1 Timoteo 6 - Kashibo-Kakataibo Biblia

¹ An uni ñu mëëxuncë uni, ax Jesucristomi catamëcë ꞌixun ca an ñu mëëmicë uni ñuiquinma upíxuinshi ñu mëëxunti ꞌicën, unían Nucën Papa Dios ñuianan aín banaribi ꞌatimaquin ñuiti rabanan.

² A rabëtaxbi Jesucristomi catamëcë ꞌixun ca an uni ñu mëëxuncë unin —an ë ñu mëëmicë uni cana upí oquin ñu mëëxunima —quixun sinántima ꞌicën. Usai ꞌiquinma ca an ñu mëëmicë uni axa Jesucristomi catamëcë ꞌaish aín nuibacë xucë́nsa cupí, bëtsi uni ꞌacësamaira oquin ñu mëëxunti ꞌicën. Usai ꞌinun camina camabi uni ñuixunquin ꞌunánmiti ꞌain.

Jesucristomi catamëcë uni ñuñu ꞌiisa tani bënë́tima bana

³ Ui unin cara unínbi sináncë bana uni ꞌunánmiquin Nucën ꞌIbu Jesucristonën ñuicë bana, anun uni ië́ti, a ꞌimainun an sinánmicëxuan aín unicamanribi ñuicë bana cuaisama tania,

⁴ a unin ca rabiacaquinbi añu ñubi ꞌunáncëma ꞌicën. Usa unin ca abë cuëbicanantishi cuëënquin —usama ca, ësaira ca bana ꞌicë —quixun raíri unicama cuëbicananquinia. Usai ꞌi ca a unicamax nutsianan, nishánanan, ñuianani ꞌatimati banaia. Usa ꞌixun ca uinu ꞌicë unínbi ca asérabi bana ñuima quixun sinania.

⁵ Usa ꞌaish ca a unicamax usaíshi ꞌiquin uisa ñu ꞌati cara upí ꞌicë, uisa ñu ꞌati cara upíma ꞌicë quixun ꞌunanima nëtëtima nishánani cuamianania. Usai ꞌicë unicaman ca Nucën Papa Diosan bana ꞌaquin isa unin curíqui biti ꞌicë quixun sinania. A unicamabë camina nitima ꞌain.

⁶ Axa ñuñu ꞌiisa tani bënëtima Jesucristomi catamëcë uni ax cuni ca upí oquin sinani cuëënia.

⁷ Ñuñu cananuna bacë́anma ꞌain. Usaribiquin cananuna bamaquianquin uisa ꞌixunbi nun ñucama buaniman.

⁸ Usa ꞌain cananuna pitiñu ꞌianan chupañu ꞌaish cuëënquin ꞌaisamaira ñuñu ꞌiti sinántima ꞌain.

⁹ Axa ꞌaisamaira ñuñu ꞌiti cuëëncë uni a ca ñunshin ꞌatimanën ꞌapun ñu ꞌaisama ꞌanun sinánmia. Sinánmicëxun ca a unicaman, uni sinánñuman ꞌacësaribi oquinshi ꞌati ꞌicën. Atúan usoquin sináncë cupí ca an ꞌaisama ñu ꞌatishi sináncë unicamax, aín sinan ñancáishi ꞌaish xënibua ꞌaínbi Nucën Papa Diosbë ꞌitimoi bamanuxun ꞌaia.

¹⁰ Axa ñuñu ꞌianan ꞌaisamaira curíquiñu ꞌiti cuëëncë uni an ca masáquin sinan sinánquin, uisa ñu cara upíma ꞌicë abi ꞌaisama sinánñu ꞌixun ꞌaia. Usa ꞌain ca raíri unin Jesucristomi sináncë ꞌixunbi ꞌaisamaira ñu biti cuëënquin, Jesucristo manubianxun ñu ꞌaisama ꞌaia. Usa ꞌaish ca masá nuituti nitsia.

Jesucristonan ꞌixun ñu ꞌatima ꞌati sinánquinbi tënëti bana

¹¹ Uni raírinëan ꞌaisamaira ñuñu ꞌianan curíquiñu ꞌiti cuëëncë cupí ꞌatima ñu ꞌacëbëbi camina mix Nucën Papa Diosmi catamëcë ꞌaish atumi ꞌunánti ꞌain. ꞌUnánquin camina upí sinánñu ꞌixun Nucën Papa Dios cuëëncësabi oquin ꞌanan, ami catamëti unicamabë nishánanima nuibananan, uisa ñu cara ꞌicëbëbi bënëtima ꞌianan, rabitima cuëmëninishi banati ꞌain.

