1 Timoteo 5 - Kashibo-Kakataibo Biblia

Axa Jesucristomi catamëcë unicamabë usai ꞌiti bana

¹ Uni apan camina ñu catima ꞌain. Ñu caquinma camina min papami ꞌacësaribi oquin uni apan upí banaishi ñuixunquin ꞌësëti ꞌain. Min xucë́nmi ꞌacësaribiquin camina bëná unicamaribi nuibaquin ꞌësëti ꞌain.

² Min titami ꞌacësaribi oquin camina nuibaquin xanu xënicama ꞌësëti ꞌain. ꞌAnan camina min chirabacëmi ꞌacësaribi oquin xanu xuntacucamaribi ꞌatimaquin sinánquinma upí oquin sinánquin ꞌësëti ꞌain.

³ Casunamëcë xanucama camina an ñu ꞌaquinti ꞌaíma ꞌain, ꞌaquinti ꞌain.

⁴ Usa ꞌaínbi ca xanu casunamëcënëx tuáñu ꞌianan babañu ꞌicë aín tuábëtan aín baban ꞌaquinti ꞌicën, chamará ꞌicë ca aín papabëtan aín titan tëmëraquinbi nuibaquin tuá canioia, usa cupí. Usa ꞌain camina uni ꞌimainun xanu, aín tita, aín papa ꞌimainun aín xubunu ꞌicë aín aintsicamaribi ꞌaquianan ñu ꞌaxunti ꞌunánmiti ꞌain. Usoquian ꞌati ca Nucën Papa Dios cuëënia.

⁵ An ñu ꞌaquinti ꞌaíma ꞌain ca xanu casunamëcënëx Nucën Papa Diosmishi catamëtia. Usa ꞌaish nëtë́nbi, imë́bi ëníma abë banaquin ca Nucën Papa Dios raíri uni ñucáxunia.

⁶ Casunamëcë xanu axa xanu raíri ꞌaquinti sinanima, aín cuëëncësarishi ꞌicë, ax ca bamacëma pain ꞌaíshbi bamacësa ꞌicën.

⁷ Usa ꞌain camina ꞌën mi cacë banacama ënë́xa quicësabi oía ꞌinun, axa Jesucristomi catamëcë unicama ꞌunánmiti ꞌain, unían —aín aintsi ꞌibu ca upí oquin ꞌaquinima —quixun ñuiti rabanan.

⁸ Uni ꞌimainun xanu Jesucristomi catamëcë ꞌixunbia, an aín xubunu ꞌicëcama ꞌimainun aín aintsi ꞌibucamaribi ami sinánquin ꞌaquincëma, ax ca Jesucristomi catamëcëmasa ꞌicën. Usa ꞌaish ca axa Jesucristomi catamëcëma uníxa ꞌicësamaira oi ꞌatimaira ꞌicën.

⁹ An ñu ꞌaquintia ꞌaíma ꞌain ca xanu casunamëcë, axa Jesucristomi catamëcë unicaman ꞌaquinti ꞌicën. ꞌAquincëxun ca atúinshia ñu ꞌaxunun caínquinma, anribi axa Jesucristomi catamëcë unicama ꞌaquinti ꞌicën. Usaquian ꞌanun aín anë quiricanu ꞌacë xanu, ax ca sesenta baritiañuma pan ꞌitima ꞌicën. Casunamëcëma ꞌaish achúshi bënëñuishi ꞌiá ca ꞌiti ꞌicën.

¹⁰ Upí oquian ñu ꞌaia unin ꞌunáncë ca ꞌiti ꞌicën. Cara aín tuá upí oquin canioxa, cara uni ꞌimainun xanu a isi aia upí oquin biaxa, cara axa Jesucristomi catamëcë unicama ꞌaquianxa, cara axa tëmëracë unicama chuámarua ꞌinun ꞌaquianxa, ꞌimainun cara uisa ñu upíribi ꞌaxa quixun ꞌunáncë ꞌaish ca aín anë ꞌacë ꞌiti ꞌicën.

¹¹ Usa ꞌain camina casunamëcë xanu xutani ꞌicë axa Jesucristomi catamëcë unicama an ꞌaquinun ꞌimitima ꞌain. Usa xanux ca Jesúsmi manuti amiribishi bënutisa tanti ꞌicën.

¹² Usari ꞌi ca —ꞌën cana axa Jesucristomi catamëcë unicama ꞌaquinti ꞌai —quixunbi ꞌaquiníma ꞌuchati ꞌicën.

¹³ ꞌIanan ca usa xanux ñu mëëtisama tani chiquishi, bëtsi bëtsi xubunu atsínbëquinquin bana ñuibëquini niti ꞌicën. Nianan ca a ñuitima ñuribi ñuiti ꞌicën.

