1 Samuel 28 - Kashibo-Kakataibo Biblia

¹ Usa ꞌain ka bëtsi nëtëkaman filisteo unikamax Israel suntárukamabë ꞌakananux timë́akëxa, timë́kë ꞌain ka Aquís kakë uni an David kakëxa: —Minbi kamina ꞌunanin, mi ꞌimainun min suntárukamax ka ꞌakanani ꞌëbë kuanti ꞌikën.

² Kakëxun ka Davidtan kakëxa: —Asábi ka. Usa ꞌain ka, ꞌapu an ñu ꞌaxúnti uni ënëx ka ꞌakanainsa ꞌikë kixun ꞌunánti ꞌikën. Usai kia ka Aquís an David kakëxa: —ꞌËn suntárukaman kushi mi chikitima ꞌinun kana mi anëti ꞌain kixun ka kakëxa.

Saúl ꞌimainun an ñu tankë xanu Endor kakë ëmanuax ꞌia ñuikë bana

³ Usa ꞌain ka Samuel ñukë ꞌain kamabi Israel menua ꞌikë unikama anun rabanan masá nuituti ꞌikankëxa, usai anun rabanan ꞌitankëxun ka anuaxa bakëan aín me Ramá kakë anubi maínkankëxa. ꞌImainun ka Saúlnën an ñu tankë unikama ꞌimainun an ñukë uni ain ñunshin abë banati kuëënkë a kamabi a menua chikínkë ꞌiakëxa.

⁴ Usa ꞌain ka filisteo unikama timëkiani kuanx Sunem kakë anu atun ꞌiti ꞌax anu ꞌikankëxa, ꞌimainun ka Saúlnëxribi aín suntárukama timëbiani kuanx Guilboa kakë anu atúxribi timë́akëxa.

⁵ Anuxun ka Saúlnën filisteo unikamaxribi anu atux ꞌiti ꞌax bukukë isakëxa, isí ka ꞌitsaira rakuë́ti atun ka kupitanuma nu ꞌati ꞌikë kiax bërëi ꞌiakëxa.

⁶ Usai ꞌikin ka uisai kara Nukën ꞌIbubë banati ꞌikë kixun tankëxa, ꞌaínbi ka Nukën ꞌIbun an ñukákëxunbi kuatima ꞌianan namámikinbi ismiama ꞌikën, ꞌianan ka Urim kakë anbi kaima ꞌimainun an Dios kikë bana uni ñuixunkë akamanbi ñuixuama ꞌikën, usai kamina ꞌiti ꞌai kixun kanun ꞌamiama ꞌikën.

⁷ Usokëxun ka ain suntárunën kushikama kakëxa: —Axa ñukë uni aín ñunshinbë banakë xanu achúshi kamina ꞌë barixunkanti ꞌain, ꞌëx abë banai anu kuanun. Kakëxun ka ain suntárunën kushikaman kakëxa: —Endor kakë ëmanu ka axa ñukë unikaman ñunshin kuëntankëxa abë banakë xanu ꞌikën kixun ka kakëxa.

⁸ Kakëxun ka Saúlnën an pañukë chupa a pëanan bëtsi chupa pañuakëxa ax ka Saúl ꞌikë kixun ꞌunántima rabanan. ꞌIkiani ka aín suntárunën kushi rabë́ buani imë́ xanu a iskatsi kiax kuankëxa. Kuankin ka aín xubunu bëbakin kakëxa: —ꞌËn kana mi ësokin kain añu karana ꞌati ꞌain ꞌë tanxunkin kamina, uni ñukënën ñunshin añu karana ꞌati ꞌai kixuan ꞌë kanun kuëënti ꞌain.

⁹ Kixun kakëxun ka xanun kakëxa: —Min kamina upíokin ꞌunan, Saúlnën ka ënë menua an ñu tankë unikama ꞌimainun axa uni ñukë aín ñunshin kuëanx abë banakë unikama chikíanxa. ¿Uisati kaina a bana kuaxuan ꞌapun aín suntárukama ꞌaminunbi usakin ꞌë kain?

¹⁰ ꞌAínbi ka Saúlnën Nukën ꞌIbu kakëxa: —Asérabi kana Nukën ꞌIbun kuamainunbi mi kain uisa ñu ꞌaisamabi kamina inútima ꞌain.

¹¹ —¿Ui uni mi bëxúnti kaina kuëënin? —kixun ka a xanun kakëxa. —Kakëxun ka ꞌë kamina Samuel kuënxunti ꞌai —kixun ka Saúlnën kakëxa.

¹² Kakëxun Samuel isi ka xanux achúshiti munuma kuënkëankëxa; usai ꞌikin ka Saúl kakëxa: —¿Uisati kaina ꞌë paránkin ësokin ꞌain? ¡Mix kamina Saúl ꞌain!

