1 Tesalonicenses 5 - Kashibo-Kakataibo Biblia

¹ Nucën xucë́antu, uisa nëtën ꞌianan cara uínsaran Nucën ꞌIbu Jesucristo utëcënti ꞌicë quixun cananuna mitsu cuënëoxuniman.

² Mitsun camina upí oquin ꞌunanin, unían sinánmabia an ñu mëcamacë uni imë́ ucësa usaribi ca anúan Nucën ꞌIbu Jesucristo uti nëtë ꞌiti ꞌicën.

³ Axa Jesucristomi sináncëma unicamaxa: “Chuámashi cananuna bucuin, uisa ñunbi ca nu uisotima ꞌicë” quicëbëbi ca anúan cëñúcanti nëtë atun sináncë ꞌaímabi unuxun ꞌaia. Xanu tuñunën ca anúan ax bacë́nti nëtë sënéncëbëtan paë taníma ꞌima. Usaribiti ca axa usai banacë unicama anúan cëñúti nëtëa ucëbë ië́tima ꞌicën.

⁴ Usa ꞌaínbi camina mitsux axa Jesucristomi sináncëma unicama ꞌicësai ꞌima. Usa ꞌaish camina mitsux aín nëtë sënë́ncëbëa Nucën ꞌIbu Jesucristo ucëbë ratútima ꞌain, an mëcamacë unían aín ñu mëcamaquin ratucëxa uni ꞌicësai camina ꞌicantima ꞌain.

⁵ Nucën Papa Diosnan ꞌaish camina mitsux an nëtën upí ñu ꞌacë unisa ꞌain. Cananuna an imë́ ñu ꞌatima ꞌacë unicamasama ꞌain.

⁶ Usa ꞌaish cananuna uni raírisaribi ꞌuxcësa ꞌitima ꞌain. Cananuna manúcëma ꞌaish upí oquin sináncë uni ꞌiti ꞌain.

⁷ Axa ꞌuxcë unicamax ca imë́ ꞌuxia. Usaribiti ca axa paë́ncë unicama ꞌuxanan imë́ paënia.

⁸ Usa ꞌaínbi cananuna nux Nucën Papa Diosan uni ꞌaish camabi nëtën upí oquin sináncë ꞌiti ꞌain. Cristonën ca ax quicësabi oquin ꞌë ꞌaquinia quixun sinánquin cananuna ami catamëquin uni raíriribi nuibati ꞌain, ñunshin ꞌatimanëan nu ñu ꞌatima ꞌanun sinánmitima cupí. Cristomi catamëquin raíri uniribi nuibacë ꞌaish cananuna suntárunëan ꞌacánani ami catamëti cupí anun aín shican bëpánti manë chupa pañucësa ꞌain. Usai ꞌiquin, Jesucristo utëcëncëbë cana asaribi upí ꞌiti ꞌai quixun sináncë ꞌaish, cananuna axa ami nishcë unían ꞌati rabanan suntárunën aín maxcá manë mañutinën mapucësaribi ꞌain.

⁹ Nucën Papa Diosan ca nun ꞌucha cupí numi nishquin castícanuxun nu caíscëma ꞌicën. An ca Nucën ꞌIbu Jesucristo cupíshi upí ꞌinun ië́minuxun nu caísaxa.

¹⁰ Jesucristo ax ca nuxnu bamacëma pain ꞌaish abë ꞌianan bamatancëxbi abë tsónun nu cupí bamacëxa.

¹¹ Ënë ñucama sinani camina ami catamëti Jesucristomi cushicë ꞌinux upiti bëtsibë bëtsibë sinánmiananti ꞌain, mitsúxmi ꞌicësabi oi.

Pablonëan axa Jesucristomi catamëcë unicama ꞌësëa bana

¹² Nucën xucë́antu, cananuna mitsu cain, mitsun cushicama ꞌimainun an mitsu ꞌaquincëcama ꞌimainun an mitsu Nucën ꞌIbu Jesús ñuiquin ꞌësëcë unicama acaman mitsu cacësabi oquin ꞌanan camina atun bana cuati ꞌain.