¹⁴ Usaía ꞌitima cupí cana cuëënin, xutani ꞌaísha ax casunamëcë xanux ca bënuti ꞌicën. Bënutancëxun tuatancëxun ca aín tuá ꞌimainun aín xubunu ꞌicë ñucama upí oquin bërúanan, aín bënëribi ꞌaquinti ꞌicën. Usaquian ꞌacëbë ca axa Jesucristomi sináncëma unicama a xanu ñui ꞌatimati banatima ꞌicën.

¹⁵ Usai ꞌiquinma ca casunamëcë xanu raírinën Nucën Papa Diosmi sinánti ënxun ñunshin ꞌatimanën ꞌapu Satanasnëan sinánmicësabi oquinshi ꞌaia.

¹⁶ Usa ꞌain cana mi cain, bëbu ꞌimainun xanu axa Jesucristomi catamëcëcaman ca aín aintsi ꞌibu casunamëcë ꞌicë upitaxa ꞌinun bërúanti ꞌicën, axa Jesucristomi catamëcë unicaman isa a bërúanun quixun sinánquinma. Usa ꞌaínbi ca axa Jesucristomi catamëcë unicaman, an ꞌaquinti aín aintsi ꞌibu ꞌaíma ꞌain, xanu casunamëcë ꞌaquinti ꞌicën.

¹⁷ Aín cushían upí oquin ꞌaquincëxun ca axa Jesucristomi catamëcë unicaman ami sinánquin nuibaquin aín bana cuati ꞌicën. Usa ꞌixun ca bëtsi ꞌacësamaira oquin an bana ñuixuanan upí oquin ꞌunánmicë, ami sinánquin nuibanan upíira oquin aín bana cuati ꞌicën.

¹⁸ Moisésnëan cuënëo bana ca quia: “Trigoma rëucubutanun amáquin piia quixun camina vaca bënë cuëtanitima ꞌain”. Jesusaxribi ca ësai quiacëxa: “An ñu mëëxuncë uni a ca an ñu mëëmicë unin cupíoia”. Usaribiti ca an Nucën Papa Diosan bana ñuixuncë uni an aín cupí biti asábi ꞌicën.

¹⁹ Axa Jesucristomi catamëcë unicaman cushia, usai ca ꞌia quixun uni achúshinën ñuia camina cuashiti ꞌain. Rabë́ unían ñuia camina cuapánti ꞌain. Rabë́ ꞌimainun achúshi unían ñuiaíra camina —asérabi ca —quixun ꞌunánti ꞌain.

²⁰ Usa ꞌixuan asérabi ënquinma ꞌaisama ñu ꞌaia camina axa Jesucristomi catamëcë unicama timë́cënuxun sinanatánun ꞌësëti ꞌain, usaquinmi caia cuaquian axa Jesucristomi catamëcë uni raírinën —ꞌënribi cana usaquin ꞌatima ꞌai —quixun sinánun.

²¹ Nucën Papa Dios ꞌimainun Nucën ꞌIbu Jesucristo ꞌimainun aín ángel upícamanribia ismainun cana ësaquin ꞌanun mi cain: Min aintsi ꞌibu ꞌimainun uisa uni cara, anbia axa Jesucristomi catamëcë unicaman cushi ꞌixunbi ñu ꞌaisama ꞌaia camina axa Jesucristomi catamëcë unicama timë́cënuxun sinanamiquin cati ꞌain, ꞌën mi cacësabi oquin.

²² Upí oquin aín nuitu ꞌunánxunmaishi camina uni axa Jesucristomi catamëcë unicaman cushi ꞌimitima ꞌain. Upí oquin pain uisa uni cara quixun istancëxun camina min mëcën anu nanquin anëti ꞌain. Isunmabi upíma uni anëaxbi camina usaribiti upíma ꞌiti ꞌain. Usaquin ñu ꞌati rabanan camina bërúancati ꞌain.

²³ Min pucu ꞌaisama ꞌiquin camina ꞌunpáxëshi ꞌaquinma vino chamara ꞌunpáxcëñun mëscuxun ꞌati ꞌain.

²⁴ Uni raírinëan unë́quinma ñu ꞌaisama ꞌaia ca a unicama policíanën buáncëma ꞌaínshi unin isia. Isananbi ca uni raírinënribi unë́xun ñu ꞌaisama ꞌaiabia policíanën a unicama buáncëbëtan cuni unin ꞌunania.

²⁵ Usaribiquin ca unían ñu upíshi ꞌaia camabi unin isia. Usaquian iscëma ꞌaíshbi ca unían upí oquin ꞌacë ñu ax raíri unían ꞌunáncëma ꞌitima ꞌicën.