¹³ Kakëxun ka ꞌapu Saúlnën kakëxa: Rakuë́axma kamina ꞌiti ꞌain. ¿Añu ñuira kaina isan? —Achúshi dios kana menuaxa manámiki kuaruia isin ka xanun kakëxa.

¹⁴ —¿Añu ñu iskësa kara min iskëx ꞌiax? —kixun ka Saúlnën kakëxa. Kakëxun ka —Achúshi uni kaniakëkë ꞌaish, chupan rakukë ꞌiaxa —xanun kakëxa. Kakëxun ka Saúlnën ax ka Samuel ꞌikë kixun bënë́kinshi ꞌunánkëxa, ꞌunani ka ñanati aín bëmánan memi bëtiki ꞌiakëxa.

¹⁵ Usaia ꞌia ka Samuelnën bëru ñunshinan kakëxa: —¿Uisoti kaina unun kixun ꞌë ubíokin umian? Kakëxun ka Saúlnën kakëxa: —ꞌËx kana ꞌaisamaira sinani masá nuitutin, filisteo suntárukaman ka ꞌë ꞌanux timë́kamë ꞌëoxa Diosanbi ka ꞌë ꞌakinti ëanxa. Usa ꞌixun ka ñukákëxunbi ꞌë ꞌakinima ꞌimainun ka namámikinbi bërí ꞌë kaima. ꞌImainun ka an Dios kikë bana ñuikë unikamanbi ꞌë kanun kixun kaima, usa ꞌain kana mi kuëan añu karana ꞌati ꞌai kixun mi ñukánuxun.

¹⁶ Kakëxun ka Samuelnën bëru ñunshinan kakëxa: —¿Uisati kaina ꞌën Nukën ꞌIbun ka mi ꞌakintima ꞌikë kixun kakë ꞌixunbi mimisa bërí nishia kixun kain?

¹⁷ Nukën ꞌIbun usakia mi ꞌati kanun kakëxun ꞌën kakësabiokin ka mi ꞌaxa. An ka ꞌapu ꞌikë a mi bikuankin min ꞌunánkë uni David a ꞌapu ꞌinun kaisaxa,

¹⁸ min kamina Nukën ꞌIbun kakësokinbi ꞌaxunkin aín bana kuakëma ꞌain, ꞌianan kamina mia amalecitakama këñunkin ꞌanun kakëxunbi ꞌakëma ꞌain. Usa ꞌain ka bërí Nukën ꞌIbun ësokin mi axa.

¹⁹ Usa ꞌain ka Nukën ꞌIbun Israel suntárukama këñun mi ribi filisteo suntárukaman abámikin ꞌanun ꞌamiti ꞌikën, ꞌimainun ka imë́ishi mi ꞌimainun min bakë bëchikëkama ꞌakanani ñutankëx ꞌëbë ꞌiti ꞌikën. ꞌIanan ka Nukën ꞌIbun filisteo suntárukama anua ꞌikë aín ꞌitinua Israel suntárukama ñatanun ꞌamiti ꞌikën.

²⁰ Kakëxun kuatishi ka Saúl menu nipakëakëxa, ax ka uni chaxkë́ira ꞌiakëxa. Samuelnën bana kuati ratuti ka ain ñunshin nëtë́tishi pakëakëxa. Usai ꞌixun ka a nëtën ñu pima ꞌianan imë́ribi añu ñubi pëkaramikin piama ꞌikën.

²¹ Usai ꞌaisamairai ratutia iskin ka xanun Saúl a ꞌuramokin kakëxa: —An mi ñu ꞌaxunkë xanu ënën ka min kakësabiokin ꞌaxuanxa. Ësokin ꞌai kana bamati ꞌai kixun ꞌunánkinbi ka ënë xanun min bana tankin usakin ꞌaxa.

²² Usa ꞌain kamina bërí ꞌën kakëxun kuati kuëënun mi kain, ꞌën kana piti chukúmashi mi ꞌinanin, usa ꞌain kamina mi kuanun narakakin piti ꞌain.

²³ Kaxúan ꞌinánkëxunbi ka Saúlnën piisama tankëxa, ꞌaínbi ka aín suntárunën kushikama ꞌimainun xanu anbi ubíokin urainra kakëxun kana piti ꞌai kixun kakëxa. Usakin kaíshi menuax nirui ka anua ꞌuxkënuax tsórakëakëxa.

²⁴ Anua tsómainun ka xanu an achúshi vaca bërí kanikë xuá aín xubu rapasu ꞌikë a rëakëxa, ꞌanan ka harina putuakë anun chamiti ñukëñunma chë́kakin mamua okin ꞌaxun xuixuankëxa.

²⁵ Usokin ꞌabiankin namikëñun uanxun ka Saúl ꞌimainun aín suntárunën kushikama pinun ꞌinánkëxa, ꞌinánkëxun a pibiani ka a ñantánbi kana kuanin kixun kabiani kuankëxa.