1 Timoteo 1 - Kashibo-Kakataibo Biblia

Pablonëan Timoteo quirica cuënëoxuan

¹ ꞌËx cana Pablo, aín bana uni ñuixunuan Jesucristonën caísa ꞌain. Usa ꞌinun ca Nucën Papa Dios, an nu ainan ꞌinun ië́micë, abëtan Jesucristo, an nu asaribi ꞌiminunu nun caíncë an mëníocëxa.

² Timoteo, ꞌën cana ënë quirica mi buánmin. ꞌËx ami sináncësaribi oi mix Jesucristomi sináncë ꞌaish camina ꞌën bëchicësa ꞌain. Nucën Papa Dios ꞌimainun Nucën ꞌIbu Jesucristo, an nu ainan ꞌinun ië́micë, an nuibaquin min ꞌuchacama tërë́ncë cupími ainan ꞌaish chuámarua ꞌiti cana cuëënin.

Unin cëmëquin ñuicë bana cuatima bana

³ ꞌËx Macedonia menu cuantámainunmi Efeso ëmanu bërúnun quixun cana mi can, anuxunmi an Nucën Papa Dios cuëëncësabi oquin ꞌunánmiquinma bëtsi bana uni ñuixuncë unicama usoquin ꞌaxunma ꞌanun quixun canun.

⁴ Usa ꞌain camina a unicama cati ꞌain, uni raírinëan nun rara tsóa ꞌimainun uisai cara nun rara ꞌiacëxa quixun ñuicë banacama a cuaxunma ꞌanun quixun. Usa banacama cuati ca uni ñancábi cuëbicanania. Usa ꞌain ca an a banacama ñuicë unicaman Jesucristomi catamëquin Nucën Papa Dios cuëëncësabi oquin ꞌanun nu ꞌaquinima.

⁵ Nucën Papa Dios ca cuëënia aín unicamaxa ësai ꞌinúnu ꞌunánmiti: aín nuitu upí ꞌianan aín ꞌuchacama tërë́ncë ꞌixun ꞌatëcënti sináncëma ꞌianan Jesucristomi asérabi catamëcë ꞌixun unicama nuibati.

⁶ Usaía ꞌinun ꞌunánminun ca Nucën Papa Dios cuëënia quixun sinanima ca bëtsi bëtsi uni amanu amanua sinani banaia. Usa ꞌixun ca Nucën Papa Dios cuëëncësabi oía ꞌinun aín unicama ꞌaquinima.

⁷ Nucën Papa Diosan bana unicama ꞌunánmisa tanquin ñuixunquinbi ca a bana —uisai cara quia —quixun cuatima. ꞌImainun ca a ñuixuncë banacama —asérabi ca usa ꞌicë —quixun ñuixunquinbi uisai quicë cara quixun a bana anbi cuatima.

⁸ Camabi unia upí ꞌiti oquin ca Nucën Papa Diosan aín bana uni ꞌináncëxa. Usa ꞌain ca a bana quicësabi oi ꞌiquin unin ꞌunánti ꞌicën, a banax ca upíira upí ꞌicë quixun.

⁹ Cananuna ꞌunanin, aín nuitu upí ꞌixun ca unin usai ca uni ꞌitima ꞌicë quixun cuënëo bana isquinmabi ñu ꞌaisama ꞌaima. ꞌAínbi ca an ësa ñu ꞌacë unicaman —usaquin ꞌati ca ꞌaisama ꞌicë —quixun ꞌunánti cuënëo ca a bana ꞌicën: an Nucën Papa Diosan bana cuëëncëma, ꞌimainun an aín bana tancëma, ꞌatima ꞌaish ꞌaisama sinánñu, ꞌuchañuira, an Nucën Papa Diosmi racuë́quinma aín bana quicësabi oquin ꞌacëma, ꞌimainun an aín papa ꞌacë, an aín tita ꞌacë, an uni itsi ꞌacë, acama ꞌimainun,

¹⁰ aín xanuma ꞌaínbi xanubë ꞌicë unicama, aín bënëma ꞌaínbi unibë ꞌicë xanucama, xanúxmabi unibë ꞌicë unicama, an ñu mëcamacë unicama, cëmëcë unicama, axa anun Nucën Papa Diosbë upí ꞌiti bana, ënë́xa quicë ñucama cuëëncëma unicama. Ësa ñu ꞌacë unicaman —usai ꞌiti ca ꞌaisama ꞌicë —quixun ꞌunánun ca Nucën Papa Diosan uni aín bana ꞌináncëxa.

