1 Tesalonicenses 1 - Kashibo-Kakataibo Biblia

Pablonëan abë ꞌicë unicamabëtan Tesalónicanuaxa ax Jesucristomi catamëcë unicama quirica cuënëoxuan

¹ ꞌËx Pablo ꞌixun cana Silvano ꞌimainun Timoteobëtan Tesalónica ëmanuaxmi Nucën Papa Dios ꞌimainun Nucën ꞌIbu Jesucristonan ꞌicë, mitsu ënë quirica buánmin. Nucën Papa Dios ꞌimainun Nucën ꞌIbu Jesucristonëan nuibaquin chuámarua ꞌaíshmi bucunun mitsu ꞌaquinti cananuna cuëënin.

I. USAI CA AX ꞌIAXA QUIXUAN PABLONËN ÑUIA BANA (1.3-3.13) Tesalónicanu ꞌicë unicaman ca upí oquin Jesucristo ñuicë bana cuatia quixuan Pablonën ca

² Mitsúxmi asérabi Nucën ꞌIbu Jesucristomi cushicë ꞌain cananuna camabi nëtën abë banaquin —asábi ca —quixun cain.

³ Nucën Papa Diosbë banaquin cananuna mitsúnmi amiira pain catamëquin ax cuëëncësabi oquin ꞌanan, upí oquin unicama nuibaquin ꞌaquianan, a ëníma, Nucën ꞌIbu Jesucristonën ca ax quicësabi oquin nu ꞌimiti ꞌicë quixun manucëma cupí —asábi ca —quixun a cain.

⁴ Nun xucë́antu, asérabi ca Nucën Papa Diosan nuibaquin ainan ꞌinun mitsu caísaxa quixun cananuna ꞌunanin.

⁵ Jesucristomi catamëti ca uni Nucën Papa Diosnan ꞌiti ꞌicë quixun bana ñuixunquin cananuna nun cuëbitainshi banaquinma, aín Bëru Ñunshin Upitan nu sinánmicëx Nucën Papa Diosmi cushicë ꞌixun aín bana mitsu ñuixuan. Nun ñuicë banax ca cëmëma ꞌaish asérabi ꞌicë quixun ꞌunáncë ꞌixun cananuna upí oquin a bana mitsu ñuixuan. Mitsúxmi upí ꞌiti cupí cananuna mitsubë ꞌaish usai ꞌia quixun camina ꞌunáncanin.

⁶ Nux ꞌicësaribiti ꞌianan Nucën ꞌIbu Jesús ꞌiásaribiti tëmëraibi camina mitsux Jesucristo ñuicë bana cuati ainan ꞌaish Nucën Papa Diosan Bëru Ñunshin Upitan ꞌimicëx cuëëinra cuëëan.

⁷ Tëmëraibi usari ꞌi camina mitsux Macedonia menu ꞌicë ꞌimainun Acaya menu ꞌicë axa Jesucristomi catamëcë unicaman cuacëx upíira sinánñu ꞌain. Usaími ꞌia mitsu cuaquin ca —usai ca Jesucristonan unicama ꞌiti ꞌicë —quixun sináncania.

⁸ Usaími mitsux ꞌicëbëtan ca Macedonia ꞌimainun Acayanu ꞌicë unicamainshima, bëtsi bëtsi menu ꞌicë unicamanribi Jesucristo ñuicë bana ꞌunánan mitsúxmi asérabi Nucën Papa Diosnan ꞌicë cuaxa. Nun ñuixuncëxunmabi ca camabi unin, uni raírinëan camabi menuxun mitsu chanioia cuaquin, mitsux camina asérabi Nucën Papa Diosmi upiti catamëti quixun ꞌunania.

⁹ Usa ꞌixun ca nun cacëxunmabi mitsúnmi nu upí oquin bicë a ñuia. Ñuianan ca mitsux ismina unínbia ꞌacë ñuishi rabia ꞌixunbi a ënquin, axëshia Dios ꞌaish bamatimoi tsócë Nucën Papa Dios, ashi rabianan ax quicësabi oi ꞌi quixun ñuia.

¹⁰ Acama ñuianan ca mitsun camina Nucën Papa Diosan Bëchicë Jesús bamacëbia anbi baísquimia, axa naínuax uti caini quixunribi ñuia. Ax ca an Nucën Papa Diosan, uni aín ꞌucha cupí castícancëbëtanbi, ainan ꞌicë nu ië́miti a ꞌicën.