1 Samuel 21 - Kashibo-Kakataibo Biblia

Saúlnën ꞌaisatankëx David abá

¹ Usai a rabëtax banai sënë́ntankëx ka David Nob kakë ëma anu tsókë sacerdote Ahimélec kakë abë banai kuankëxa, kuankëbë aín ꞌikënuax chikikinbi a mërai ratúkin ka ñukákëxa: —¿Uisa kupí kaina mix bëtsibë aíma miratsushi aín?

² Kakëxun ka Davidtan kakëxa: —ꞌApun ka achúshi ñu mëníonun ꞌë xuaxa, kixun këmëkin uinbisa uisoti kara ꞌë xutia ꞌunántima ꞌikë kiaxa kixun kakëxa, uisa bana kara ꞌën bëkë ꞌikë aribi unántima ꞌikë kiax ka kiakëxa. Usa ꞌain kana ꞌën nikinkë suntárukama ꞌëbë mërananuxa unun kabëtsian.

³ ꞌAínbi kana panan ira, ¿ñu kaina piti nankëma ꞌain? ꞌË kamina mapai achúshi pán ꞌinánan añu kaina nan a ꞌë ꞌinánti ꞌain.

⁴ Kakëxun ka sacerdotenën kakëxa: —ꞌËn nankë pán ꞌaíshbi ka bëtsi pán kamasama ꞌikë, ax ka sacerdote kamananshi ꞌikën. ꞌAínbi kana min suntárukamaxa xanu aín nami ꞌaíma a ꞌurapain ꞌikë ꞌain mi ꞌinánti ꞌain.

⁵ Kakëxun ka Davidnën këmëkinma asérabi kakëxa: —ꞌËn suntárukamabë ꞌakanani nitsi kananuna xanun nami ꞌai a rapasu ꞌima a ꞌura ꞌian. ꞌImainun kananuna nitsi chikiti atun kakësabi oí nitsi tëmërakin suntárukamabë ꞌaish añu ñubi ꞌakëma ꞌain, usa ꞌain kananuna ñu ꞌatima ꞌakëma ꞌaish bërí upí ꞌain.

⁶ Ësokin kakëxun ka sacerdotenën pán upíira nankë a bixun ꞌinánkëxa, anua bëtsi pán ꞌaíma ꞌain, ax ka Nukën ꞌIbu nanxunkë pán ꞌiakëxa, a bixun ka a nëtënbi anua bikë a mesanu bëtsi pán xana bërí ꞌakë nankëxa.