1 Samuel 7 - Kashibo-Kakataibo Biblia

¹ Usa ꞌain ka Quiriat-jearim ëmanu bukukë unikama raírinën utankëxun bunántisa okin ꞌakë kurin ratakakakë Nukën ꞌIbunan a bibiankin aín bashi anua Abinadabnën xubu ꞌikë anu buáruxun mëníokin nankëxa, usakin nantakëxun ka Eleazarnën bëchikë an bërúanun kixun upíokin ꞌësëkin katankëxun ëankëxa.

Samuelnën aín ꞌapu ꞌixun Israel unikama ꞌakian ñuikë bana

² Usa ꞌain ka Quiriat-jearimnu ꞌikë ëmanu veinte baritia ꞌimikin bunántisa okin ꞌakë anua Diosan bana kuënëokë ꞌarukë a bixun, ꞌarakamainun Israel kamax uisakin kara Nukën ꞌIbun atu ꞌakinti ꞌikë kixun ꞌitsaira sinani masá nuitukankëxa.

³ Usa ꞌain ka Samuelnën kamabi israel unikama kakëxa: “Mitsun asérabi mitsun nuitubëtanbi sinánkin a rabikin kamina bëtsi menu tsókë unikaman rabikë diosmi rabikankë a ënkin mitsun ꞌarakakë Astarté tankin ꞌakë a bixun nikanti ꞌain, usakin ꞌatankëxun kamina Nukën ꞌIbu rabikin ax kuëënkësabi okin ꞌakánti ꞌain. Usakin ꞌakëxun ka mitsu filisteo unikama ꞌatima oia chikínti ꞌikën.”

⁴ Usakia kakëxun ka israel unikaman atunbia Baal ꞌimainun Astarté tankin ꞌakëa rabikë ñukama a putankëxun Nukën ꞌIbu ishi rabitëkënkankëxa.

⁵ Usokin ꞌatankëxun ka Samuelnën, an timë́kanun kixun kati uni xuakëxa: “Xukëxun kakëx uax Mispá kakë ëmanu timë́kankëxa, anuxun ka Nukën ꞌIbu ꞌakinun ñukáxuankëxa.”

⁶ Usakin kamikëx ka israel unibu Mispá kakë ëmanu timë́kankëxa, anuxun ka raíri unikaman ꞌumpax bitankëxun a ꞌinaishikësa ꞌitánun menu ampë́nkakëxa. Usakin ꞌakë ax ka Nukën ꞌIbu ꞌinaishiti nankë ñu ꞌiakëxa. Usakin ꞌatankëxun ka a nëtën unikama añu ñubi pima samákin atun ꞌuchakëkama Nukën ꞌIbu chikinaxunkankëxa. Anuxun ka Samuelnën Mispá kakë ëmanuxun Israel unikama aín ꞌapu ꞌixun atu ꞌakinkin pëuakëxa.

⁷ Usai ꞌia israel unikama Mispá kakë ëmanu timëkankë ka filisteo ꞌapukaman kuakëxa, kuabiani ka atu ꞌatëkënkatsi kiax aín suntárukama buani rikiankëxa. Usai rikiania kuati ka israel unikama ꞌitsaira atumi rakuë́akëxa,

⁸ usai ꞌikin ka Samuel kakankëxa: “Nukën Ibu nu ñukaxunkin kamina ëntima ꞌain, an ka filisteo unikaman ꞌati ꞌikëbi nu ië́miti ꞌikën.”

⁹ Usakin kakëxun ka Samuelnën achúshi oveja ꞌain tuá bërí kanikë bitankëxun Nukën ꞌIbu ꞌaímai këñutanun raroxuankëxa; xaroxunkin ka Israelkama ꞌakinun Nukën ꞌIbu ñukáxuankëxa, usakin ꞌakëxun ka Nukën ꞌIbun an ñukákësabi okin ꞌakiankëxa.

¹⁰ Usakian Samuelnën oveja tuá bërí kanikë ꞌaímai këñutanun xaromainun ka filisteo suntárukamax israel unikama ꞌakatsikiax atu ꞌurama obëtsini ukankëxa; usai ꞌikëbëtanbi ka Nukën ꞌIbun naínuax kanákamë ꞌëo kushiira banai sharákirui atu rapasu ꞌibúnun ꞌimikëbë ratúkankëxa, usai ꞌikëbë ratuti ka filisteo suntárukamax anuaxbi abákankëxa, usakin ꞌakëx ka israelnën suntárukaman ꞌakësa ꞌinun filisteo unikama abákëxa.

¹¹ Usai abákëbë ka israel suntárukama Mispá kakë ëma anuaxbi kuankin nuibiankin abë ꞌakanankin nukuxun filisteo unikama atu kupitanuma ꞌakin, Bet-car kakë ëma anu bërúkin ꞌakëxa.

¹² Usakin ꞌan ka Samuelnën achúshi mapara chaiira bixun Mispá kakë ëmabëa Sen kakë me sënënakëkë anu nitsíankëxa, nitsintankëxun ka Eben-ézer kakin anëakëxa anëi ka ësai kiakëxa: “Bërí ka ënuxun Nukën ꞌIbun nukama ꞌakianxa kiax kiakëxa.”

¹³ Usakin ka Israel suntárukama filisteokaman ꞌakëxa, usakian ꞌakëx ka amiribishi Israel kaman menu kuantëkëama ꞌikën; usa ꞌain ka Samuel atubë tsókëpan ꞌain filisteo unikaman atu ubioxuma ꞌanun Nukën ꞌIbun ꞌimiakëxa.

¹⁴ Usakin ka filisteo unikaman ꞌibua ꞌikëbi israel suntárukaman atubë ꞌakanankin ꞌatankëxun, Ecrón anuxunbi Gat kakë ëma anu sënë́nbi bitëkëánkëxa, biax ka a menu Israel kama tsótëkëankëxa. Usakin atu ꞌaxun ka israel unikaman amiribishi filisteo unikaman bia ꞌikëbi atun me bitëkëánkëxa, bitankëx ka israel unikama Amorreo unikamabë nishananima upitax tsóakëxa.

¹⁵ Samuel an ka Israel kama atun ꞌapu ꞌixun aín ñuti nëtë ꞌitámainun ꞌakiankëxa,

¹⁶ usa ꞌaish ka baritia tibi Betel ëmanu kuanan, Guilgal ꞌimainun Mispá kakë ëma anuribi kuankin uisai kara Israel kama ꞌia isanan atux anua tsókë ëmakamanu kuankin bana ñuixuni niakëxa.

¹⁷ Usai akama oi nikin atu istánkëx ka anua aín xubu ꞌikë Ramá kakë anubi utëkëankëxa, anuxun ka Israel kama atun ꞌapu ꞌixun ꞌakiankëxa. ꞌAnan ka anuxun ñuina xaroti achúshi maxax bukunrukin Nukën ꞌIbu ꞌaxuankëxa.