1 Timoteo 2 - Kashibo-Kakataibo Biblia

Camabi uni Nucën Papa Dios ñucáxunti bana

¹ Ënë ñucama pain ñuiquin cana mi cain: Timoteo, min camina axa Jesucristomi catamëcë unicaman, uni raíri upiti bucunun ꞌimianan aín cuëëncë ñuribi bianan ami catamëanuan sinánminun, Nucën Papa Dios ñucáxunun ꞌë caxunti ꞌain. Canan camina atúan Nucën Papa Dios —asábi ca —quixun canun cati ꞌain.

² Usonan ca camabi nëtënu ꞌicë ꞌapucama ꞌimainun ꞌapun anëcë unicamaribi Nucën Papa Dios ñucáxunti ꞌicën, nuxnu upí sinánñu ꞌianan ubíonananima chuámashirua ꞌaish ax cuëëncësabi oi ꞌi bucunun.

³ Usoquin Nucën Papa Dios camabi uni ñucáxunti ca asábi ꞌicën. Nucën Papa Dios, an nu ainan ꞌinun ië́micë, ax ca usoquian aín unicaman ꞌati cuëënia.

⁴ Ax ca camabi unían ainan ꞌinux ië́quin ax cuëëncësabi oi ꞌiti ꞌunánti cuëënia.

⁵ Nucën Papa Dios ax ca achúshishi ꞌicën. An abë́a camabi uni upí ꞌinun ꞌimiti axribi ca achúshishi ꞌicën, a uni ca Jesucristo ax ꞌicën.

⁶ Camabi uníxa aín ꞌucha tërë́ncë ꞌaish Nucën Papa Diosnan ꞌinun ca ꞌitsianxmabi bamacëxa. Usai ca ꞌiacëxa quixun ca aín unicaman Nucën Papa Diosan mëníosabi oquin unicama ñuixunia.

⁷ Usa ꞌain cana an ꞌimicë ꞌixun judíos unicamaishima judíosma unicamaribi Jesucristomi catamëtía Nucën Papa Dios cuëëncësabi oi ꞌinun ꞌunánmin. Usaquin uni ꞌunánminun ca Nucën Papa Diosan ꞌë caísacëxa quixun ñuixunquin cana Cristonan ꞌixun cëmëquin paránquinma mi can.

⁸ Ësa cana ꞌëx cuëënin, uinu cara axa Jesucristomi catamëcë unicama timëtia anuax ca nucë bënë unix upí oquin sinani, unimi nishi abë cuëbicananima, aín mëcën manámi oi Nucën Papa Diosbë banati ꞌicën.

⁹ Usaribiti ca axa Jesucristomi catamëcë xanucamaxribi ax tanxëshi mëníocati ꞌicën, ꞌaisamaira cupícë ñu, chupa, curi, ꞌimainun perla, acama ca pañutima ꞌicën. Aín buribi ca unin isnun quixun ꞌaisamaira oquin mëníotima ꞌicën.

¹⁰ Usai ꞌiquinma ca uisoquin cara axa Nucën Papa Diosmi catamëti ami cushicë xanun ñu ꞌati ꞌicë, usoquinshi aín nuitu upí ꞌixun ꞌanan nuibaquin ꞌaquinsa ꞌicë raíri ꞌaquinti ꞌicën.

¹¹ Axa Jesucristomi catamëcë unicama timë́cë ꞌain ca xanuxun banaquinma nucë bënë unían Nucën Papa Diosan bana ñuixunia cuaquin, a banaxa quicësabi oquin ꞌati sinánti ꞌicën.

¹² Cana mi cain, axa Jesucristomi catamëcë unicama timë́cëbëtan ca xanuxun bana ñuixuntima ꞌicën, nucë bënë unían aín bana tanquin an cacësabi oquin ꞌanun quiax ca quitima ꞌicën. Usai ꞌianan ca unían Nucën Papa Diosan bana ñuixuncëbë banatima ꞌicën.

¹³ Nucën Papa Diosan ca uni achúshi, Adán, a pain uniotancëxun xanu achúshi, Eva, aribi uniocëxa.

¹⁴ Uniocëbi ca ñunshin ꞌatimanën ꞌapúan sinánmicëxun runun Adánma, Eva paránquin ñu ꞌatima ꞌamiacëxa. Usocëx ca ꞌuchacëxa.

¹⁵ Usa ꞌaínbi ca uinu ꞌicë xanun cara tuáñu ꞌianan Jesucristomi catamëcë ꞌixun, bëtsibë nuibananquin upí sinánñu ꞌixun ꞌatima ñu sinánquinma, tuáñu xanúan ꞌati ñucama upí oquin ꞌaia, a xanux Nucën Papa Diosan upí oquin ꞌaquincë ꞌiti ꞌicën.