1 Samuel 9 - Kashibo-Kakataibo Biblia

Saúlbëa Samuel mëranan ñuikë bana

¹ Anua Benjamín kakë uni aín rëbúnki tsókë anu ka achúshi uni Quis kakin anëkë ꞌiakëxa, ax ka Abiel kakë uni ꞌain bakë bëchikë ꞌianan Seror kakë aín xutaribi ꞌimainun; ka aín xuta itsi Becorat ax Afíah aín bëchikë ꞌiakëxa. Quis ax ka unin uisakinbi kakëma uni ꞌiakëxa,

² ax ka aín bakë bëchikë achúshi bëná uni a iskësabi ꞌikëa Saúl kakin anëkë ꞌiakëxa. Usa ꞌain ka uinu ꞌikë israel uni achúshibi a iskësaribi ꞌianan, ꞌain chaxkë́bëtan sënën ꞌaíma ꞌiakëxa.

³ Achúshi nëtën ka Quis kakë uni aín burro xanukama nëtë́akëxa. Nëtë́kë ꞌain ka ain bëchikë Saúl kakëxa: —Mënioka kiani kuanxun kamina nun burro xanukama raíri nëtë́kë a bari kuanti ꞌain. Kuankin kamina an nu ñu mëëxunkë uni achúshi buánti ꞌain.

⁴ Usakin kakëx mëníoka kiani ka Saúl Efraínën rëbúnki ꞌain bashi a inubiani kuankin Salisá kakë me ꞌunánkë a inubiankëxa; inubiani kuankinbi ka aín burro xanukama mërama ꞌikën. Mërakinma Saalim kakë me a inubiani kuanxun Benjamínën rëbúnkinën me anuaribi barikinbi ꞌaíma okëxa.

⁵ ꞌAima obiani Suf kakë me anuribi kuani bëbakin ka an ñu mëëmikë uni abë kuankë a Saúlnën kakëxa: —ꞌAima ka usa ꞌain kananuna ënushi bërukiani kuantëkënti ꞌain, ꞌën papa sapi ka numi ꞌaisamaira sinania burro xanukamami ꞌikësamaira usa ꞌain kananuna kuantëkënti ꞌain.

⁶ Kakëxun ka an ñu mëëxunkë uni abëa kuankë an kakëxa: —Ënë ëmanu ka uni achúshi an Dios kikë bana uni ñuixunkë kamabi unían aín bana tankë ꞌikën, usa ꞌain ka ax kikësabi oi ñu ꞌia. Anu kananuna kuanti ꞌain, an sapi ka anun a bari kuanti bai nu ñuixunti ꞌikën.

⁷ —Asabi ka anu kananuna kuanti ꞌain kixun ka —Saúlnën kakëxa—. ¿ꞌAínbi karanuna añu uni a buánxunti ꞌain? Nun a piti ñubi ka pishanu ꞌaíma ꞌikën. Añu karanuna an Dios kikë bana uni ñuixunkë a ꞌinani kuanti aín.

⁸ Kakëxun ka an ñu mëëxunkë unin kakëxa: —ꞌËx kana manë kuríki chukúma achúshiñura ꞌain. A kananuna an Dios kikë bana uni ñuixunkë uni anun kuanti bai nu isminun katankëxun ꞌinánti ꞌain.

⁹ (Bërámaira ka israel unikamax Diosbë banatisa tani kiakëxa.) “An Dios kikë bana uni ñuixunkë kananuna isi kuanti ꞌain.” “Usa ꞌaínbi ka bërí usa unikama an Dios kikë bana uni ñuixukë kakin anëia” (bërámaira ka an Dios kikë bana uni ñuixunkin kakin anëkë ꞌikankëxa).

¹⁰ —Asabi ka kixun ka —Saúlnën kakëxa—. Anu kananuna kuanti ꞌain. Kanantankëx ka a rabëtabi anua an Dios kikë bana uni ñuixunkë uni ꞌikë ëma anu kuankëxa,

¹¹ kuani mapërakëkiani ëma ami kikiani kuankëbëbi ka ꞌumpax bitsi rikuatsinia mërakin xanu chipashkama ñukákëxa: —¿Ënua karana an Dios kikë bana uni ñuixunkë uni a mërati ꞌain?

¹² Kakëxun ka xanu chipashkaman kakëxa: —Anu ka ꞌaínbi ka ꞌuripain kuankënu ꞌikën. Usa ꞌain kamina bënë́kiani kuanxun ënë ëmanu ꞌikë unikaman Dios ñuina rëxun xaroxunkë anua bërí kuankëmashi isi kuanti aín.

¹³ Usa ꞌain kamina anu nukúkinshi mitsun uinu kara ax ꞌia bariti ꞌain, anuxua ñuina xarokin piti ꞌakë anu kuankëmashi. Unikaman ka axa kuankëmapan ꞌain masima pitima ꞌikën. An pain upíokin sinánxunia ka unikaman ñuina nami xarokë a piti ꞌikën, usoia ka axa kamikëx rikuatsinkë unikaman piti ꞌikën. Usa ꞌain kamina bënë́kiani kuanxun anua mërai kuanti ꞌain.

