1 Samuel 6 - Kashibo-Kakataibo Biblia

Filisteo unibunën Israel unikama bunántisa okin ꞌakë kurin ratakakakë anua Diosan ñukama ꞌarukë ꞌinantëkëan bana

¹ Anua bunántisa okin ꞌakë kurin ratakakakë anua Nukën ꞌIbun ñukama ꞌarukë ax ka mapai achúshi ꞌimainun rabë́ ꞌuxë filisteo unikaman menu ꞌiakëxa.

² Usa ꞌain ka filisteo unikaman sacerdote ꞌimainun an ñunshina ꞌamikëxun ñu tankë unikama ñukánun timë́nun kakëxa: —Kakë́xa timë́kë ka ñukákëxa, ¿Uisa karanuna anua Diosan ñukama ꞌarukë bunántisa okin ꞌakë kurin ratakakakë ënë oti aín? Uisokin karanuna anua bëkë anubi buántëkënun xuti ꞌain kamina nu kati ꞌai kixun ñukákëxa.

³ Ësokia ñukákëxun ka atún kakëxa: Israel unikaman ꞌIbun bana anu ꞌarukë bunántisa okin ꞌakë kurin ratakakakë a ꞌinántëkënkin ka usabi xutima ꞌikën, uisabi oxuma ka nukama ka ꞌatima oxa usa kupí Diosan bana anu ꞌarukë bunántisa okin ꞌakë a numa ꞌatima otëkënia ñu anu ꞌaruxun xukë ꞌiti ꞌikën. Usokin ꞌakëbëa mitsun ku ꞌirukëkama a pëxkukin kamina Diosan ka nu ënkinma ꞌatima oxa kixun ꞌunánkanti ꞌain.

⁴ Kakëxun ka atun kakëxa. —¿Añu karanuna nua nishkin ꞌatima oxunma ꞌanun ꞌaxúnti ꞌain? —kixun ka filisteo unikaman ñukákëxa. —Ñukákëxun ka mapai achúshi kuri ku tankin ꞌaxúnun —kixun sacerdote unikama kakëxa—, kanan ka achúshi achúshi mitsun ꞌapu ꞌaxuanan ka mapai achúshi makún tankinribi a manëbi ꞌati ꞌain, mitsux kamina a ꞌinsínan mitsun ꞌapubëbi tëmërakani kixun kakëxa.

⁵ Usokin kamina ku tankin kuri ꞌanan makún tankinribi ꞌati ꞌain, nun menu ñu ꞌapákëkamama këñuia ꞌati ꞌain, usokin kamina Israel unikaman Dios rabiti ꞌain; usokin ꞌakëbëtan sapi ka nu ꞌatima okë ëanan nun diosribi ꞌanan me ꞌatimokë a ënti ꞌikën.

⁶ Uisa kupí kaina mitsun bana kuakëmasa oi egipcio unikama ꞌimainun faraón ꞌiásai ꞌikanin, atuxka Israel unikama Diosan ꞌatimokëxun aín menua chikinuxun bana kuatima ꞌia usai ꞌikanin.

⁷ Usa ꞌain kamina mitsun carreta ió achúshi ꞌanun ꞌamiti ꞌain; ꞌamikëxun sënë́on kamina vaca ꞌarakakë tuá achúshiocë rabë́ uínsaranbi me tukamikin tankëma bixun a rabë́bi ꞌain manchanmi i tërë́katankëxun amibi carreta tëkërëkati ꞌain; ꞌaínbi kamina aín tuákën vaca nuibianun ꞌamikinma anuxun pimikë xubunubi aín tuá xëputi ꞌain.

⁸ Usokin ꞌatankëxun kamina bunántisa okin ꞌakë kurin ratakakakë anua Diosan bana ꞌikë a carretanu ꞌaruti ꞌain, ꞌaruanan kamina achúshi caja kuri ñu tankin ꞌakë aribi bunántisa anua Diosan bana ꞌikë amo upíokin ꞌaruti ꞌain, Diosan nishkin nukama ꞌatimokin tëmëramitima kupín ꞌaxunkë a ꞌaruti ꞌain. ꞌAruxun kamina axia carreta kuantanun ënti ꞌain.

⁹ ꞌAínbi kamina ësokin ꞌunánti ꞌain: vaca rabë́ axa Bet-semes anua Israel unikama me sënë́nkë au kikiankin carreta uankë ax ka Israel unikama aín Diosan nu ꞌatimokin nu tëmëramikë ꞌikë kixun ꞌunánti aín; ꞌaínbia vaca rabë́ ax anua ain tuá ꞌikë xubu ami kikiani kuankëbëtan kananuna, ax ka an nu tëmëramikëma, nuxnu usai ꞌiti ꞌain ka ꞌia kixun ꞌunánkanti ꞌain.