¹² Ñunshin ꞌatimanëan ꞌatimamitisa tancëxunbi tënëquin camina Nucën Papa Diosmi catamëcë ꞌixun ax cuëëncësabi oquinshi ñu ꞌati ꞌain. Usoquin ꞌatancëxmi xënibua ꞌaínbi aín nëtënu abë ꞌinun ca an mi caísacëxa. Asérabi cana ꞌëx usai ꞌi quiax camina ꞌitsa unían cuamainun quiacën.

¹³ Nucën Papa Dios, an camabi ñu unio, a ꞌimainun Jesucristo, Poncio Pilatonën ñucácëxun chiquinaquin —ꞌApu ꞌinux cana uacë —quixun cá, ax cuëëncësabi oquin cana mi cain,

¹⁴ Nucën ꞌIbu Jesucristo utëcënti nëtë ꞌitámainuan xënibua ꞌaínbi uínbi min camina ñu ꞌatima ꞌacë quixun sinánti rabanan camina ñu ꞌaisama ꞌaquinma, ꞌën mi cacë bana bëtsi oquinma ax quicësabi oquinshi ꞌati ꞌain.

¹⁵ Aín nëtëa sënë́ncëbëtan ca Nucën Papa Dios, ax achúshishi ꞌicëa camabi unin ashi rabiti, ꞌianan cushiira cushi ꞌaish, ꞌapucaman ꞌApu ꞌianan ꞌibucaman ꞌIbu, anbi Nucën ꞌIbu Jesucristo utëcënun xuti ꞌicën.

¹⁶ Nucën Papa Dios axëshi ca cëñutima usabi ꞌia. Ax ca uíxbi bëbaquiantisama oquian pëcacë nëbë́tsi ꞌicën. Uínu ꞌicë unínbi ca a isáma ꞌicën. Istisama ca ax ꞌicën, uínbi ca a isima. Ax cushiira cushi ꞌicë ca xënibua ꞌaínbi camabi unicama ꞌimainun ángelcamanribi a rabiti ꞌicën. Usaquin ca ꞌati ꞌicën.

¹⁷ Axa Jesucristomi catamëcë uni, ꞌitsa curíquiñu ꞌimainun ꞌitsa ñuñu ꞌicë camina ësaquin cati ꞌain: Curíquiñu ꞌixun camina —ꞌëx cana ñuñuira ꞌaish bëtsi unisama ꞌai —quixun sinántima ꞌain. Curíqui ꞌimainun ñucamaxribi ca nëtë́ti ꞌicën. Usa ꞌain camina min curíquimi catamëquin —uínbi ca ꞌë uisoima, añu ñu carana ꞌaisa tani a cana ꞌati ꞌai —quixun sinántima ꞌain. Usaquin sinánquinma camina Nucën Papa Dios an bamatimoi tsócë ꞌixun, anun nux chuámarua bucunun camabi ñu nu ꞌináncë, amishi catamëti ꞌain.

¹⁸ Canan camina ësaquinribi atu cati ꞌain, ënquinma upí ñuishi ꞌanan ca uix cara ñuñuma ꞌaish ꞌaquinsa ꞌicë aribi ñonquinma ꞌaquínti ꞌicë quixun.

¹⁹ Usoquin ꞌacë ꞌaish ca ñuñu uni ax Jesucristonën ꞌacësaribi oquin sináncë ꞌaish ënë menuxun pain Nucën Papa Dios cuëënmitancëx, bamatancëxribi xënibua ꞌaínbi chuámarua abë ꞌiti ꞌicën.

Ashia Pablonën Timoteo cá bana

²⁰ Timoteo, cana mi cain, bana itsi ñuixunquinma camina Jesucristo ñuicë banaishi bëtsi oquinma unicama ñuixunti ꞌain. Jesucristo ñui quicë bana isa quixunbi ca bëtsi bëtsi unin asérabi a bana quicësa oquin ñuixunquinma bëtsi bana ñuia. A banax ca an ñu ꞌunáncë unicaman asérabi isa quixun ñuicë ꞌaíshbi ñancáishi ꞌicën. A bana camina cuatima ꞌain.

²¹ Raírinën ca a bana cuaquin Nucën Papa Diosmi sinánti ëanxa. Nucën Papa Diosan nuibaquin mi ꞌaquinmainun ca bërúanx ꞌit. Ashi, Pablo.