1 Timoteo 4 - Kashibo-Kakataibo Biblia

An Nucën Papa Diosan banamabi bana itsi uni ñuixuncë uni ñuicë bana

¹ Nucën Papa Diosan Bëru Ñunshin Upitan ca nu upí oquin ꞌunánun ꞌunánmia, Jesucristo utëcënti nëtë ꞌurama ꞌain ca ñunshin ꞌatima, an uni paráncë, acaman sinananmicëxun, uni raírinën ꞌatima ñu ꞌaquin Jesucristomi catamëti ënti ꞌicë quixun.

² Usai ꞌiquin ca axa cëmëcë unin bana cuati ꞌicën. A cëmëcë unicama an ca cëmë́ntapun ꞌaish cëmëquin, usai banati ca ꞌaisama ꞌicë quixun ꞌunaníma. Usa unicamax ca aránpi ꞌitsisan mëpëpëcacë́xa mocënu ñun naxcacëxunbia paë tancëma unisaribi ꞌicën.

³ A unicamax ca axa Nucën Papa Diosmi catamëcë unicaman isa xanu bitima ꞌicë quianan bëtsi bëtsi ñuribi pitima ꞌicë quiax quia, an ꞌináncëxun aín unicama an aín bana ꞌunáncë ꞌixun a —asábi ca —caquin piti oquian camabi ñu Nucën Papa Diosan unio ꞌaínbi.

⁴ Nucën Papa Diosan unio camabi ñux ca upí ꞌicën. Usa ꞌain ca aín unicaman —pitima ca —quixun timaquinma Nucën Papa Dios —asábi ca —caquin piti ꞌicën.

⁵ Aín banaxa —asábi ca camabi piti ñu ꞌicë —quiax quicë cupí cananuna an nu ñu ꞌináncëxun, Nucën Papa Dios —asábi ca —quixun caquin piti ꞌain.

An Jesucristo cuëëncësabi oquin bana ñuixuncë uni ñuicë bana

⁶ ꞌËn mi cacë bana ënë axa Jesucristomi catamëcë unicama ñuixuncë ꞌaish camina an Jesucristo cuëëncësabi oquin bana ñuixuncë ꞌiti ꞌain. ꞌIanan camina ami ñuixuncë bana upí oquin ꞌunánquin a banaxa quicësabi oquin ꞌati ꞌain.

⁷ Usai ꞌiquin camina unían aín rara usai ꞌiá bana ñuicëbëtanbi, usaribi oquin ꞌaquinma, upíira oquin sinánquin Nucën Papa Dios quicësabi oquin ꞌati ꞌain.

⁸ Ënëx ca ësa ꞌicën. Camabi nëtën cuai aín nami bachura ꞌianan cushi ꞌaish ca uni upiti cuai cuëënia. Usai cuëëncësamaira oi ca camabi nëtën upíira oquin sinánquin Nucën Papa Dios cuëëncësabi oquin ꞌai, uni ënë menuax upitax bucui cuëëanan usai ꞌitancëx Nucën Papa Diosan nëtënuaxribi abë ꞌaish cuëënti ꞌicën.

⁹ Usai ca ꞌiti ꞌicë quicë banax ca asérabi ꞌicën. Usa ca quixun ca camabi unin upí oquin ꞌunánti ꞌicën.

¹⁰ Nucën Papa Dios, axa bamatimoi tsócë, an camabi uni ainan ꞌinun ië́misa tanquin Jesucristomia ax catamëcë unicama ië́micë, an ca axa quicësabi oquin ënë menuxun ꞌimianan aín nëtënuxunribi aín unicama upitax ꞌinun ꞌimiti ꞌicë quixun cananuna ꞌunanin. Usa ꞌixun cananuna nun ꞌacësaribi oquian camabi unin ꞌunánun, tëmëranan uni numi ꞌatimati banacë ꞌixunbi unicama Nucën Papa Diosan bana ñuixunin.

¹¹ ꞌËn mi cacë banacama ënë camina axa Jesucristomi catamëcë unicama usaquian ꞌanun quixun caquin ꞌunánmiti ꞌain.

¹² Usoquin ꞌanan camina mix mëcó unima cupía unin timaquin min bana cuaisama tanti rabanan upí uni ꞌiti ꞌain. Mixmi ꞌicësaribitia axa Jesucristomi catamëcë unicamaxribi upí ꞌinun camina upiti bananan, upitishi ꞌianan, unicama nuibanan, uisa ñu cara ꞌicëbëbi Jesucristomi catamëanan, min xanuma ꞌain xanubë ꞌitima ꞌain.

¹³ ꞌËx mi isi cuanmainun camina axa Jesucristomi catamëcë unicama timë́cënuxun Nucën Papa Diosan bana, min ꞌacësabi oquin camaxunbia cuanun cushin banaquin ꞌati ꞌain. Atúxa upiti Jesucristomi catamënun camina bana ñuixunquin upí oquin sinánmiti ꞌain.

¹⁴ Axa Jesucristomi catamëcë unicamaxa timë́cë ꞌaían atun cushicaman aín mëcën minu nanxun, Nucën Papa Diosan sinánmicëxun mi cá bana a camina manutima ꞌain. Atúan cacësabi oquinmi ꞌanun ca Nucën Papa Diosan mi cushioti ꞌicën.

¹⁵ —An ca Jesucristomi catamëcë ꞌixun, upí oquin ñu ꞌaia —quixuan unicaman mi isnun camina upí oquin sinánquin ꞌën mi cacë banacama quicësabi oquin ënquinma ꞌati ꞌain.

¹⁶ Amanu amanua sinanima camina a bana quicësabi oi ꞌianan a banaxa quicësabi oquin uni bana ñuixunti ꞌain. Usaquin ꞌaími mix ië́cë ꞌimainun ca an mínmi a bana ñuixuncëxun cuacë unicamaxribi Nucën Papa Diosnan ꞌinux ië́cë ꞌiti ꞌicën.