1 Timoteo 3 - Kashibo-Kakataibo Biblia

Axa Jesucristomi catamëcë unin cushicamaxa usai ꞌiti bana

¹ Ënë bana ca asérabi ꞌicën: Axa Jesucristomi catamëcë unicaman cushi ꞌiisa tancë uni an ca ꞌunánti ꞌicën, ënë ñu mëëti ca upíira ꞌicën. —Usa ꞌain cana upíira oquin ꞌati ꞌai —quixun sinánti ꞌicën.

² Usa ꞌain ca axa Jesucristomi catamëcë unicaman cushi ax ësa uni ꞌiti ꞌicën: Ca ꞌiti ꞌicën, —ꞌaisama ca —quixun unin ñuicëma, xanu achúshiñuishi, upí sinánñu, cuaibë banacëma, upí oquin sináncë ꞌixun ñu ꞌatima ꞌacëma. ꞌIanan ca a isi aia cuëënquin uni bicë ꞌianan Nucën Papa Diosan bana ꞌunánmiti ꞌunáncë ꞌiti ꞌicën.

³ Paë́ncëma ꞌianan ca unibë mëëananti sinánñuma ꞌiti ꞌicën. Usa ꞌaish ca bënëtima cuëmëninishi unibë bananan curíquiñu ꞌiisa tani bënë́tima ꞌicën.

⁴ Aín xubunu ꞌicë aín aintsicamaxa upí ꞌinun bërúanti ca ꞌunánti ꞌicën. An upí oquin ꞌunánmicëxuan aín bëchicënën aín bana cuacë ca ꞌiti ꞌicën.

⁵ Aín xubunu ꞌicë aín aintsicama upí ꞌinun bërúanti ꞌunáncëma ꞌixun ca unin axa Jesucristomi catamëcë unicama upí ꞌinun bërúantima ꞌicën.

⁶ Bëríratsu ami catamëcë uni ax ca axa Jesucristomi catamëcë unicaman cushi ꞌitima ꞌicën. Usa ꞌixunbi ca —ꞌëx cana bëtsi unisamaira ꞌai —quixun sinánti ꞌicën. Usaribiquin rabíquin —ꞌëx cana Nucën Papa Diossaribi ꞌai —quixun sináncë cupí ca Nucën Papa Diosan ñunshin ꞌatimanën ꞌapu, Satanás, aín nëtënua chiquíancëxa. Usaribitía rabíti rabanan camina axa bëríratsu ami catamëcë uni axa Jesucristomi catamëcë unicaman cushi ꞌimitima ꞌain.

⁷ Axa Jesucristomi catamëcë unicaman cushi ax ca axa Jesúsmi sináncëma unínbia —ax ca upí nuituñu ꞌicë —quixun ꞌunáncë ꞌiti ꞌicën. Usama ꞌicë ca unia a ñui ꞌatimati banamainun ñunshin ꞌatimanën ꞌapúnribi ñu ꞌatima ꞌamiti ꞌicën.

An axa Jesucristomi catamëcë unicama ꞌaquincë unicamaxa usai ꞌiti bana

⁸ Axa Jesucristomi catamëcë unicaman cushi ꞌicësaribiti ca an atu ꞌaquincë unicamáxribi ꞌiti ꞌicën. Upí uni ca quixuan unin ꞌunáncë ca ꞌiti ꞌicën. ꞌIanan ca cëmëma ꞌixun aín quicësabi oquin ñu ꞌacë ꞌiti ꞌicën. Paë́ncëma ꞌianan ca curíqui binuxun uni paráncëma ꞌiti ꞌicën.

⁹ Usa ꞌixun ca Jesucristomi catamëquin Nucën Papa Diosan Bëru Ñunshin Upitan ꞌunánmicë ñucama upí oquin ꞌunani an ꞌimicësabi oi ꞌiti ꞌicën. Usai ꞌi ca —ꞌën cana Nucën Papa Dios cuëëncëma ñu ꞌaima —quixun ꞌunáncë ꞌiti ꞌicën.

¹⁰ An axa Jesucristomi catamëcë unicama ꞌaquinti uni caísnuxun camina uisa uni cara, uisoquin cara ñu ꞌaia quixun pain istancëxun caísti ꞌain.

¹¹ An axa Jesucristomi catamëcë unicama ꞌaquincë unin xanux ca —upí xanu ca —quixuan camabi unin ꞌunáncë ꞌiti ꞌicën, ca cëmëi bëtsimi manáncëma ꞌiti ꞌicën, paë́ncëma ꞌianan ca aín ñu ꞌati upí oquin ꞌacë ꞌiti ꞌicën.

¹² An axa Jesucristomi catamëcë unicama ꞌaquincë unix ca achúshi xanuñuishi ꞌiti ꞌicën. Aín bëchicë ꞌimainun aín xubunu ꞌicë aín aintsicama upí ꞌinun bërúanti ca ꞌunánti ꞌicën.

¹³ Usa uni ꞌixuan axa Jesucristomi catamëcë unicama upí oquin ꞌaquinia isquin ca camabi unin —atux ca upí uni ꞌicë —quixun ñuiti ꞌicën. Usaquian ñuicëxun ca ami cushicë ꞌaish racuë́quinma Cristo Jesús unicama ñuixunti ꞌicën.

Uni itsínma axa Jesucristomi catamëcë unicamainshi ꞌunáncë bana

^14-15 ꞌËn cana bënëtishi mi isi cuanti sinanin. Usa ꞌixunbi cana ꞌëx bënë́quiancëbëtanmami, usai ca Jesucristomi catamëcë unicama bucuti ꞌicë quixun ꞌunánun, quirica pan mi buánmin. Axa Jesucristomi catamëcë unicamax ca Nucën Papa Dios, axa bamatimoi tsócë, aín uni ꞌicën. Aín unicama cupíshi ca camabi unin uisa cara Nucën Papa Dios ꞌicë quixun ꞌunánan uisax cara uni ainan ꞌiti ꞌicë quixun ꞌunánti ꞌicën. Atu cupíshi ca bëtsi unicaman ënë ñucamax ca asérabi ꞌicë quixun manutima ꞌicën.

¹⁶ Asérabia unin ꞌunáncëma ñu Nucën Papa Diosan aín unicamaishi ꞌunánmicë ꞌain ca nun ñuicë bana ënëx asérabi ꞌicën: Jesucristo ax ca Diosribi ꞌaish ënë menuax uni ꞌiacëxa. Jesucristonën ca aín nuitu upí ꞌixun upí ñuishi ꞌaia quixun ca Nucën Papa Diosan Bëru Ñunshin Upitan unicama sinánmiacëxa. ꞌImainun ca Jesucristonëx ángelnënribia iscë ꞌiacëxa. Usa ꞌain ca a ñuiquin aín unicaman camabi menuxun uni ꞌunánmia. A ñuicë banax ca asérabi ꞌicë quixun sinani ca camabi menuax, uni ami catamëtia. Usa ꞌaish ca ënë menu ꞌitancëx aín Papabë ꞌi aín nëtënu cuancëxa.