¹³ Atúan upí oquin mitsu ꞌaquincë cupí camina acama nuibaquin, asérabi ca upí uni ꞌicë quixun sinánquin, atun bana cuati ꞌain. Camina bëtsibë bëtsibë nishánanima upí onani chuámashi bucucanti ꞌain.

¹⁴ Nucën xucë́antu, ënë ñucamaribi ꞌanun cananuna mitsu cain, an ñu mëëtisama tanquin uni itsi ubíocë unicama, a camina sinananun ꞌësëti ꞌain. Jesucristonan ꞌaíshbi upiti ami catamëcëma unicama a Jesucristomi upiti catamënun sinánmianan camina an Jesucristonan ꞌixunbi an ñu ꞌatima ꞌati sináncë unicama aribi upí ꞌinun ꞌaquinti ꞌain. ꞌAquianan camina camabi uni ami nishquinma nuibaquin upí ꞌinun ꞌaquinti ꞌain.

¹⁵ Mitsu uinu ꞌicënbi camina bëtsi uni mimi nishquian ꞌatimocëxun ami nishquin aribi cupiquin nishananquintima ꞌain. Usai ꞌima bëtsibë bëtsibë ꞌaquiananquin camina camabi uni ꞌaquinti ꞌain.

¹⁶ Masá nuitutíma camina camabi nëtën cuëëni chuámashi ꞌicanti ꞌain.

¹⁷ Usai ꞌi camina camabi nëtën Nucën Papa Diosbë banacanti ꞌain.

¹⁸ Uisa ñu cara ꞌicëbëtanbi camina mitsun Nucën Papa Dios —asábi ca —quixun cati ꞌain. Jesucristomi catamëcë ꞌixunmi mitsun usaquin a cati ca Nucën Papa Dios cuëënia.

¹⁹ Nucën Papa Diosan Bëru Ñunshin Upitan sinánmicëxuan unin upí ñu ꞌaia camina ëmitima ꞌain.

²⁰ Nucën Papa Diosan sinánmicëxuan unin ñuixuncëxun camina a bana cuaisama tantima ꞌain.

²¹ Unían bana ñuixuncëxun camina, Nucën Papa Diosan sinánmicëx cara quia quixun pain cuati ꞌain. Cuacë́xa usa ꞌicë camina aín bana upí oquin cuati ꞌain.

²² Uisa ñucamax cara ꞌatima ꞌicë, acama ënquin camina uisa ñu ꞌatimaratsubi ꞌatima ꞌicanin.

²³ Nucën Papa Dios, an nu bënëtima chuámarua ꞌimiti, an mitsu upíshi ꞌinun ꞌimianan mitsun sinan, mitsun nuitu ꞌimainun mitsun namíxbia uisa ꞌuchañumabi ꞌinun mitsu ꞌimiti cana cuëënin, utëcënquian Nucën ꞌIbu Jesucristonën usa ꞌicë mitsu isti cupí.

²⁴ Nucën Papa Dios, an ainan ꞌinun mitsu caíscë, an ca mitsu usoquin ꞌimiti ꞌicën, ax quicësabi oquin.

Upí oquin sinánxunquian ashiquin Pablonën bërúanxa ꞌinun ca

²⁵ Nucën xucë́antu, camina nu sinánquin Nucën Papa Dios nu ñucáxunti ꞌain.

²⁶ Jesucristo cupí mitsun nuitu upí ꞌixun camina axa Jesucristomi catamëcë unicama bërúanxa ꞌinun cati ꞌain.

²⁷ Nucën ꞌIbu Jesucristonën uni ꞌixun cana an ꞌë sinánmicësabi oquin mitsu cain, ënë quirica camina axa ami catamëcë unicaman cuanun ñuixunti ꞌain.

²⁸ Mitsu Nucën ꞌIbu Jesucristonën nuibaquin ꞌaquincëxmi mitsux upitax bucuti cana cuëënin. Ashi, Pablo.