1 Samuel 31 - Kashibo-Kakataibo Biblia

Saúl ꞌimainun aín bakë bëchikëkama ꞌakanani kuanx bamá ñuikë bana

¹ Filisteo suntárukaman ka Israel unikama ꞌakëxa, ꞌakëxun oí ka israel suntárukamax atubë ꞌakananibi abákankëxa, usakia filisteo unikaman ꞌakëx ka aín bashi Guilboa anu uni bamakë ꞌaisamaira ꞌiakëxa.

² Usa ꞌain ka filisteo suntárukamax Saúl ꞌimainun aín bëchikë Jonatán, Abinadab ꞌimainun Malquisúa akamaribi nuibianxun ꞌakëxa.

³ Usokin nuibianx ka raíri ꞌakinma Saúl ꞌanux ami ꞌikuainkankëxa; usai ꞌixun ka ax pian ꞌakánanti ꞌunánkë filisteo unikaman Saúl atun pia pukin ꞌakëxa, usakin ax ka ꞌitsaira atumi rakuëkankëxa.

⁴ Usokia ꞌakankëxun ka Saúlnën an manë pará tuixunkë uni a kakëxa: —Min manë xëtokë bikin kamina anun bëríbi ꞌë ꞌati ꞌain, ꞌëx kana filisteo unikama an Dios rabikëma kamaxa ꞌë ꞌatankëx ꞌëmi kuaiti kuëëniman. Usokian kakëxunbi ka an aín manë pará tuinxukë uni an usokin ꞌaisama tani ꞌitsaira rakuë́akëxa. Usai ꞌikëbëtan ka Saúlnën aín manë xëtokë bitsi anun abi tarókati bamakëxa.

⁵ Usai abi ꞌia Saúl bamaia isi ka, an aín manë pará tuinxunkë uni axribi aín manë xëtokë bitsi anun abi tarókati bamakëxa.

⁶ Usai ka a nëtënbi Saúl ꞌimainun aín bakë bëchikë rabë́ ꞌimainun achúshi akama ꞌianan an aín manë pará tuinxukë uni ꞌimainun kamabi abëa abákë suntárukama atúxribi bamakëxa.

⁷ Usai ꞌikë ka israel unibu axa aín bashi ꞌukëmanan tsókë ꞌimainun Jordán kakë baka au tsókë unikaman kuakëxa, kuanan ka Israel suntárukamax ka abáxa ꞌimainun ka Saúl nën bakë bëchikëkamaxribi ñuaxa kixun ñuikania kuakëxa, kuabiani ka atux anu ꞌikë ëma ëbiani anuax abákankëxa. Usai abákian atun ëma ñankáishi ꞌitánun ëbiankë ka filisteo suntárukaman anu bëbarukin atun ëmakama ꞌibúakëxa.

⁸ Usai ꞌikë a pëkaran ka filisteo suntárukamax uni bamakë atun ñu bikatsi kiax rikianxun Saúl ꞌimainun aín bëchikë achúshi ꞌimainun rabë́ axribia bamax bashi Guilboa kakë anu rakákë mërakëxa.

⁹ Mëraxun ka suntáru achúshinën Saúl aín maxká tëbískakin bimainun raírinën anuan ꞌakanankë akamabi biakëxa, usokin ꞌatankëxun ka kamabi filisteo mekamanu ꞌikë unikama ꞌimainun anuxua atun dios rabikë xubunu ꞌikë unikamabia chanionun kixun uni xuakëxa.

¹⁰ Usokin ꞌanan ka raíri filisteo suntárukaman anúan ꞌakanankë aín manë xëtokë ꞌimainun aín manë pará okían ꞌakë aribi, anuxun atun dios Astarté rabikë xubu anu nankëxa, nanan ka Saúl ain bakë bëchikëkama ñukë akëñunbi anun Bet-sán kakë ëma bëararakin kënëkë anu bëntankankëxa.

¹¹ Usokia filisteo unikaman Saúl ñukë ꞌakë ka Galaab menua ꞌikë ëma Jabés anu bukukë unikaman kuakëxa,

¹² kuabiani ka uni kushi sinánñubu atux ishi kanankiani imë́ kuanëkin Bet-sán kakë ëma anun bëararakë anua Saúl këñunbia aín bakë bëchikëkama ñukë bëntankankë a nanpabëtsinkin bëxun Jabés kakë ëma anuxun xarokankëxa.

¹³ Usokin ꞌaxun ka aín xokama ashi Jabés kakë ëma anua nikë i pëchiñu tëmú, anu maínkankëxa. Usokin ꞌatankëx ka mapai achúshi ꞌimainun rabë́ nëtë ꞌimikin ñu pima samákankëxa.