ꞌën sináncëx ꞌëx atu meuma ꞌain.

⁶ ꞌËx upíira upiti banati ꞌunáncë ꞌixunmabi ꞌën ñuicë bana ax ca asérabi ꞌicën, nun mitsu ñuixuncë banacama quicësabi oi ꞌia camina nu iscan.

⁷ ꞌËn añubi ñucáquinma mitsu anun Nucën Papa Diosnan ꞌiti bana ñuixuncë cupí, sapi camina, mitsux ismina ꞌëx meura ꞌimainun ꞌë manámi ꞌai quixun sináncanin. ¿Mitsun sináncëx cara añubi ñucáquinma ꞌën mitsu bana ñuixunti ꞌaisama ꞌiax?

⁸ Mitsu bana ñuixunti cupí cana bëtsi ëmacamanuxuan axa Jesucristomi catamëcë unicaman ꞌináncëxun curíqui bian.

⁹ Mitsubë ꞌaish ñuñuma ꞌixunbi cana mitsu ñu ñucácëma ꞌain. Macedonianuaxa ucë axa Jesucristomi catamëcë unicaman cuni ca ꞌën cuëëncë ñucama ꞌë ꞌinánxa. ꞌËn mitsu ꞌacësabi oquin cana mitsu ñu ñucátima ꞌain.

¹⁰ Cristonan ꞌaish cëmëquinma cana mitsu cain, Acaya menu ꞌicë unicamaxa atúinsa ꞌë ñu ꞌinánxa quitin rabanan cana a ñubi bitima ꞌain.

¹¹ ¿Uisacatsi carana usai banain? Mitsun sapi camina sinanin, ꞌën cana mitsu nuibatima quixun. Nucën Papa Diosan ca uisaira oquin carana ꞌën mitsu nuibati quixun ꞌunania.

¹² Usoquinmi sináncancëbëtanbi cana ꞌën ꞌacësabi oquinshi ꞌati ꞌain. Mitsubë ꞌicë unicama, an nun ñuicë banama bana itsi ñuicë, acamax ca quia, nux cananuna Pablo ꞌimainun abë ꞌicë unicama ꞌicësaribi ꞌain, abë sënë́nribi ꞌaish. Nun ꞌacësaribi oquin ca Pablonën curíqui bitsia. A unicamaxa usai quitin rabanan cana curíqui bitsiman.

¹³ A unicamax ca —Cristo unicama ñuixunun ca Nucën Papa Diosan nu ꞌimiaxa —quiax quia. Usai quibi ca asérabi usama ꞌicën. Cëmëquinshia an uni paráncë ca atux ꞌicën.

¹⁴ Usaquin uni parania isíbi camina ratúcantima ꞌain. Ñunshin ꞌatimanën ꞌapu, Satanás, anribi ca aín bana isa Diosan banasaribi ꞌicë quixun sinánmisa tanquin uni parania.

¹⁵ Usaribiti ca ñunshin ꞌatimanën ꞌapúan sinánmicë uni, ax bëtsi unían iscëx an ñu upí ꞌacë unisa ꞌicën. Usa ꞌaíshbi ca asérabi Nucën Papa Diosmi sinánquin ñu ꞌacëma ꞌaish Nucën Papa Diosnanma ꞌicën.

Jesusan bana ñuixuncë cupí Pablo tëmëra

¹⁶ Amiribishi cana mitsu cain, mitsúnmi —sinánñuma ca —quixun ꞌë sinánti cana cuëëniman. —Sinánñuma ca —quixun ꞌë ñuiquinbi camina ꞌën mitsu cacëxun cuati ꞌain, an ꞌë ñuicë unicamaxa ꞌicësaribiti ꞌitsamashi ꞌëx rabiacamainun.

¹⁷ Nucën ꞌIbu Jesucristonën ca rabiacanun ꞌë cacëma ꞌicën. Sinánñuma uni ꞌicësaishi cana rabiacatin.

¹⁸ ꞌItsaira uníxa ënë nëtënu ꞌicë ñuishi sinani rabiacacësaribi oi cana ꞌëxribi rabiacati ꞌain.

¹⁹ Mitsun, nux sinánñuma ꞌimainun ismina mitsux sinánñuira ꞌai quixun sinánquinbi camina a unicamax banaia cuëënquin cuatin, atúxa sinánñuma ꞌicëbi.

²⁰ A unicaman atun cuëëncësa oquin ꞌacëxunbi camina mitsun tanshitin. Atun ca mitsu ñu mëëmianan, paránxun mitsun ñu bianan, mitsux camina meu ꞌaish atubë sënë́nma ꞌai quixun canan, mitsu bëtashcaia. Usaquin ꞌacëxunbi camina tanshitin.

