1 Samuel 4 - Kashibo-Kakataibo Biblia

¹ Usakia kakëxun ka Samuelnën kamabi Israelkama bana ñuixuankëxa. Achúshi nëtën ka filisteo suntárukamax Israel kamabë ꞌakánanti sinanx timë́kankëxa, usaía ꞌikëbë ka israel suntárukamaxribi atubë ꞌakananux mëníokakëxa, mëníokakiani rikianx ka Eben-ézer kakë anu bëbax anu ꞌikankëxa. ꞌImainun ka filisteo suntárukamaxribi ëma Afec kakë me sapan ꞌikë anu timë́akëxa,

Israel suntárukama ꞌaxun bunántisa okin ꞌakë anua Diosan bana kuënëokë ꞌarukë a filisteo unikama bikan ñuikë bana

² anuxun ka filisteo suntárukaman pain israel suntáru ꞌakin pëuakëxa, pëuax abë ꞌakanankin ñusma oxun ꞌakin ka cuatro mil Israel suntáru rëtëkankëxa.

³ Usakia ꞌakëx ka anuaxa ꞌakanankë anuax Israel suntáru raírinëx rikiankëxa, rikiankëbë ka atun ꞌapukamax kiakëxa: “¿Uisa kupí kara Nukën ꞌIbu bërí filisteo suntárukaman usakin nu ꞌanun ꞌamiax? Anu kuanxun kamina Siló kakë ëmanu nankë bunántisa okin ꞌakë kurin ratakakakë anua Nukën ꞌIbu Diosan bana kuënëokë ꞌarukë a bitsi kuanti ꞌain, axa nu nëbëtsi aín ka Diosan ax numi nishkë unikamanua nu ië́miti ꞌikën.”

⁴ Usai kitankëxun ka Israel ꞌapukaman an biti suntáru raíri Siló kakë ëmanu xuakëxa, xukëx kuanxun ka bunántisa okin ꞌakë kurin ratakakakë anua Dios kamabi kushiñu Querubin samaira ainan a bëakëxa. Bëkëbë ka Elínën bëchikë Hofní ꞌimainun Finees a rabëtaxribi atubë uakëxa, ukin ka anua Diosan bana kuënëokë ꞌarukë bunántisa okin ꞌakë a bëakëxa.

⁵ Usakin bëia isi anua atux bukukë anu bunántisa okin ꞌakë kurin ratakakakë a nukukëbë ka, Israel suntárukamax ꞌitsaira kuëëni me banami chirinkin me shaíkaisa oi ꞌikankëxa.

⁶ Usai kuëëni sharati ꞌia ka filisteo suntárukaman kuakëxa, kuati ka atúxbi ñukákanani kikankëxa. ¿Uisakatsi kara Israel suntárukamax anua atux bukukë anuax ꞌaisamaira sharatin? Usa ꞌain ka Israel suntárukaman bunántisa okin ꞌakin kurin ratakakakë anu Diosan bana kuënëokë ꞌarukë anua atux bukukë anu buánkë filisteo suntárukaman kuakëxa,

⁷ kuati rakuë́ti ka kikankëxa: “¡Atun Dios ka anua Israel suntárukama ꞌikë anu uaxa! ¡Nun kananuna uinsaranbi uni usai ꞌia kuakëma ꞌain!

⁸ ¡Usakin ñu ꞌakëbëtan kara! ¿Uin atun Dios kushiira an ꞌatima oia nu ꞌakinti ꞌik? ¡Ax ka an egipcio unikama anu uni ꞌikëma menuxun këñumianan bëtsi bëtsi ñu ꞌakin atu ismia a ꞌikën!

⁹ ¡Usa ꞌain kananuna kana ꞌaíma kixun sinánkima abi kushikin filisteo suntárukama ꞌixun nun ira ꞌati ꞌain. Usokin ꞌakëxuma ka atun ñusma oxun ꞌatankëxun nun atu ꞌakësaribi okin nun atu ñu mëëxunun hebreo unikaman ꞌimiti ꞌikën!”

¹⁰ Usa ꞌain ka filisteo suntárukaman atubë ꞌakanankin israel suntárukama ñusma oxun ꞌaisamaira okin ꞌakëxa, usaira okían ꞌakëx ka anuaxa ukë atun ꞌikënubi abákankëxa. Usakia ꞌakëx ka bamakë unikama ax ꞌaisamaira ꞌaish treinta mil suntáru israel rëtëkë ꞌiakëxa.

¹¹ ꞌAnan ka filisteo suntárukaman anua Diosan bana kuënëokë ꞌarukë bunántisa okin ꞌakë aribi Israel suntárukama ꞌakin, bianan ka Elínën bakë bëchikë rabë́ Hofní ꞌimainun Finees aribi rëtëkankëxa.

