2 Corintios 1 - Kashibo-Kakataibo Biblia

Corintonuaxa ax Jesucristomi catamëcë unicama Pablonën quirica cuënëoxuan

¹ ꞌËx Pablo ꞌixun cana mitsu quirica buánmin, camina biti ꞌain. Nucën Papa Dios cuëëncësabi oquin ca Jesucristonën ꞌën a ñuiquin aín bana uni ñuixunun ꞌë caísacëxa. An caísa ꞌixun cana Timoteobëtan mitsu quirica buánmin. Axribi Jesúsmi catamëcë ꞌaish ca nun xucën ꞌicën. Mitsúxmi Corinto ëmanu ꞌicë axa Jesucristomi catamëcë unicama ꞌimainun Acaya menu ꞌicëcama axa Jesucristo cupí Nucën Papa Diosan iscëx upí ꞌicë, micama cananuna ënë quirica buánmin.

² Usa ꞌaínmi Nucën Papa Dios ꞌimainun Nucën ꞌIbu Jesucristonën nuibacëx chuámarua bucucanti cana cuëënin.

Tëmëraiabi ca Nucën Papa Diosan nu ꞌaquinia quixuan Pablonën ca

³ Nucën Papa Dios ax ca Nucën ꞌIbu Jesucristo aín Dios ꞌianan aín Papa ꞌicën. Camabi unin ca a rabiti ꞌicën. Ax ca Nucën Papa Dios ꞌicën. Ax ca an nuibaquin upí ꞌinun nu ꞌimianan nu masá nuitutiabi upí oquin sinánmiti, a ꞌicën.

⁴ Uisa ñu cara ꞌia ꞌicëbënu a cupí tëmërai masá nuitutiabi ca Nucën Papa Diosan upí oquinu sinánun nu ꞌimia. An nu usaquin ꞌimicë cupí cananuna bëtsi uni nux ꞌicësaribitia tëmërai masá nuitutiabi, ꞌë ꞌaquincësaribi oquin ca Nucën Papa Diosan mi ꞌaquinti ꞌicë quixun caquin ꞌaquinti ꞌain. Usaquinu uni itsi ꞌaquinun ca Nucën Papa Diosan nuxnu masá nuitutiabi upí oquinu sinánun nu ꞌimia.

⁵ Jesucristonan cupí cananuna axa tëmërasaribi oi ꞌaisamairai tëmërain. Usa ꞌicëbi ca Nucën Papa Diosan, nuxnu Jesucristonan cupí, upíira oquin nu ꞌaquinia.

⁶ Mitsúnmi —Nucën Papa Diosan ca nu nuibatia —quixun ꞌunánan Jesucristomi catamëti mitsun ꞌucha tërë́ncë ꞌaish aín uni ꞌinun cananuna tëmëraquinbi aín bana mitsu ñuixuan. Mitsúnmi Nucën Papa Diosan ca mitsu tëmëraíbimi cuëënun ꞌimiti ꞌicë quixun ꞌunánun ca an nuxnu tëmëraquinbi tanshiti cuëënun nu ꞌimia. Usaquin ꞌunánquin camina mitsun nux ꞌicësaribiti tëmëraquinbi Jesucristomi catamëti ënquinma tanshiti ꞌain.

⁷ Cananuna ꞌunanin, nux ꞌicësaribiti mitsux masá nuituti tëmëraibi camina Nucën Papa Diosan upí oquin sinánmicë ꞌain. Usa ꞌain cananuna, uisa ñu cara ꞌicëbëbi camina Jesucristomi catamëquin ënima quixun sinani, masá nuitutíma cuëënin.

⁸ ꞌËn xucë́antu, mitsúnmi ꞌunánun cana mitsu cain, Asia menuxun ꞌaisamaira oquin tëmëraquin cananuna sinan, cananuna tënëtima ꞌai quixun. Usa ꞌain cananuna bamati sinan.

⁹ Asérabi cananuna bamai quixun cananuna sinan. A ñucamax ca ësaquin nun sinánun ꞌiaxa: Nuxbi cananuna ië́tima ꞌain, Nucën Papa Dios, an uni bamacëbi baísquimiti, ainshi ca nu ië́miti ꞌicë quixun.

^10-11 Nuxnu bamati ꞌicëbi ca Nucën Papa Diosan nu ië́miaxa. Usa ꞌixun ca usabi oquin nu ꞌati ꞌicën. Cananuna ꞌunanin, mitsúnmi a nu ñucáxuncëxun ca an ꞌacësabi oquin nu ië́miti ꞌicën. ꞌItsa unían a nu ñucáxuncëxuan, an nu ië́mianan nu ꞌaquincë cupí, nun upí oquin bana ñuixunia cuati ca ami sinánquin ꞌaisamaira unin cuëënquin, asábi ca quixun caquin Nucën Papa Dios rabiti ꞌicën.