²¹ Nux cushima ꞌixun cananuna mitsu usoquin ꞌacëma ꞌai quixun sapi camina sináncanin. Uni sinánñuma banacësa ꞌaíshbi cana a unicama rabiacacësaribi oi ꞌëx rabiacati ꞌain.

²² ¿Atúxëshi cara hebreo banan banacë uni ꞌic? ꞌËxribi cana usaribi ꞌain. ¿Atúxëshi cara Israelnën rëbúnqui ꞌic? ꞌËxribi cana usaribi ꞌain. ¿Atúxëshi cara Abrahamnën rëbúnqui ꞌic? ꞌËxribi cana usaribi ꞌain.

²³ ¿Atun cara Cristo ñuiquin bana ñuixunin? Sinánñuma uni quicësai cana quin, atun ꞌacësamaira oquin cana ꞌën ꞌacën. Atux ꞌicësamairai cana bana ñuixuni tëmëracën, atu ꞌacësama oquin ca ꞌë ꞌitsa oquin sipuacancëxa, atu ꞌacësama oquin ca ꞌë ꞌitsa oquin rishquicancëxa, ꞌitsai cana bamaibi ië́acën.

²⁴ Mëcën achúshi oquin ca judíos unicaman ꞌë treinta y nueve oquin rishquiacëxa.

²⁵ Rabë́ ꞌimainun achúshi oquin ca ꞌë manë xon rishquicancëxa. Achúshi oquin ca ꞌë maxaxan ꞌacancëxa. Rabë́ ꞌimainun achúshiti ca ꞌëx anun cuancë manë nunti nanëti nëtë́acëxa. Achúshi oi cana manë nunti nëtë́cëbë achúshi imë́ ꞌimainun achúshi nëtë́nribi parúnpapa nëbë́tsinuax mëñuacën.

²⁶ ꞌËn nicënuax cana ꞌaisamaira tëmëracën, bacan cuani ꞌianan men cuaniribi. Bëtsi nëtën cana bacamiquisa ꞌiacën, bëtsi nëtën cana an ñu mëcamacë unin ꞌaisa ꞌiacën. Bëtsi nëtën ca judíos unibu ꞌimainun judíosma unibu, acamanribi ꞌë bëtsi bëtsi oti sináncëxa. Bëtsi nëtën ca ëma chanu ꞌicë unicamaribi ꞌëmi tsuáquiruacëxa. Bëtsi nëtën cana anu uni ꞌicëma menuax tëmëracën. Bëtsi nëtën cana parúnpapanuax tëmëracën. Bëtsi nëtën ca axa —Cristonan cana ꞌai —quibi cëmëcë unicamaxribi ꞌëmi nishacëxa.

²⁷ Ñu mëëi cana tëmëracën. ꞌUxti tëanan cana ꞌacëñuma ꞌaish panancë ꞌianan, shimanan, chupañuma ꞌaish matsin bamatisa ꞌiacën. Usai cana tëmëracën. Usa ꞌaish cana usabii ꞌin.

²⁸ Ënë ñucama ꞌimainun cana camabi nëtën, camabi ëmanu ꞌicë axa Jesucristomi catamëcë unicama cara asérabi Jesucristomi catamëtia quixun sinani bënëtin.

²⁹ Ui unix cara ami catamëcë ꞌaíshbi Jesucristomi manutia a uni cupí cana ꞌëxbi Jesucristomi manucësa ꞌaish masá nuitutin. Usa ꞌaish cana unían axa Jesucristomi catamëcë uni ꞌuchamicëbë ꞌëribia usoquin ꞌacësa ꞌaish rabíanan an a uni ꞌuchamicë unimi nishin.

³⁰ ꞌËx rabiacátisa tani cana —ꞌënbi sinánxun ñu ꞌatima ꞌicëbi ca Nucën Papa Diosan ꞌë ꞌaquianxa —quixun sinánquin a rabi rabiacáti ꞌain.

³¹ ꞌËn mi cacë ax ca cëmëma ꞌicë quixun ca Nucën Papa Diosan ꞌunania. Ax ca Nucën ꞌIbu Jesucristo aín Dios ꞌaish aín Paparibi ꞌicën, a ca camabi unin nëtë́timoquin rabiti ꞌicën.

³² ꞌËx Damasconu ꞌain ca an Aretas cacë ꞌapu ñu mëëxuncë unin a ꞌapun suntárucama ꞌëa chiquitia binun quixun, a ëma aín cënën xëcuëcama bëaramiacëxa.

³³ Usoquian bëaracancë ꞌaínbi ca caquí chanu ꞌaruxun, cënë manámia ꞌicë xëcuë chamaratsunën ꞌë ëman ꞌapácancëxa. Usocëx cana ꞌiacëacën.