¹² Usokian ꞌakëbë ka Benjamínën rëbúnkinën aintsi suntáru achúshinëx anuaxa ꞌakanankë anuax abákëxa, abátankëx ka aín aintsikama Siló kakë ëmanu bukukë a nëtënbi bëbaxun chanioi kuankëxa. Kuania iskankëxbi ka aín chupa nushi nushira ꞌianan aín maxká men chuarukë ꞌiakëxa.

¹³ Usai kuanx bëbakin iskëxbi ka, Elí anu tsóti ꞌakë achúshinu tsóxun anun ëmanu atsínti xëkuë ꞌurama ñuitsimarua uni kara ꞌaíma kixun tania tsókë isakëxa. Anuax ka uisa kara bunántisa okin ꞌakë anua Diosan bana kuënëokë ꞌarukë a okanxa kixun sinani ꞌitsaira masá nuituakëxa. Usa ꞌain ka suntáru ꞌakanankënuaxa abákë an ëmanu atsínkinshi uisai kara ꞌikanxa kixun unikama ñuixuankëxa; ñuixunkëxun kuati ka kamabi unikamax munuma kuënkëni sharáti kikankëxa.

¹⁴ Sharákania kuati ka Elí anua tsókë anuaxbi sinani kiakëxa: ¿Uisakatsi kara unikamax xuamatira sharati banain? kixuan sinánkëbëbi ka, suntáru abákë ax bënëtishi abákiani kuanxun Elí tsókëbi kai kuankëxa,

¹⁵ anu ka Elí noventa ꞌimainun ocho baritiañu ꞌiakëxa, usa ꞌaish ka kaniakëti bëxuñu ꞌiakëxa.

¹⁶ Usa ꞌikë ka uni an nukúkin kakëxa: Bëríbi kana anuaxa ꞌakanankankë anuax uisaibi kara ꞌiakë kuatsini bamati ꞌaishi aín. ¿Uisai kaina ꞌikan ꞌën bakë bëchikën? kixun ka Elínën ñukákëxa.

¹⁷ —Israel suntárukama nux kananuna filisteo suntárukaman ꞌaisamaira okin uni ꞌakëbë kana abán, —kixun ka ax abákë uni an kakëxa—. Kanan ka nun suntárukama ka kupitanunma ꞌitsaira rëtëkanxa, usokin ꞌakin ka min bakë bëchikë Hofní ꞌimainun Finees a rabë́ribi ꞌaxa ꞌanan ka bunántisa okin ꞌakë anua Diosan bana kuënëokë ꞌarukë aribi filisteo suntárukaman biaxa kixun kakëxa.

¹⁸ Usakin nu ꞌakin ka suntárukaman bunántisa okin ꞌakë a biaxa kixun ñuia kuatira ka, Elí anun ëmanu atsínti xëkuë rapasu tsótaxbi kaniakëkëira ꞌaish aín ratúkënanbi kaxutan nipakëti tëtsasikiti ñuakëxa. An ka cuarenta baritia Israel unikama atun ꞌapu ꞌixun ꞌakiankëxa.

¹⁹ Anu ka aín bakë bëchikë Finees aín xanu aín piaka ax ñuitsikë ꞌaish anúan bakënti nëtë́ishi ꞌia kainkë ꞌiakëxa, usa ꞌixun ka filisteo suntárukaman bunántisa okin ꞌakë anua Diosan bana kuënëokë ꞌarukë a bikankë kuakëxa, kuanan ka aín bënë Finees aribia ꞌakankë kuanan aín bënën papa axribia pakëti tëtúki ñukë kuati ratuti masánuitutia ka anuxuinshi aín tuákën paëokëxa, usakia ꞌaisamaira paëokëx tënëtisamaira tani ka anuaxëshi aín tuá bakëankëxa.

²⁰ Usai ꞌibia bë́nania iskin ka an bakënmikë xanukaman kakëxa; kamina rakuë́tima ꞌain achúshi bëbu tuá kamina bakë́an, usakian kakëxunbi ka an kuashikin uisakinbi káma ꞌikën.

^21-22 Usai ꞌixun ka ashikin aín tuá Icabod kakin anëakëxa. Anëi ka ashiti ësai kiakëxa: “An Israel kama ꞌakinti ka ꞌaíma ꞌikën, bunántisa okin ꞌakë anua Diosan bana kuënëokë ꞌarukë a bikanxa.” Ësai ka xanu ax kiakëxa, usa ꞌixun ka bunántisa okían ꞌakë a bianan filisteo suntárukaman aín bënë rëtëkë kuanan aín kuku ñukë añui kiakëxa.