I. —ASERABIA NUCËN PAPA DIOSAN CAISCË ꞌIXUN CANA BANA ÑUIXUNI —QUIXUAN PABLONËN CA (1.12-7.16) Uisa cupí cara Pablo Corintonu cuanma ꞌicë quicë bana

¹² Cananuna asérabi ꞌunanin, Nucën Papa Diosan ꞌimicëx nun nuitu upí ꞌixun cananuna unicama paránquinma ñu upíshi ꞌa quixun. Unicaman ca usaínu ꞌia nu isaxa. Uni itsían nu iscësamaira oquin camina usaínu ꞌia mitsun nu isacën. Usaquin sinani cananuna cuëëinra cuëënin. Nunbi unin sináncësa oquin sinani cananuna usai ꞌicëma ꞌain. Nucën Papa Diosan nu nuibaquin ꞌaquincëxëshi cananuna usai ꞌian.

^13-14 Nun cananuna mitsúnmi ënë bana cuaisama oquin ꞌaxun mitsu paránuxun quirica buánmicëma ꞌain. Nucën ꞌIbu Jesús ucëbëmi mitsux abë ꞌicë isi cananuna —nun bana ñuixuan cupí ca atux Jesucristobë ꞌicë —quixun sinani cuëëinra cuëënti ꞌain. Nux cuëëncësaribi oi camina, —Pablobëtan ca abë ꞌicë unicaman nu ꞌunánmiacëxa —quixun sinani, nu nuibati cuëënti ꞌain. Usai ca ꞌiti ꞌicë quixun ꞌunánquinmi mitsun upíira oquin ꞌunánti cana cuëënin.

¹⁵ Mitsúxmi usai nubë cuëënti ꞌunánx cana mitsu isi rabëti cuanti sinan, mitsúxmi nubë isanani cuëënun.

¹⁶ Macedonia menu cuanquin mitsu isbiantancëxun Macedonia menuax utëcënquinribi mitsu isti cana sinan. Anu ꞌicëmi Judea menu cuanun mitsun ꞌë ꞌaquinti cana sinan.

¹⁷ ¿Sinánxunmaishi carana usaquin mitsu can? Jesucristonanma unix ca —cana ꞌatima ꞌai —quixun ꞌunanibi —cana ꞌati ꞌai —quia. ¿Mitsúnmi sináncëx carana ꞌëx usa uni ꞌain?

¹⁸ Usama cananuna nux ꞌain. Nucën Papa Diosan ca ꞌunania, nux —cananuna cuanti ꞌai —quiquin cananuna —asérabi cananuna cuanti ꞌai —quixun sinan.

¹⁹ Nucën Papa Diosan Bëchicë Jesucristo, a ꞌëbëtan Silvano ꞌimainun Timoteonën mitsu ñuixuncë, an ca —cana ꞌatima ꞌai —quixun ꞌunánquinbi —cana ꞌati ꞌai —quixun uni cáma ꞌicën. An ca axa quicësabi oquin ꞌaia.

²⁰ Nucën Papa Dios quicësabi oi ca camabi ñu Cristo Jesús cupí sënë́oncë ꞌiti ꞌicën. Usaquin ꞌunánquin cananuna Jesucristo cupí, aín bana cuaquin —ca usai ꞌiti ꞌicë —quixun Nucën Papa Dios rabin.

²¹ Nucën Papa Dios ax ca an micama ꞌacësaribi oquin nuribi Cristomi catamëcë ꞌaish ax cuëëncësabi oi ꞌinun ꞌimicë a ꞌicën. ꞌImianan ca nuxnu asérabi ainan ꞌinun nu ꞌimiacëxa.

²² Nux ainan ꞌaish cananuna xënibua ꞌaínbi abë ꞌiti ꞌai quixunu ꞌunánun ca Nucën Papa Diosan aín Bëru Ñunshin Upí nubëa ꞌinun nu ꞌináncëxa.

²³ Nucën Papa Diosan ca ꞌën nuitu mëu ꞌën ësaquin sináncë ꞌunania, mitsu nuibaquin mitsúxmi upí ꞌicë isti cuëëni cana mitsu isi cuanti sinanibi cuancëma pain ꞌain. Nucën Papa Diosan ca ꞌunania, usa ca quixun.

²⁴ Jesucristomi upiti sinani camina mitsux ami cushicë ꞌain. Mitsúxmi usai ꞌia cananuna nun cacësa oími ꞌinun mitsu caiman. Jesucristomi upiti catamëcë ꞌaíshmi chuámashirua tani cuëëni upitax bucunun quixuinshi cananuna mitsu ꞌaquinsa tanin.