2 Corintios 10 - Kashibo-Kakataibo Biblia

III. JESUCRISTONËN AÍN BANA ÑUIXUNUN CAISCË UNI ÑUIQUIN PABLONËN CA (10.1-13.14) —Aín bana ñuixunun Jesusan cá cana ꞌëx ꞌai —quiáxa Pablo quia

¹ ꞌËx Pablo ꞌicë Cristonën sinánmicëxun an ꞌacësaribi oquin mitsu nuibaquin upí oquin cati cana cuëënin. Uni raírinëx caísa quia, ꞌëx mitsubë ꞌaish isana mitsu ñu caíma upitishi banain. Bëtsi ëmanuxun quirica buánmiquin cuni isana ñu caquin cacësa oquin mitsu cain.

² Usai quicëbëtanbi cana mitsu cain, mitsu isi cuanquin, ꞌën isna axa ꞌëbë nicë unibëtan, Nucën Papa Diosan sinánmicëma, nunbi sinánxun bana uni ñuixuni quixuan an nu ñuicë unicama, abë banaquin cati cana sinanin. ꞌËn mitsu isi cuanxun ñu caquin catima cupía upitishi bananun camina a unicama uisa caranuna nux ꞌai quixun upí oquin ꞌunánmiti ꞌain.

³ Asérabi cananuna nux unishi ꞌaíshbi ënë nëtënu ꞌicë unicama ꞌicësaribiti ꞌacanániman.

⁴ Usa ꞌaish cananuna ënë nëtënuaxa anun suntáru ꞌacánancë ñu anúnribi nux ꞌacanániman. Nucën Papa Diosan cushínshi cananuna axa ami nishcë unicama usai ꞌiaxma ꞌinun nëtë́miti ꞌain.

⁵ Usaribi oquin cananuna unían ꞌatimaquin nu ñuicë bana, ꞌimainun unin anbi sinánquin, Nucën Papa Diosan bana cuaxunma ꞌanun caquin ꞌatimaquin sinánmicë banacamaribi, Nucën Papa Diosan cushínshi ñancáishi ꞌitánun nëtë́nti ꞌain. Usa ꞌain cananuna aín cushínbia ꞌimicëxun Cristo cuëëncësabi oquinshi ꞌati sinanin.

⁶ ꞌËn mitsu cacë ñucamami mëníoquin sënë́oncëbë mitsunu cuanquin cananuna an Nucën Papa Diosan bana cuaisama tancë unicama sinananun ꞌësëquin, atun ꞌaisama ñu ꞌacë a ëinsama taniabi ëmiti ꞌain.

⁷ Mitsun camina uisaira caranuna nux ꞌai quixun isti ꞌain. Asérabi camina Cristonan ꞌai quixun sinánquin camina ꞌunánti ꞌain, nuxribi cananuna Cristonan ꞌai quixun.

⁸ Nucën ꞌIbu Jesucristonën ca aín bana mitsu ñuixunun ꞌë cacëxa, masá nuitumiquin ꞌuchoquin ñu caquinma ax quicësabi oquin ꞌanun mitsu ꞌunánminun quixun. Usoquin ꞌanuan Jesucristonënbi ꞌimicë ꞌaish cana ꞌitsa oquin mitsu caíbi rabiniman.

⁹ Racuë́oti cupí cana mitsu quirica buánmi quixunmi sináncanti cana cuëëniman.

¹⁰ Uni raírinëx caísa quia, ꞌën quiricanu cuënëocë bana ax cushi ꞌaínbi isana ꞌëx mitsubë ꞌaish cushima ꞌianan ꞌëx quicësa oquin unin ꞌaisama ꞌai quiax.

¹¹ Axa usai quicë unin ca ꞌunánti ꞌicën, ꞌuránxun quiricanën cacësa usaribi oquin cananuna mitsubë ꞌixun mitsu cati ꞌain. ꞌAnan cananuna quiricanu nun mitsu cacësabi oquin ꞌati ꞌain.

¹² An nu ñuicë unicamax ca atúxbi rabiacatia. Usairibi cananuna nux ꞌitima ꞌain. Atun sináncësabi oi ca ꞌia, atux ca bëtsibë tanánantishi cuëënia. Upí oquin sinanima ca usai ꞌia.

¹³ Atux ca atun sináncësabi oi ꞌia. Usa ꞌaínbi cananuna nun Nucën Papa Diosan nu mëníoxuncësabi oquinshi ꞌain. An mëníoxuncësabi oquin cananuna mitsuribi aín bana ñuixuan.

¹⁴ Nunbi sináncë cupíma, Nucën Papa Diosan nu mëníoxuncë cupíshi, cananuna mitsun ëmanu cuanxun aín banami ꞌunánun mitsu ñuixuan. Nucën Papa Diosan mëníosabi oquin cananuna nun pain mitsu Cristo ñuiquin bana ñuixuancën.

¹⁵ Bëtsi unin ꞌaquincë cupía uni Jesucristomi sinania cananuna —ꞌën bana ñuixuncë cupíshi ca usai ꞌiaxa —quixun caiman. Usa ꞌaínbi cananuna mitsúnmi Cristomi catamëquin ënquinma ax quicësabi oquin ꞌacë cupí, aín bana mitsu ꞌunánmitëcëni cuainsa tanin, Nucën Papa Dios cuëëncëbë.

¹⁶ Usoquin mitsu amiribishi ꞌunánmitëcëntancëx cananuna mitsu ꞌura ꞌicë ëmacama, anua unin bana ñuixuncëma, acamanu cuanquin Cristo ñuiquin bana ñuixuni cuanti sinanin, nun ꞌunánmixunmabi uni itsían ꞌunánmicë, nun ꞌunánmicë isa quixun catima cupí.

¹⁷ Ui unin cara —ꞌën cana upí oquin ꞌai —quixun sinania, an ca —Nucën ꞌIbu Jesusan ꞌamicëxuinshi cana upí oquin ꞌai —quixun sinánti ꞌicën.

¹⁸ Axa rabiacacë uníxma, axa Nucën ꞌIbu Jesucristonën iscëx upí ꞌicë uni, ax cuni ca asérabi upí ꞌicën.