¹⁰ Usokin kakëxun ka filisteo unikaman usabi okin ꞌakëxa. ꞌAkin ka vaca rabë́ bitankëxun aín tuá pain anuxun pimiti xubunu xëpúakëxa, xëpúxun ka rabë́bi tëkërëkaxun ami carretaribi tëkërëkakëxa;

¹¹ tëkërëkaxun ka carretanu bunántisa okin anua Diosan bana ꞌarukë kurin ratakakakë a ꞌaruanan bunánti chukúma anua kuri makún tankin ꞌanan ku tankin ꞌakë aribi ꞌaruakëxa.

¹² ꞌArukin sënë́onkëbë ka vaca rabë́ ax Bet-semes kakë menu anun kuanti bain ami kikiani ꞌain tuá kuëëni vaca ꞌinkësai ꞌikiani kuani, amo pátsinima a puntëishi kuankëxa. Kuamainun ka mapai achúshi filisteo ꞌapukama ax, a kaxú kuani Bet-semes kakë me sënënakëkë anu a nuibiani kuankëxa.

¹³ Usokin ꞌabiani kuanmainun ka Israel unikama Bet-semes me sapannu tsókë raírinën trigo bimi biakëxa, bikinbi ꞌurakëo bunántisa okin ꞌakë anua Diosan bana ꞌikë a buánkania mërai ka ꞌitsaira kuëënkankëxa.

¹⁴ Kuëënkëbë ka carreta anua Josuénën me Bet-semes ꞌikë anu nirakëakëxa. Anua maxá chaiira ꞌikë anubi nirakëakëxa. Nirakëkëbëtan ka Bet-semes anu tsókë unikaman carreta ꞌakë ꞌi abi karuaxun anun vaca rabë́ a ꞌaímai këñutanun Nukën ꞌIbu xaroxuankëxa.

¹⁵ Usokian ꞌanun ka levita unikaman bunántisa okin ꞌakë anu Diosan bana ꞌarukë a pain nanpanan, bunánti chukúma anua kuri ñu tankin ꞌakë purukë a maxá chaiira kamanan nanpákëxa; a nëtën ka Bet-semes anu tsókë Israel unikaman Nukën ꞌIbu ñuina rëxun ꞌaímai këñutanu xaroxuanan bëtsi ñukamaribi xaroxuankëxa.

¹⁶ Ësokin ꞌaia isbiani ka mapai achúshi filisteo ꞌapukama ukë ax a nëtënbi Ecrón kakë ꞌain ëmanubi kuantëkëankëxa.

¹⁷ Mapai achúshi okin kuri ku tankin ꞌakë ax ka filisteo unikaman Nukën ꞌIbun atun ëma Asdod, Gaza, Ascalón, Gat, ꞌimainun Ecrón akama ꞌatimokin tëmëramitima kupí ꞌakë ꞌiakëxa;

¹⁸ ꞌimainun ka makún tankin kuri ꞌakëkama ax ka filisteo unikaman ëma mapai achúshi abëtan sënën ꞌinánan ëmakama ënënmenma buinarakin kënëkë a ꞌimainun ëma chukúma kënëkëma akamabëtan sënën ꞌakë ꞌiakëxa. Maxá chaiira akamanan bunántisa okin ꞌakë kurin ratakakakë nan ax ka anua Josuénën me ꞌikë, Bet-semes anua bëríbi istisa ꞌikën.

¹⁹ ꞌAínbi ka Nukën ꞌIbun Bet-semes anu tsókë unikama raíri bunántisa okin ꞌakë ꞌain namë isia bamanun ꞌimiakëxa. Usokin ꞌakin ka setenta nukëbënë uni Nukën ꞌIbun këñuan ka anun rabanan anu tsókë unikama inkankëxa Diosan usakin atu ꞌimikë ꞌain.

²⁰ Usokin an ka Bet-semes anu tsókë unikama kiakëxa: ¿Uin kara anubi nixun Nukën ꞌIbun ax upíira ꞌixun ꞌatimokëxun tënëti ꞌik? ¿Uimi okin karanuna bunántisa okin ꞌakë anua Diosan bana ꞌikë ënë numa ꞌatimoia xuti aín?

²¹ Ësai kitankëxun ka anu ꞌikë unikaman Quiriat-jearim anu tsókë unikama ësokin kamiakëxa: filisteo unikaman ka bunántisa okin ꞌakë anua Diosan bana ꞌikë kurin ratakakakë a bëtëkëanxa, usa ꞌain kamina bitsi ꞌukanti ꞌain kixun kamiakëxa.