¹⁴ Usakian kakëx ka mapërakëkiani ëma ꞌikë ami kikiani kuankëxa. Kuani bëbai kuankëbëbi ka Samuel ami kikuatsini, anua pinux timëkankë anu kuani chikíkuatsini uakëxa.

¹⁵ A pëkarakëbë Saúl a ëmanu bëbanun ka Nukën ꞌIbun namámikësokin Samuel ësokin kakë ꞌiakëxa:

¹⁶ “Imë́ishi ënë horanbi kana achúshi, Benjamínën rëbúnki aín menu tsókë xuti ꞌain, akamina ꞌain maxkánu xëni chikukin mamëti ꞌain, ax ka Israel unikaman ꞌapu ꞌiti ꞌikën. An ka filisteo unikaman ꞌatimoiabi ꞌën uni Israelkama ꞌakinti ꞌikën, ꞌënbi kana ꞌitsaira tëmërai kikania kuakin atu ꞌakinti sinan.”

¹⁷ Usa ꞌain ka Samuel, Nukën ꞌIbun Saúl kuania isia kakëxa: “A ñuikin ꞌën mi koonkë uni a ka aia. Ax ka ꞌën unikaman ꞌapu ꞌiti ꞌikën.”

¹⁸ Usa ꞌain ka anun ëmanu atsintimi kikuatsini ukin ꞌurama okëxun Saúlnën Samuel kakëxa: —ꞌË kamina min uinu kara an Dios kikë bana uni ñuixunkë uni ain xubu ꞌikë kamina ꞌë kati aín.

¹⁹ —“ꞌËx kana an Dios kikë bana uni ñuixunkë a ꞌain —kixun ka Samuelnën kakëxa—.” Anua timë́kankënu kamina kuanti ꞌain, bërí kamina anuxun ꞌëbëtan piti ꞌain. Imë́ishi pëkarakëma ꞌaínshi kana ꞌë katimi sinánkë banakama a mi kati ꞌain, katankëxun kana mi xuti ꞌain.

²⁰ Min burro xanukama axa nëtë́kë ka rabë́ ꞌimainun achúshi nëtë ꞌikën, usa ꞌaínbi kamina ami ꞌitsaira sinántima ꞌain, akama ka bëtsi unin mëraxa. Kamabi Israel kamax ka min xubunu mibë ꞌikë min aintsi achúshinëx ꞌapu ꞌiti kuëënia.

²¹ Kakëxun ka Saúlnën kakëxa: —¡ꞌËx kana Benjamínnën rëbúnki ꞌain, usa ꞌaínbi kana ꞌëx Israelkaman ꞌanákaira ꞌain! ꞌImainun ka ꞌën aintsikama Benjamínën rëbúnki ꞌikëbi ñuumara ꞌikë unin isia. ¿Uisa kupí kaina ësokin ꞌë kain?

²² Ësokin kakëxun ka Samuelnën Saúl an ñu mëëxunkë uni akëñun bibiankin, anua pinux timëkamë ꞌëokankë anu buánxun nuküakëxa, nukuxun ka Samuelnën Saúl abëa kuankë an ñu mëëxunkë uni akëñun, anua ñuina xarokë pinux uni timë́kë aín kataitsi anu buánkëxa, buánxun ka anua treinta uni ain kushibu tsókë ꞌikë anu upí ñunu tsónpankëxa:

²³ Usoxun ka Samuelnën an piti ꞌarukë uni a kakëxa: ꞌËn mi nanxunun mi ꞌinánkë nami a kamina ꞌë bëxúnti ꞌain.

²⁴ Kakëxun ka bënë́kinshi an ñu ꞌarukë unin ñuina ꞌarukë aín kisi achúshi bitsínkin bëxun Saúl ꞌinánkëxa. ꞌInánkëxun ka Samuelnën kakëxa: —Ënëx ka ꞌën mi nanxunkë ꞌikën. Unikama kamikin kana mi pikinti a amo nan. Usakin ka Saúlnën a nëtën Samuelbëtan piakëxa.

²⁵ Usokin piíkin sënë́obëtsini ka anuax Saúl uakëxa, ukë ka anua ꞌuxti xubu manámi Saúl mëníoxuankëxa,

²⁶ mëníoxunkëx ka anu Saúl ꞌuxakëxa. ꞌUxnë́tia pë́karakë ka Samuelnën xubu manánua kuënxun Saúl kakëxa: —Kamina mi kuanun mëníokati ꞌain. Kixun kakëx ka Saúl abëa kuankë an ñu mëëxunkë uni a ꞌimainun Samuelbë ëman chikíakëxa chikíkiani ka ëma uri kuankëxa,

²⁷ kuankëbë abë ëmanuax chikíkiani kuankin ka Samuelnën Saúl kakëxa: —Min ñu mëëmikë uni a kamina axpain rëkuë́nkianun xuti ꞌain, ꞌë pain kamina kaínti ꞌain, ꞌën kana Diosan usakin mi kanun ꞌë kakë bana mi kaisatanin.