1 Tesalonicenses 4 - Kashibo-Kakataibo Biblia

II. ꞌATIMA ÑU ꞌAXUNMA ꞌANUN QUIXUAN PABLONËN ꞌËSËA BANA (4-5) Nucën Papa Dios cuëëncësabi oi ꞌiti bana

¹ Nucën xucë́antu, Nucën ꞌIbu Jesús cuëëncësabi oquin ꞌësëquin cananuna ësaquinribi mitsu cain, uisai ꞌianan caramina uisaira oquinribi Nucën Papa Dios cuëëntanun ꞌati ꞌai quixunu mitsu ꞌunánmicësabi oquin ꞌaquinbi camina mitsun ꞌacësamaira oquin camabi nëtën ꞌati ꞌain.

² Nucën ꞌIbu Jesusan cacësabi oquin nun mitsu cacë bana camina mitsun ꞌunanin.

³ Nucën Papa Dios ca cuëënia mitsúxmi ainan ꞌaish ax cuëëncësabi oíshi ꞌiti. Ax ca cuëënia mitsun xanuma, xanu itsibë ꞌitima ꞌianan xanúxmabi bëtsi unibë ꞌitima.

⁴ Ax ca cuëënia, mitsúnmi xanu bitancëxun masóquinma abë nuibananquin upí oxun ꞌiquinti.

⁵ Ca cuëënia, mitsúxmi an Nucën Papa Dios ꞌunáncëma unicamaxa ñunshini aín cuëëncësa oíshi xanubë ꞌicësaribiti ꞌitima,

⁶ ꞌianan aín xanubë ꞌi bëtsi unimi ꞌuchatima. Usaía ax ꞌicë uni a ca aín ꞌucha cupí, Nucën ꞌIbu Jesucristonën uisa cara oti ꞌicë usoquin ꞌati ꞌicën, nun mitsu ñuixuncësabi oquin.

⁷ Nucën Papa Diosan ca usaquin ñu ꞌatima ꞌanux ainan ꞌinun nu ꞌimicëma ꞌicën. Ama. Ax cuëëncësabi oquin ꞌai upíshi ꞌinun ca nu ainan ꞌimiaxa.

⁸ Usa ꞌain ca, ui unin cara nun mitsu ꞌunánmicë banacama ënë cuaisama tania an, unin banama, Nucën Papa Dios, an aín Bëru Ñunshin Upí nu ꞌináncë, aín bana timaia.

⁹ Nucën Papa Diosan ꞌunánmicëxunmi upí oquin ꞌunáncë cupí cana, axa Jesucristomi catamëcë unicamax ca bëtsibë bëtsibë nuibananti ꞌicë quixun mitsu cuënëoxuniman.

¹⁰ Usai ꞌiti ꞌunani camina mitsux Macedonia menu ꞌicë axa Jesucristomi catamëcë unicamabë nuibananin. Usa ꞌicëbi cananuna mitsux ꞌicësamairaimi camabi nëtën upitiira nuibananun quixun mitsu cain.

¹¹ Camina upítaxëshi bucuquin uni raíri ubíoquinma mitsun ñu mëëtishi mitsúnbi ꞌai bucuti ꞌain, nun mitsu cacësabi oi.

¹² Usai ꞌi camina axa Jesucristomi sináncëma unicaman upí uni ꞌicë ꞌunáncë ꞌianan, ñuñumaribi ꞌicantima ꞌain.

Nucën ꞌIbu Jesucristo utëcënti bana

¹³ Nucën xucë́antu, bamacë unicamax cara uisai ꞌiti ꞌicë quixun ꞌunáncëma mitsux ꞌiti cananuna cuëëniman, an ënë ñu ꞌunáncëma unicamaxa aín aintsi bamacëbë ꞌicësaribitími mitsux ꞌaisamaira masá nuitutima cupí.

¹⁴ Jesús ax ca bamatancëx baísquiacëxa quixun ꞌunáncë ꞌixun cananuna, a ꞌimiasaribi oquin ca axa ami catamëcë ꞌaish bama unicama Jesucristo utëcëncëbëtan Nucën Papa Diosan baísquimiti ꞌicë quixun ꞌunanin.

¹⁵ Usa ꞌain cananuna Nucën ꞌIbu Jesusan nu cacësabi oquin mitsu cain, ax ucëbëa aín uni bamacamax baísquicëma pan ꞌain cananuna bamacëmacama nux Nucën ꞌIbu Jesucristobë ꞌitima pan ꞌain.

¹⁶ Nucën Papa Dios axbi quicëbëtan, aín ángelcaman cushi an munuma banaquin aín manë banañu, anun Nucën Papa Dios rabiti, a bana obëtsinmainun ca Nucën ꞌIbu Jesucristo axbi naínuax unuxun ꞌaia. Usai ꞌicëbë ca axa Jesucristomi catamëcë ꞌaish bama unicamax pain baísquiti ꞌicën.

¹⁷ Usacëbë cananuna Nucën Papa Diosan ꞌimicëx, bamacëmacama nuxribi atubëbi biranani manámiquiquianx, nëtë cuin mëúcüax, Nucën ꞌIbu Jesúsbë birananuxun ꞌain. Usaquiani cuanx cananuna Nucën ꞌIbu Jesucristobë xënibua ꞌaínbi ënánantimoi ꞌinuxun ꞌain.

¹⁸ Usa ꞌain camina ënë bana, abëmi ꞌicë unicamabë masá nuituaxma ꞌinun quixun ñuixuni, sinánmiananti ꞌain.