1 Samuel 5 - Kashibo-Kakataibo Biblia

Bunántisa okin ꞌakë a bibiankin filisteo suntárukaman atun menu buankan ñuikë bana

¹ Usakin atu ꞌaxun bixun ka bunántisa okin ꞌakë anua Diosan kushi ꞌikë a filisteo unikaman Eben-ézer anuxun bibiankin atun ëma Asdod kakë anu buánkëxa;

² buánxun ka Dagón kakë diosan xubunu atsímiakëxa, atsímixun ka a dios rapasu nankëxa.

³ Nónkë a pëkarakëma ꞌaínshi anuxun Dagón rabikë xubunu kuankinbi ka Asdodnu tsókë unikaman pakëax menu anua Nukën ꞌIbun bana kuënëokë ꞌarukë bunántisa okin ꞌakë kurin ratakakakë a bëtánain rakákë mërai ratúkankëxa, ratúkin ka biruxun anua ꞌikë anubi nitsintëkëankëxa.

⁴ Usakin nitsinbiani koonx rikuatsintëkënkinbi ka Asdod ëmanu tsókë filisteo unikaman amiribishi pakëax atun dios Dagón kakë ax bunántisa okin ꞌakë kurin ratakakakë bëtánain menu rakákë mëratëkëankëxa. ꞌAínbi ka aín maxká ꞌimainun ꞌain mëkën rabë́ xubu xëputi ꞌakin tarakankë ami ꞌi tëkëax anubi rakákë mërakëxa. Mëramainun ka ꞌain namishi uisaibi ꞌikëma rakákë ꞌiakëxa.

⁵ Usa ꞌain ka bëríbi uinsaran kara Dagónën sacerdotekama ax anuxun Asdod rabikë xubunu atsinia anun ka akaman atsínkin xëputi ꞌakin tarakankë ꞌi akama amátima ꞌikën.

⁶ Usokin ꞌakë aín ka Nukën ꞌIbun ꞌaisamaira ku ꞌirumikin Asdod ëmanu ꞌikë ꞌimainun a menu tsókë filisteo unikama ꞌaisamaira tëmërai rakuë́nun ꞌimiakëxa.

⁷ Usai ꞌia isi ka Asdod ëmanu tsókë unikama kikankëxa: “Israel unikaman Diosan bunántisa okin ꞌakë ax ka nun menu ꞌitima ꞌikën, a diosan ka nu ꞌatima okin tëmëramianan nun dios Dagón aribi ꞌatimoia.”

⁸ Kikankëbëtan ka anu ꞌikë ꞌapun kamabi filisteo ꞌapukama timëti unun kamiakëxa, kamikë uax timë́kë ka ësokin atu ñukákëxa: —¿Uisa karanuna Israel unikaman Diosan bunántisa okin ꞌakë ënë oti ꞌain? Kixun ñukákëxun ka Gad kakë ëmanu buántanun kamina xuti ꞌai kixun axa timë́kë ꞌapukaman kakëxa. Kakëxun ka Gad kakë anu filisteo unikaman buánkëxa.

⁹ Usakin buánkë aínbi ka Nukën ꞌIbun Gad kakë ëmanu tsókë unikama ꞌinsíni ku ꞌirumainun tuákamaribi ku ꞌiruax tëmëranun ꞌimiakëxa.

¹⁰ Usokëbëtan ka filisteo unikaman bunántisa okin ꞌakë anua Diosan kushi ꞌikë a ëma itsi Ecrón kakë anu buántanun xuakëxa, xutia buánxun bëbarukinkëbëbi ka anu tsókë unikama munuma sharati kikankëxa; “Nua këñununbi ka bunántisa okin ꞌakë anua Diosan bana ꞌikë a nunu bëkania kiax kikankëxa.”

¹¹ Kamabi unikama axa Diosan ka nu ꞌaisama okin bamanun ꞌatima okë ꞌainshi ka bëtsi ëmanu ꞌikë filisteo ꞌapukama kamikëxa anu rikuantsikë kakankëxa: “¡Nukamaxnu ꞌaisamaira këñúkëma ꞌaínshi kamina anua Israel unikama Diosan bana kuënëokë nankë bunántisa okin ꞌakë ënë xukanti ꞌain!”

¹² Usai ꞌikëbëtan ka naínuxunbi kuaisa ꞌitánun an ꞌakinun kixun aín nami ankëti ku ꞌiruaxia ñukëmakama an atun dios ñukákëxa.