1 Samuel 24 - Kashibo-Kakataibo Biblia

Davidbë Saúl mëníonan ñuikë bana

¹ Usai filisteo unikama ꞌanuxun nuibiani kuantankëxa atu ëbëtsini aia ka, Saúl kakankëxa David ka anu uni ꞌikëma me En-gadi anu ꞌikë kixun.

² Usakin kakëxun ka Saúlnën kamabi Israel kamanua tres mil suntáru kaístankëxun timëbiani atu buani aín bashi anun kuainsama anunbi aín suntárukamabë David bari kuankëxa.

³ Kuantankëx ka anua carnero bërúankë unikaman aín ñuina xëpukë a ꞌurama ꞌikë bashi kini anu bëbakëxa, bëbaxka anua David ꞌain suntárukamabë unëkë ꞌaínbi ꞌunánkëma ꞌaish. Saúl anu puikatsi kiax kini anu atsíankëxa,

⁴ usai ꞌikëbëtan ka aín suntárukaman David munura baxëxkin ësokin kakëxa: —Kaina sinanin Nukën ꞌIbun ka ax mimi nishkë uni uisakin kaina ꞌaisatani usakinmi ꞌanun ꞌinánti ꞌai kixun mi ká bana ka asérabi sënë́anxa. Usa ꞌain kamina uisa kaina oisatani usakin bërí ꞌati ꞌain. Ësokin kakëx a ꞌitsaira sinanibi ka David ñuitsimarua nirutankëxun, Saúlnën pañukë aín tari kuëbí tanumashi tëakin biakëxa;

⁵ ꞌaínbi ka usokin ꞌatankëxbi sinanati ꞌaxumari ꞌanuma kana ꞌia kixun sinánkin,

⁶ aín suntárukama munura baxëxokin kakëxa: ¡Nukën ꞌIbun ka ax ꞌapu ꞌikë uisabi oxuma ꞌanun ꞌë ꞌamitima ꞌikën! ¡Ax ka asérabi ꞌapu ꞌikën! ¡Usaia ꞌikë ax ka Nukën ꞌIbun usai ꞌiti kaisa ꞌikën!

⁷ Ësokin kakin ka Davidnën aín suntárukama kananuna uisabi otima ꞌai kixun sinánmikin Saúl uisabi omiama ꞌikën, usakin uisabi okëxma ka anua atsínkë bashi kini anuax chikíkiani kuankëxa.

⁸ Kuankëbë a kaxú anua unëkë bashi kini anuax chikíkin, ka munuma kuënkë́nkin kakëxa: —¡ꞌËn ꞌapu ꞌën ꞌibu! kikëbëtan ka Saúlnën kaxú bësukinbi David aín bëmánanën me tikai tsóbutia isakëxa,

⁹ usai ꞌikin ka kakëxa: —¿Uisa kupí kaina unikaman paránkin mi isa Davidnën ꞌakatsi kixun mi baria kixun kakëxun atun bana tankin ꞌë barin?

¹⁰ Mibi kamina iskë ꞌitsían, bëría Nukën ꞌIbun aín bashi kininu atsínkë mi ꞌanun ꞌinánkëxun ꞌën ꞌati, ꞌixunbi kana mi ꞌaisamatan. Usa ꞌixun kana mi uisabi okinma chikimia, mix kamina ꞌapu ꞌaish Nukën ꞌIbun kaísun ꞌimikë ꞌain kixun ꞌunánkin.

¹¹ “Min ka upíokin is ꞌën ꞌapu añu karana tuian kixun kakëxa: Ënëx ka min pañukë tari aín kuëbí tukakin ꞌën bikë ꞌikën, ësokin ꞌakin kana mi ꞌakë ꞌitsían. Usa ꞌain kamina ꞌunánti ꞌain ꞌën kana mi uisabi oisamatan kixun, ꞌianan kana këmëxun mi ꞌati kuëënkëma ꞌain. ꞌAínbi kamina mix ꞌapu ꞌixunbi ꞌakatsi kixun ꞌë barin.

¹² ¡Usa ꞌain ka Nukën ꞌIbun nu rabë́ uisa kara oisatania usokin ꞌati ꞌikën, ꞌanan ka uin kara bëtsi ꞌaisama oisatania a istankëxun! aín ꞌapu ꞌikëbi mi ꞌanan ꞌëribi ꞌati ꞌikën, ꞌaíshbi kana ꞌëx uínsaranbi mi ꞌakatsi kitima ꞌain.

¹³ Bërámabi ka uni ësai banai kiakëxa: An ñu ꞌatima ꞌakë uni an ka ñu ꞌatima ꞌatishi sinania; ꞌaínbi kana ꞌëx usama ꞌain, usa ꞌixun kana uínsaranbi mi ꞌakatsi kixun sinántima ꞌain.

¹⁴ ꞌImainun kaina ¿Mix Israel unibunën ꞌapu ꞌaíshbi kaina uix ukëbë a kaxú ꞌakatsikiax uan? ¿Ui kara ami ꞌanuxun nuibëtsinkin barikë ax ꞌik? ¡ꞌËx karana achúshi ꞌuchiti bamakësa ꞌianan achúshi ꞌiasaribi ꞌain!

¹⁵ Usa ꞌain ka Nukën ꞌIbun ka istankëxun uisa kara oisatania usakin nu rabë́ ꞌati ꞌikën; ¡ꞌanan ka min ꞌakatsikixun nuibëtsiniabi ꞌë ꞌakinti ꞌikën!”

¹⁶ Ësai kitankëx David sënë́nkëbë ka, Saúl munuma banai kiakëxa: —¡An ꞌë usakin kakë mix kamina ꞌën piaka David ꞌain! Ësokin kaíshi masánuituti inkin,

¹⁷ ka kakëxa: —Mixmi kikë ax ka asérabi ꞌikën, ꞌën mi ꞌaisama oti sinánxun ꞌakëxunbi kamina min ꞌë usaribi okin ꞌatima oti sinánkëma ꞌain.

¹⁸ Bërí kamina ꞌë ismian min kamina ꞌëx upitax kuanun ꞌakinin kixun, Nukën ꞌIbun mi uisa kaina oisatani usakin ꞌanun nankë ꞌixunbi kamina ꞌë uisabi okëma ꞌain.

¹⁹ Ax ka asérabi ꞌikën, uínbi ka ax ami nishkë uni mërakin usabi ꞌinun ënima ka uisa oxun kara ꞌati ꞌikë kixun sinánxun ꞌaisama oia. Usa ꞌain ka Nukën ꞌIbun mi upíokin ꞌakinti ꞌikën ꞌëmi bërí ꞌakinkësa ësaribiokin.

²⁰ Bërí kana upíokin ꞌunanin mixmi Israel kaman ꞌapu ꞌain ka atun min kakësabiokin ꞌai upitax bukukanti ꞌikën.

²¹ Usa ꞌain kamina uisaxunbi sinántëkëntima okin Nukën ꞌIbu anënbi ꞌë kati ꞌain, ꞌën rëbúnkikama këñukin ꞌatankëxun kaina ꞌën aintsin anëkamaribi uínbia atun anë sinántimokin tërënti ꞌai kixun.

²² Usakian kakëxun ka Davidnën Saúl sinántëkëntima okin mëníokëxa. Usakin ꞌakëx ka Saúl aín xubunu kuantamainun David aín suntárukamabëbi anuaxa ukë aín bashi kini anubi kuantëkëankëxa.