¹¹ Axa usa ñu ꞌati ca ꞌaisama ꞌicë quicë bana, usaribiti ca Jesucristo ñui quicë bana, a uni ñuixunuan Nucën Papa Diosan ꞌë caíscë, ax quia.

Nuibaquian ainan ꞌimicëxun unin Nucën Papa Dios —asábi ca —cati bana

¹² Nucën ꞌIbu Jesucristonën ca ꞌën an cacësabi oquin ꞌati ꞌunánxun, aín bana ñuixunun caxun, usoquin ꞌanun ꞌë cushioxa. Usa ꞌain cana a ñucama sinánquin —asábi ca —quixun a cain.

¹³ Jesús ñui ꞌatimati bananan ꞌatimaquin sinánquin aín unicama tëmëramianan ꞌatimaquin ñuia ꞌicëbi ca ꞌë aín uni ꞌimiacëxa. ꞌËx Jesucristomi catamëcëma pan ꞌianan ax ca Nucën Papa Diosan Bëchicë ꞌicë quixun ꞌunáncëma ꞌixun usoquin ꞌa ꞌicë ca Nucën Papa Diosan nuibaquin ꞌën ꞌuchacama ꞌë tërë́nxuancëxa.

¹⁴ Tërë́nxuanan ca Cristo Jesúsnan ꞌaish abë achúshi sinánñushi ꞌixun, unicama upí oquin nuibanan upiti ami sinánun ꞌimiquin Nucën ꞌIbu Diosan ꞌë cushioxa.

¹⁵ Ënë banax ca asérabi ꞌicën. Usa ꞌain ca camabi unin —asérabi ca —quixun ꞌunánti ꞌicën: Camabi uni aín ñu ꞌaisama ꞌacë cupía tëmërati ꞌicëbi Nucën Papa Diosnan ꞌinun ië́minux ca Cristo Jesús ënë menu uacëxa. Uni itsi ꞌicësamairai ꞌuchacë ꞌicëbi ca ainan ꞌinun ꞌë ië́miacëxa.

¹⁶ ꞌËx ꞌuchañuira ꞌicëbia Jesucristonën ꞌëmi nishquinma ainan ꞌë ꞌimicë cupí ca axa ami catamëti xënibua ꞌaínbi Nucën Papa Diosbë ꞌiti unicaman ꞌunánti ꞌicën, usaribi oquin ca Jesucristonën aribi Nucën Papa Diosnan ꞌinun ꞌimiti ꞌicë quixun. Atúan usaquin ꞌunánun ca Nucën Papa Diosan nuibaquin ꞌë ainan ꞌimiacëxa.

¹⁷ Usa ꞌain cananuna Nucën Papa Dios, axa usabi ꞌApuira ꞌiá ꞌaish cëñútimoi usabi ꞌiti, a unin aín bërúnbi iscëma, ꞌianan an camabi ñu ꞌunáncë, axëshia Dios, a xënibua ꞌaínbi rabiti ꞌain. Usai ca ꞌiti ꞌicën.

¹⁸ Timoteo, ꞌën bëchicësa ꞌicë, cana mi cain, Nucën Papa Diosan sinánmicëx ca aín unicama mi ñui quiacëxa, —Timoteonëx upí ꞌixun ca Nucën Papa Diosan bana unicama ñuixunti ꞌicën. Mi ñuia usai quicë unicaman bana sinánquin camina ami catamëquin, Jesucristo cuëëncëma ñu ꞌaquinma ꞌaisama ñu ꞌati sinánquinbi tënëquin upí ñuishi ꞌati ꞌain.

¹⁹ Usa ꞌaínbi ca —ësa ñu ꞌati ca ꞌaisama ꞌicë —quixun ꞌunánquinbi usaquin ꞌacë ꞌaish uni raíri Jesucristobë upiti nitsima.

²⁰ Usai ca Himeneo ꞌimainun Alejandro ꞌiaxa. A uni rabë́ cana Nucën Papa Dios ñui ꞌatimati banatëcënunma ñunshin ꞌatimanën ꞌapu Satanasnëan tëmëraminun ëan.