1 Tesalonicenses 2 - Kashibo-Kakataibo Biblia

Tesalónica ëmanu ꞌicë unicama Pablonën bana ñuixuan

¹ Nun xucë́antu, mitsúnbi camina, nun bana ñuixuncëxun asérabi cuaxun ꞌunanin, nux cananuna mitsu isi ñancábi cuancëma ꞌai quixun.

² Filipos ëmanuxun ca nu ñui ꞌatimati bananan bëtsi bëtsi oquin unin nu tëmëramiaxa quixun camina ꞌunanin. Usai tëmëratancëxunbi cananuna Nucën Papa Diosan ꞌaquincëxun mitsuribi Jesucristomi catamëti ca uni Nucën Papa Diosnan ꞌiti ꞌicë quixun a bana ñuixuan, ꞌaisamaira uníxa numi nishcëxunbi.

³ Nun cananuna Jesucristo ñuiquin bëtsi oquin uni bana ñuixuncëma ꞌain. ꞌImainun cananuna ꞌatimaquin sinanx banaquin uni paráncëma ꞌain.

⁴ Usama ca, Nucën Papa Diosanbi ca asérabi caranuna aín bana uni ñuixunti ꞌai quixun upí oquin ꞌunántancëxun —atun ca asérabi ꞌati ꞌicë —quixun sinánquin aín bana unicama ñuixunun nu cacëxa. Usaquin ꞌanun cacë ꞌixun cananuna an —Jesucristomi catamëti ca uni Nucën Papa Diosnan ꞌinux ië́ti ꞌicë —quixun unicama ñuixunin. Usaquin ꞌaquin cananuna Jesucristo ñuiquin unicama cuëënmiti sinánquinma, Nucën Papa Dios, an camabi unin nuitu ꞌunáncë, axëshia cuëëntanun uni bana ñuixunin.

⁵ Mitsúnbi camina ꞌunanin, uisa ꞌaíshbi cananuna mitsúnmi nux cuëëncësa oquin nu ñu ꞌaxúnun quixun sinani cëmëi banacëma ꞌain. Mitsun curíqui binuxun cananuna mitsu paráncëma ꞌain. Nucën Papa Diosanbi ca usai ꞌia nu isaxa.

⁶ Uisa nëtë́nbi cananuna, raíri unicamanribia ꞌamainun camina mitsúnribi nu rabiti ꞌai quixun sináncëma ꞌain. Unin ca nun nu asérabi Cristonën xucë ꞌixun aín bana ñuixuncëxun upí oquin a bana cuaquin nun cacësabi oquinshi ꞌati ꞌicë quixun ꞌunánxunbi cananuna unían nu rabiti sináncëma ꞌain.

⁷ Nun cananuna xanúan aín tuá chamara ꞌicë anun cuëënquin ꞌacësa oquin, ꞌitsaira nuibaquin mitsu ꞌaquian.

⁸ Usa ꞌixun cananuna ꞌitsaira nuibaquin, Jesucristomi catamëti ië́ti banaishi ñuixunquinma Nucën Papa Diosan nu ꞌunánmicë ñucamaribi mitsu ꞌunánmisaira tan. Usa ꞌixun cananuna nuibairaquin mitsu ꞌitsaira sinanin.

⁹ Nucën xucë́antu, mitsun camina ꞌunanin, nun cananuna pitiñuma ꞌianan nun curíqui cëñuti rabanan tëmërai atsánquinbi ñu mëëan. Micama uinu ꞌicë uníxbia nu ñu ꞌináncasi bënë́nunma cananuna nëtën ꞌanan, imë́ribi nun cuëëncë ñu biti cupí usoquin ꞌan. ꞌAnan cananuna Jesucristomi catamëti ca uni Nucën Papa Diosnan ꞌiti ꞌicë quixun caquin mitsu bana ñuixuan.

¹⁰ Mitsun camina ꞌunanin, Nucën Papa Diosanribi ca ꞌunania, nux cananuna mitsúxmi Jesucristomi catamëcë ꞌain mitsubë ꞌixun uisa ñu ꞌatimabi ꞌaima upí ꞌia quixun. Usai ꞌia ca uinu ꞌicë unínbi nu ꞌuchocëma ꞌicën.

¹¹ Usaribi oquin camina ꞌunanin, unían aín bëchicë ꞌacësaribi oquin cananuna mitsu achúshi achúshi upí oquin sinánmiquin ꞌësëa quixun.

¹² Mitsúxmi Nucën Papa Dios, axa upíira, ax mitsubë ꞌain, aín nëtë upí anu abë ꞌiti sinani, an sinánmicësabi oíshi aín uni ꞌaish ꞌinun quixun cananuna mitsu upí oquin ꞌësëquin ꞌunánmian.

¹³ Nun Nucën Papa Dios cuëëncësabi oquin aín bana ñuixuncëxun cuaquin camina —a banax ca unínbi sináncëma ꞌicën, asérabi Nucën Papa Diosan sinánmicëxun ca nu ñuixuncania —quixun sinan. A banax asérabi ainan ꞌain camina mitsux a cuati Nucën Papa Diosnan ꞌain. Mitsux usai ꞌia ꞌunánquin cananuna nëtë́quinma a —asábi ca —quixun caquin rabin. Mitsúnmi —a banax ca asérabi ꞌicë —quixun cuatia ca Nucën Papa Diosan ainan ꞌinun mitsu ꞌimiaxa.

¹⁴ Nucën xucë́antu, mitsux camina Judea menuaxa Jesucristomi catamëti Nucën Papa Diosan unicamax ꞌicësaribi ꞌain. Acama ca aín aintsi ꞌixunbi judíos unicaman bëtsi bëtsi ocëxa. Usaribi oquin ca mitsuribi mitsun aintsinbi bëtsi bëtsi oxa.

¹⁵ Aín raran bëráma an Nucën Papa Dios quicë bana uni ñuixuncë uni raíri ꞌásaribi oquin ca Judeanu ꞌicë unin Nucën ꞌIbu Jesús ꞌacëxa. Usa ꞌixun ca nuribi nun bana cuaisama tanquin aín ëmanuax cuantánun quixun bëtsi bëtsi ocëxa. Usa ꞌaish ca Nucën Papa Dios cuëëncësa oquin ꞌati sinanima unicamamiribi nishia.

¹⁶ Nun judíosma unicama Cristomi sinánun bana ñuixuinsa taniabi ca usaquinu bana ñuixunun nu ëncëma ꞌicën. Usai ꞌia aín ꞌucha cëxtutia ca Nucën Papa Diosan ꞌaisamaira oquin castícanti ꞌicën.

Tesalónicanu ꞌicë unicama isía Pablo cuainsa tan

¹⁷ ꞌËn xucë́antu, mitsubë ënanantancëxun cananuna isquinmabi mitsu ꞌitsaira sinanin. Usa ꞌaish cananuna mitsu isi cuainsaira tanin.

¹⁸ Cuanti cananuna sinan. Raírinëxa cuancëbëmabi, cana ꞌëxëshi ꞌitsai mitsu isi cuainsa tan. Usa ꞌaínbi ca ñunshin ꞌatimanën ꞌapun nux cuanti bëaraxa.

¹⁹ ¿Nucën ꞌIbu Jesucristo ucëbëtan añu isti caranuna cuëënin? Abë ꞌicë mitsu isi cananuna cuëëinra cuëënti ꞌain, nun mitsu aín bana ñuixuncë cupí camina abë ꞌai quixun sinani.

²⁰ Nun ꞌaquincëxmi upiti Jesucristomi catamëcancë cupí cananuna cuëënquin upí oquin sinanin.