1 Samuel 3 - Kashibo-Kakataibo Biblia

Nukën ꞌIbuan ain anën Samuel kuëan ñuikë bana

¹ Samuelnën ka uni bëná ꞌixun Elínën ꞌamikëxun Nukën ꞌIbun ñu mëëti ꞌakëxa. A nëtë kaman ka ꞌitsaira abë banakin uibi bana ñuixuanan namákësa okían isnun Nukën ꞌIbun ismiama ꞌikën.

² ꞌAínbi ka achúshi imë́ ka Elí bëxuñu ꞌiakëxa, usa ꞌixun ka upíokin isima anua ꞌikë aín xubunubi ꞌiakëxa.

³ Anuax Nukën ꞌIbubë banati xubunua Samuel ꞌain ka bunántisa okin Dios ꞌaxunkë anuax. Achúshi tirí anua upíira kakë ꞌikë anuax bënatimaira pë́kikë ꞌiakëxa.

⁴ Usa ꞌain ka Nukën ꞌIbun Samuel Samuel kakin kuëankëxa: —¡Kuënkëxun ka Samuelnën kakëxa! ¡Ënu kana ꞌai kixun kakëxa!

⁵ Usakian kuënkëx ka an kuëënkësa sinani anu abákiani kuanxun Elí kakëxa: —Ënu kana uan; ¿uisa oti kaina ꞌë kuëan? —Kakëxunbi ka ꞌën kana mi kuënkëma ꞌai —kixun Elínën kakëxa—. Mix anu ꞌuxkë anubi kamina kuanti ꞌai kixun ka Elínën kakëxa. Kakëx kuanx ka Samuel anua ꞌuxkë anubi kuanx ꞌuxtëkëankëxa.

⁶ ꞌUxkëbi ka Nukën ꞌIbun amiribishi kuëntëkëankëxa: —¡Samuel Samuel! Kakin kuëntëkënkëx ka anua ꞌuxkë anuax nirukiani kuanxun Elí kakëxa: —Ënu kana uan. ¿Uisoti kaina ꞌë kuëan? kixun kakëxa: —Kákëxun ka ꞌën kana mi kuënkëma ꞌain ꞌën bakë bëchikë kixun —Elínën kakëxa. Mix anu ꞌuxkë anubi kamina kuanti ꞌain kixun katëankëxa.

⁷ Usa ꞌain ka Samuelnën Nukën ꞌIbu ꞌunánkëma pain ꞌiakëxa, usa ꞌixun ka uisakin kara Nukën ꞌIbun uni ñu ꞌakinia kixun ꞌunánkëma pain ꞌiakëxa.

⁸ ꞌAínbi ka Nukën ꞌIbun Samuel rabë́ ꞌimainun achúshi okin kuëntëkëankëxa, usakian kuënkëx nirukiani kuanxun ka Elí kakëxa: —Ënu kana ꞌain; ¿Uisoti kaina ꞌë kuëan? Usakin ꞌaia ka Elínën Nukën ꞌIbun ka bëná uni Samuel ënë kuëënia kixun sinánkin,

⁹ ësokin kakëxa: —Anu mi ꞌuxkënu kamina kuanti ꞌain; anuxun kamina mia kuënkëxun, Nukën ꞌIbu kati ꞌain: Min uni ꞌikë kamina kuaisabi ꞌinun añu ꞌati kaina kuëëni ꞌë kati ꞌain. Ësakian kakëx ka Samuel anua uxkë anubi kuantëkëankëxa.

¹⁰ Ësakian kakëx kuanx anu ꞌuxkënu kuankë ka Nukën ꞌIbun bëráma kuënkësabi okin aín anën kuëntëkëankëxa: —¡Samuel! ¡Samuel! Kakin kuënkëxun ka min unin ka kuatia kamina kiti ꞌai kixun Samuelnën kakëxa.

¹¹ Kakëxun ka Nukën ꞌIbun ësokin kakëxa: —ꞌËn kana a kuatia rakuëtan bamai bërëtanun añu kara Israelkaman menu ꞌati ꞌain.

¹² A nëtë ꞌikëbëtan kana a nëtënbi, uisakin aín aintsi anuxun karana Elí kan usaibia ꞌinun ꞌimiti ꞌain.

¹³ ꞌËn kana usabi okin aín aintsikama tëmëramiti ꞌai kixun kana a ñuixuan, usakin kana ꞌitsaira ꞌinun ñu ꞌaisama ꞌakë kupín ꞌati ꞌai kixun ka an ꞌunánxa; aín bakë bëchikë kaman ꞌën kuëënkëma ñukama ꞌaiabi ka usakin kamina ñu ꞌatima ꞌai kixun ꞌësëkin kakëma ꞌikën.

¹⁴ Usa ꞌain ka Elínën aintsikama atun ñu ꞌatima ꞌakë ax ka uínsaranbi, ñuina xaroxunkë anunbi ꞌanan ñu ꞌinainshikë anunbi tërënxunkëma ꞌiti ꞌikë ꞌëx kin.

¹⁵ Usai kia kuatankëx ka Samuel anua ꞌikë anubi pëkaratamainun ꞌuxakëxa. Anuxun ka pë́karakëma ꞌaínshi anuxun Nukën ꞌIbu rabikë aín xëkuë xëókakëxa. Xëókax ka Samuel namákësa okían iskë ñukama Elí ñuixuntimi rakuë́akëxa,

¹⁶ ꞌaínbi ka Elínën kuënxun kakëxa: —¡Samuel, ꞌën bakë bëchikë! Kakëxun ka: —Ënu kana ꞌai kixun kakëxa.

¹⁷ Kakëxun ka Elínën ñukákëxa: —¿Uisakin kara Nukën ꞌIbun mi kax? ꞌËmi kamina añu ñubi unëtima ꞌain. Diosan ka kamabi ꞌë ñuixunkimami an kakë ñukama unëia mi tëmëranun ꞌimiti ꞌikën.

¹⁸ Kakëxun ka Samuelnën unë́kinma kamabi ñu ñuixuankëxa, ñuixunkëx ka ratuti Elí munuma kuënkëni kiakëxa: —¡Ax ka Nukën ꞌIbu ꞌikën! Usa ꞌain kamina uisakin kara mi kaia usakinbi ꞌati ꞌain.

¹⁹ Usa ꞌikë ka xura ꞌaish bërunania ënkinma ꞌakinkin Samuel ax kikësabiokin Nukën ꞌIbun ꞌakiankëxa.

²⁰ ꞌImainun ka kamabi Israelkaman ꞌunánmainun Dan kakë ëma anuxun ꞌunánmainun, Beerseba anuxunribi Samuelnën ka këmëkinma asérabi Dios kikë bana uni ñuixunia kixun ꞌunánkankëxa.

²¹ ꞌImainun ka Nukën ꞌIbun amiribishi abë banakin Siló, kakë ëmanu anuxun Dios rabiti xubu ꞌikë anuxun katëkëankëxa. Anuxun ka aín bana ꞌunánkin Samuel ꞌunánmiakëxa.