1 Tesalonicenses 3 - Kashibo-Kakataibo Biblia

¹ Mitsu istëcëncëma ꞌaish cananuna uisa caramina ꞌai, caramina asérabi Jesucristomi sinani quixun sinani bënë́an. Bënëti nuxëshi Atenas ëmanu bërúanan

^2-3 nucën xucën Timoteo mitsu istánun quixun xuti cananuna sinan. Anribi ca ami sináncë ꞌixun —Jesucristomi catamëti ca uni ainan ꞌiti ꞌicë —quixun Nucën Papa Diosan bana nubëtan camabi uni ñuixuanxa. Usa ꞌixun ca cuantancëxun an mitsúxmi Jesucristonan ꞌaish tëmëraíbi ami manuaxma ꞌinun upí oquin ꞌësëquin mitsu cushioti ꞌicën. Mitsúnbi camina ꞌunanin, Nucën Papa Diosan unicamax ca bëtsi unían bëtsi bëtsi ocë ꞌiti ꞌicë quixun.

⁴ ꞌAnan cananuna mitsubë ꞌixun, unin ca nu bëtsi bëtsi oti ꞌicë quixun mitsu can. Usai cananuna ꞌia quixun camina ꞌunáncanin.

⁵ Mitsux usai tëmëraia cuati bënë́quin cana mitsun caramina asérabi Jesucristomi catamëti ëncëma ꞌai quixun isnun Timoteo xuan. Mitsu sapi ca ñunshin ꞌatimanën ꞌapu, an uni paránquin ꞌaisama ñu ꞌati sinánmicë, an Jesús ñuicë bana ënun quixun sinanamiaxa quixun cananuna sinan. Usa ꞌixun cananuna nun nu mitsu bana ñuixuncë ax ca ñancáishi ꞌiti ꞌicë quixun sinan.

⁶ Usa ꞌaínbi ca Timoteonën mitsunuax uxun nu caxa, mitsun camina asérabi Jesucristomi catamëanan bëtsibë bëtsibë nuibananquin, nun mitsu ꞌacësaribi oquin ꞌitsaira istisa tanquin nu sinani quixun.

⁷ Nun xucë́antu, usaími mitsux asérabi Jesucristomi catamëtia cuaquin cananuna unin nu bëtsi bëtsi omainun raíri ñu cupíribi tëmëraquinbi masá nuituquinma upí oquinshi sinani cuëënin.

⁸ Usa ꞌaish cananuna mitsúxmi Nucën ꞌIbu Jesúsmi asérabi sinania cuati mitsu sinani masá nuitutancëxunbi upí oquin sinani cuëëinra cuëënin.

⁹ Mitsu sinani cuëënquin, Nucën Papa Dios —asábi ca —caquin rabiquinbi, cananuna uisaira oquin caranuna rabiquin a cati ꞌai quixun ꞌunaniman.

¹⁰ Jesucristomi catamëquin aín cuëëncësabi oi ꞌianan upí oquinra a ꞌunánun mitsu ꞌaquini cuanúan nu ꞌiminun quixun cananuna nëtën ꞌanan imë́ribi abë banaquin Nucën Papa Dios ñucatin.

¹¹ Nucën Papa Dios abëtanbia Nucën ꞌIbu Jesucristonën mitsu isi cuanti nu ꞌaquinti cananuna cuëënin.

¹² Mitsúnmi bëráma ꞌicësamairai upitiira bëtsibë nuibananquin raíri uniribi nuibanuan, Nucën ꞌIbu Jesucristonën mitsu ꞌaquinti cananuna cuëënin, usai ꞌiquinmi nun mitsu ꞌacësaribi oquin mitsun camabi uni nuibanun.

¹³ Usoquian an ꞌaquincëxmi asérabi a ꞌinamëcë ꞌaish ami cushicë ꞌicëa, Cristo aín unicamabë utëcëncëbëtan, Nucën Papa Diosan añu ꞌuchañumabi ꞌicë mitsu isti cananuna cuëënin.